រដ្ឋបាលរាជធានីភ្នំពេញ និងខេត្តស្វយ័តជេជូ ចុះអនុស្សរណៈ​បង្កើតទីក្រុងសម័្ពន្ធមេត្រីភាព

រដ្ឋបាលរាជធានីភ្នំពេញ និងខេត្តស្វយ័តជេជូនៃសាធារណៈរដ្ឋកូរ៉េ បានឈានដល់ការចុះហត្ថលេខាលើអនុស្សរណៈ នៃការយោគយល់គ្នា ស្តីពីការបង្កើតទីក្រុងសម័្ពន្ធមេត្រីភាព ក្រោយពីប្រមុខរាជរដ្ឋាភិបាលនៃប្រទេសទាំង២​ បានជួបប្រជុំនិងមានការឯកភាពគ្នាកាលពីពាក់កណ្តាលខែឧសភាឆ្នាំ ២០២៤កន្លងមកនេះ។

ពិធីចុះហត្ថលេខាលើអនុស្សរណៈ នៃការយោគយល់គ្នាស្តីពីការបង្កើតទីក្រុងសម័្ពន្ធមេត្រីភាពនេះ បានធ្វើឡើងនារសៀលថ្ងៃទី ១២ ខែមិថុនា ឆ្នាំ២០២៤ រវាង លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកអូ យ៉ុងហ៊ុន អភិបាលទីក្រុងជេជូ (JeJu) នៅសាលារាជធានីភ្នំពេញ។
  លោក ឃួង ស្រេង បានមានប្រសាសន៍លើកឡើងថា ទំនាក់ទំនងការទូតរវាងប្រទេសកម្ពុជា និងប្រទេសកូរ៉េខាងត្បូង កើតឡើងក្រោមគំនិតផ្ដួចផ្ដើមរបស់សម្ដេចតេជោហ៊ុន សែននាយករដ្ឋមន្ត្រី។

ទំនាក់ទំនងការទូតនៃប្រទេសទាំងពីរ បានផ្តល់សមិទ្ធផលជាច្រើនមកកម្ពុជា ដូចជាគម្រោងសាងសង់ស្ពានឆ្លងកាត់ទន្លេដែលគ្រោងនេះនឹង​បើកការដ្ឋាននាពេលខាងមុខនេះ។ ដោយឡែកសម្រាប់រាជធានីភ្នំពេញ ប្រទេសកូរ៉េបានបន្តកិច្ចសហប្រតិបត្តិការ ជាក់ស្តែងពេលនេះរាជធានីភ្នំពេញ​បានចងសម្ព័ន្ធមន្ត្រីភាព​ជាមួយ​នឹងទីក្រុងជេជូ ដើម្បីឱ្យទំនាក់ទំនងនៃទីក្រុងទាំងពីរកាន់តែមានភាពល្អប្រសើរបន្ថែមទៀត ពិសេសគឺការបន្តទំនាក់ទំនងកាន់តែល្អ ទៅក្មេងជំនាន់ក្រោយៗទៀត។

លោកបានបន្តទៀតថា កន្លងមកនេះ រាជធានីភ្នំពេញបានចុះហត្ថលេខាជាមួយទីភ្នាក់ងារ​សហប្រតិបត្តិការអន្តរជាតិ​កូរ៉ (KOICA) របស់ប្រទេសកូរ៉េ ដោយបានផ្តល់ជាជំនួយលើវិស័យសុខាភិបាល​មករាជធានីភ្នំពេញ ក្នុងការជួយកសាងមន្ទីរពេទ្យ​បង្អែកដង្កោ ដែលមានទំហំទឹកប្រាក់ប្រមាណ ១០ លានដុល្លារអាមេរិក។

ក្នុងឱកាសនោះដែរ លោក ឃួង ស្រេង ក៏បានលើកឡើងពីភូមិសាស្ត្ររាជធានីភ្នំពេញដែលមានទីតាំងស្ថិតនៅចំទន្លេបួនមុខ មានប្រជាពលរដ្ឋរស់នៅចេញចូលទាំងការស្នាក់នៅប្រមាណជា ៣ លាននាក់ ដែលធ្វើឲ្យរាជធានីភ្នំពេញ ប្រឈមទៅនឹងការកកស្ទះចរាចរណ៍ ជាមួយនឹងការជនលិចដោយជំនន់ទឹកភ្លៀងផងដែរ។

សម្ដេចបវរធិបតី ហ៊ុន ម៉ាណែត បានបង្កើតនូវគម្រោងឥណទានមួយ ដោយប្រើប្រាស់ថវិកាប្រមាណជាង ១០០ លានដុល្លារ ដើម្បីដោះស្រាយបញ្ជៀសនូវការលិចលង់នេះ។

លោកបានបន្តថា រាជធានីភ្នំពេញមានសុខសន្តិភាពពេញលេញ ទទួលបាននូវការជឿជាក់ពីអ្នកវិនិយោគទុន បានមក​វិនិយោគ​រកស៊ីនៅរាជធានីភ្នំពេញយ៉ាងច្រើន និង​ក៏នៅតែបន្តទាក់ទាញអ្នកវិនិយោគឲ្យមកវិនិយោគរកស៊ីបន្ថែមទៀត។

លោក អូ យ៉ុងហ៊ុន បានមានប្រសាសន៍លើកឡើងដែរថា អតីតនាយករដ្ឋមន្ត្រីកម្ពុជា និងសម្ដេច ហ៊ុន ម៉ាណែត ជាអ្នកកសាងមូលដ្ឋានគ្រឹះនៃ​ទំនាក់ទំនងប្រទេស​កូរ៉េ និងប្រទេសកម្ពុជា។ ក្នុង​ដំណើរទស្សនកិច្ច​សម្តេច​ធិបតី​នៅ​សាធារណរដ្ឋ​​កូរ៉េ ថ្នាក់ដឹកនាំ​ខេត្តជេជូបានជួបជាមួយសម្ដេចនៅថ្ងៃទី ១៧ ខែឧសភា ឆ្នាំ២០២៤ នៅទីក្រុងសេអ៊ូល ជាលទ្ធផល​បានចុះ MOU ជាមួយរាជធានីភ្នំពេញ។

លោក អូ យ៉ុងហ៊ុន បានមានប្រសាសន៍ថា ទីក្រុងជេជូមានប្រជាពលរដ្ឋត្រឹមតែ ៧០ ម៉ឺននាក់ប៉ុណ្ណោះ។ តែទីក្រុងមួយនេះ បានទាក់ទាញភ្ញៀវទេសចរណ៍ប្រមាណជា ១៥ លាននាក់ក្នុងមួយឆ្នាំ ជាមួយនឹងការវិនិយោគបច្ចេកវិទ្យាថ្មីៗជាច្រើន​ផងដែរ។

លោកបន្ត​ថា តាមរយៈទំនាក់ទំនងនៃប្រទេសទាំងពីរ នឹងជំរុញលើវិស័យទេសចរណ៍ កសិកម្ម ឧស្សាហកម្ម ថាមពលជាមួយកម្ពុជា។ ជាមួយគ្នានេះ លោកអូ យ៉ុងហ៊ុន ក៏បានអញ្ជើញលោក ឃួង ស្រេង និងប្រតិភូរាជធានីភ្នំពេញទៅទស្សនៈកិច្ចនៅកោះជេជូផងដែរ៕

អត្ថបទ៖ ស្រីរ័ត្ន