សមត្ថកិច្ចឃាត់ខ្លួនមនុស្សជិត ២០០ នាក់ នៅក្លឹបកម្សាន្ត ប៉ាវ លីជី

កម្លាំងនគរបាលនៃនាយកដ្ឋានប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃ និងកម្លាំងតម្រួតបទបញ្ជា សហការជាមួយកម្លាំងនគរបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលរាជធានីភ្នំពេញបានចុះឡោមព័ន្ធទីតាំងក្លឹបមួយកន្លែងយីហោ ប៉ាវ លីជីង ស្ថិតនៅតាមបណ្ដោយផ្លូវលេខ ៥៩៨ សង្កាត់​បឹងកក់ទី២ ខណ្ឌទួលគោក រាជធានីភ្នំពេញ​ នៅវេលាម៉ោង១២យប់រំលងអាធ្រាតឆ្លងចូលថ្ងៃទី ១៥ ខែមិថុនាឆ្នាំ​២០២៤។

នៅក្នុងរង្វង់ប្រតិបត្តិការនេះកម្លាំងនគរបាលជំនាញបានឲ្យដឹងថា កម្លាំងនគរបាលនាយកដ្ឋានប្រឆាំងការជួញ ដូរមនុស្ស និងការពារអនីតិជននៃក្រសួងមហាផ្ទៃ ទទួលបានសេចក្ដីរាយការណ៍ និងស៉ើបអង្កេតច្បាស់លាស់ថាទីតាំងក្លឹប យីហោ ប៉ាវលីជីងនេះពិតជាលួចលាក់បម្រើ សេវាផ្លូវភេទពិតប្រាកដ។ ដូច្នេះដោយសុំគោលការណ៍ដាក់កម្លាំងឡោមព័ន្ធ ចុះបង្ក្រាប​ជាក់ស្ដែងដោយបានឃាត់ខ្លួនមនុស្សប្រុសស្រីភាគច្រើនជាយុវវ័យចំនួន ១៩៤នាក់ និងដកហូតវត្ថុតាងមួយចំនួនទៀតផងដែរ។

ក្រោយប្រតិបត្តិការមនុស្សប្រុសស្រីទាំង១៩៤នាក់ ត្រូវបាននគរបាល បញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីចាត់ការតាមនីតិវិធី៕

អត្ថបទ៖សុខា