ព័ត៌មានជាតិ

ដំណាំស្រូវ ១២០ ហិតា នៅស្រុកព្រៃនប់ កំពុងរងការបំផ្លាញដោយពពួកដង្កូវមូរស្លឹក

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ៦ មិថុនា ២០២៤

ដោយ

ដំណាំស្រូវ ១២០ ហិតា នៅឃុំចំនួន ២ គឺ ឃុំជើងគោ និងឃុំសាមគ្គី ក្នុងស្រុកព្រៃនប់ កំពុងរងការខូចស្លឹកដោយសារពពួកសត្វដង្កូវស៊ីបំផ្លាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ៥ ខែមិថុនា ឆ្នាំ ២០២៤ ម្សិលមិញ ក្រោយទទួលបានសេចក្ដីរាយការណ៍ពីប្រជាពលរដ្ឋភ្លាម លោក នេន ចំរើន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ បានដឹកនាំមន្ត្រីជំនាញ ដោយមានការចូលរួមសហការជាមួយអាជ្ញាធរឃុំជើងគោ និងឃុំសាមគ្គី ស្រុកព្រៃនប់ ខេត្តព្រះសីហនុ ចុះទៅពិនិត្យមើលជាក់ស្ដែង ដើម្បីជួយធ្វើអន្តរាគមន៍សង្គ្រោះដំណាំស្រូវរបស់ប្រជាកសិករដែលកំពុងរងការស៊ីបំផ្លាញដោយពពួកដង្កូវមូរស្លឹកនេះ។

លោក នេន ចំរើន ប្រធានមន្ទីរកសិកម្ម រុក្ខាប្រមាញ់ និងនេសាទ និងជាប្រធានក្រុមការងារចុះជួយឃុំសាមគ្គី បានឲ្យដឹងថា ដីស្រែចំនួន ១២០ ហិតា នេះ ជារបស់ប្រជាកសិករចំនួន ៥៥ គ្រួសារ ក្នុងនោះ ៖ ១.ឃុំជើងគោ ចំនួន ១៥ គ្រួសារ ស្មើនឹង ៤០ ហិតា។ ២.ឃុំសាមគ្គី ចំនួន ៤០ គ្រួសារ ស្មើនឹង ៨០ ហិតា។

លោក នេន ចំរើន បានបញ្ជាក់ថា កន្លងមក សត្វមមាចត្នោត តែងតែមកស៊ីបំផ្លាញដំណាំស្រូវរបស់ប្រជាពលរដ្ឋជារៀងរាល់ឆ្នាំ។ ដោយឡែក ឆ្នាំនេះ សត្វដង្កូវមូរស្លឹក បានបំផ្លាញស្រូវស្រែរបស់ប្រជាពលរដ្ឋនៅដើមរដូវ។ ប្រសិនមិនចុះមកធ្វើអន្តរាគមន៍ជួយសង្គ្រោះបានទាន់ពេលវេលានោះទេ សត្វដង្កូវមូរស្លឹក នឹងស៊ីបំផ្លាញដំណាំស្រូវរបស់ប្រជាកសិករខូចខាតមានទំហំយ៉ាងច្រើន ធ្វើឲ្យរងការខាតបង់។

លោកបន្ថែមថា មន្ត្រីជំនាញរបស់មន្ទីរកសិកម្ម បានចុះផ្តល់ប្រឹក្សា និងផ្តល់ថ្នាំបាញ់សម្លាប់សត្វ ដើម្បីយកទៅបាញ់កម្ចាត់សត្វដង្កូវមូរស្លឹកនៅក្នុងឃុំទាំងពីរ នៃស្រុកព្រៃនប់។ ក្នុងនោះ មន្ទីរ នឹងបន្តចុះទៅពិនិត្យតាមឃុំទាំង ១៥ ក្នុងស្រុកព្រៃនប់ និងនៅស្រុកកំពង់សីលា បន្តទៀត ដើម្បីទប់ស្កាត់បានទាន់ពេលវេលា។