អ្នកនាំពាក្យរងក្រសួងមហាផ្ទៃ ថា ការលួចឆ្លងដែនចូលមកកម្ពុជា​​ មានការថយចុះច្រើន  

ស្ថានភាពនៃការលួចឆ្លងដែនរបស់ជនបរទេសចូលមកកម្ពុជា ក្នុងរយៈពេលចុងក្រោយនេះ គឺមានការថយចុះគួរឱ្យកត់ សម្គាល់ បន្ទាប់ពីការអនុវត្តយ៉ាងតឹងរឹងច្បាប់អន្តោប្រវេសន៍ និងការរឹតបន្ដឹងវិធានការតាម​ច្រកទ្វារព្រំដែន។ នេះជាការអះអាងរបស់អ្នកនាំពាក្យរងក្រសួងមហាផ្ទៃ លោក ទូច សុខៈ។

តែយ៉ាងណាមិញ លោក ទូច សុខៈ បានទទួលស្គាល់ថា ជនល្មើសដែលមានបំណងលួចឆ្លងដែនចូលមកក្នុងប្រទេស​កម្ពុជា គឺនៅតែមានលំហូរឆ្លងដែនខុសច្បាប់ ដើម្បីគេចវេសពីសមត្ថកិច្ចជំនាញ​។ ប៉ុន្តែលោក បញ្ជាក់ថា ស្ថានភាពនៃ​ការលបលួចឆ្លងដែនចូលទៅរដ្ឋណាមួយ ជាទូទៅ តែងកើតមានឡើងស្ទើរគ្រប់ប្រទេសនៅលើពិភពលោក មិនថាតែកម្ពុជានោះឡើយ។

បើទោះបីជាការលួចឆ្លងដែនខុសច្បាប់នៅមានក៏ពិតមែន តែលោក ទូច សុខៈ បានអះអាងថា មានការថមថយចុះច្រើន។ លោក បានលើកឡើងនៅព្រឹកថ្ងៃទី៥ ខែមិថុនា ឆ្នាំ២០២៤​ យ៉ាងដូច្នេះថា៖ «ទទួលស្គាល់ថា ជនល្មើស ឬអ្នកដែលមានបំណងនៅក្នុងការលបលួចឆ្លងដែន គឺនៅតែមាន…ប៉ុន្តែថា​ឱ្យកើនឡើង គឺមិនកើនឡើងទេ គឺថមថយឱ្យកត់សម្គាល់ បន្ទាប់អនុវត្តច្បាប់អន្តោប្រវេសន៍ និងការរឹតបន្ដឹងច្រកទ្វារ​ទាំងបី ផ្លូវគោក ទឹក និងអាកាស ជាដើម»។

អ្នកនាំពាក្យរងក្រសួងមហាផ្ទៃរូបនេះ ក៏គូសបញ្ជាក់ពីឆន្ទៈ និងការប្ដេជ្ញាចិត្តរបស់ក្រសួងមហាផ្ទៃក្នុងការបន្តអនុវត្តឱ្យកាន់ តែម៉ឺងម៉ាត់ និងមានប្រសិទ្ធភាពខ្ពស់បន្ថែមទៀតពាក់ព័ន្ធនឹងការអនុវត្តច្បាប់ស្ដីពីអន្តោប្រវេសន៍ និងការចេញចូលប្រទេស ការរឹតបន្ដឹងសន្តិសុខ សណ្ដាប់ធ្នាប់ និងសុវត្ថិភាពតាមច្រកទ្វារ​ព្រំដែនគោក ទឹក និងច្រកទ្វារអាកាសរបស់កម្ពុជា ដើម្បីកាត់បន្ថយថែមទៀតនូវការឆ្លងដែនខុសច្បាប់ចូលកម្ពុជា៕