ពលរដ្ឋរងគ្រោះដោយសារខ្យល់កន្ត្រាក់ចំនួន ១៨៦ គ្រួសារនៅខេត្តកំពតទទួលបានអំណោយពីកាកបាទក្រហមកម្ពុជា

នារសៀលទី១៩ និងថ្ងៃទី២០ ខែមិថុនា ឆ្នាំ២០២៤នេះ លោក តាក ហាប់ សមាជិកគណៈកម្មាធិការសាខាកាកបាទក្រហមខេត្តកំពតបាន តំណាងលោក ម៉ៅ ធនិន អភិបាលខេត្ត ជាប្រធានគណៈកម្មាធិការសាខា កាកបាទក្រហមកម្ពុជាខេត្តកំពត បានអញ្ជើញចុះសួរសុខទុក្ខ និងនាំយកអំណោយមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ផ្តល់ជូនគ្រួសារពលរដ្ឋរងគ្រោះដោយខ្យល់កន្ត្រាក់១៨៦គ្រួសារនៅខេត្តកំពត ក្នុងនោះស្រុកឈូកមាន៨១គ្រួសារ និងស្រុកដងទង់មាន១០៥គ្រួសារ។

នៅក្នុងឱកាសនោះ លោក តាក ហាប់ សមាជិកគណៈកម្មាធិការសាខា បានពាំនាំមកនូវប្រសាសន៍ផ្តាំផ្ញើសាកសួរសុខទុក្ខ និងការសោកស្តាយ ពីសំណាក់លោកបណ្ឌិត ម៉ៅ ធនិន ប្រធានគណៈកម្មាធិការសាខា និងជាពិសេសពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋមកទទួលអំណោយទាំងអស់ដោយក្តីនឹករឭកបំផុត ដែលជានិច្ចកាលសម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋជួបការលំបាក  អ្នកមានជំងឺ ចាស់ជរា ស្ត្រីមេម៉ាយកូនច្រើនក្នុងបន្ទុក ជនងាយរងគ្រោះ និងជនរងគ្រោះដោយគ្រោះមហន្តរាយផ្សេងៗ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ ពោលគឺទីណាមានទុក្ខលំបាក ទីនោះមានកាកបាទក្រហមកម្ពុជា និងបានផ្តាំផ្ញើដល់បងប្អូនប្រជាពលរដ្ឋទាំងអស់ ប្រកាន់យកនូវ អនាម័យល្អ រស់នៅស្អាត ហូបស្អាត ផឹកស្អាត  និងខិតខំប្រឹងប្រែងប្រកបមុខរបរបង្ករបង្កើនផលដាំដំណាំរួមផ្សំ ចិញ្ចឹមសត្វ ដើម្បីទ្រទ្រង់ជីវភាពគ្រួសារឱ្យបានប្រសើរឡើង។

លោកបានណែនាំសូមឲ្យបងប្អូនប្រុងប្រយ័ត្ននៅពេលមេឃភ្លៀង កុំឱ្យក្មេងតូចៗចេញពីផ្ទះ លុបបំបាត់ថ្លុកជ្រាំ ត្រូវដេកក្នុងមុងដើម្បីការពារជំងឺគ្រុនឈាម ចូលរួមគោរពច្បាប់ចរាចរណ៍ និងកាត់បន្ថយការប្រើប្រាស់ថង់ផ្លាស់ស្ទីក។

អំណោយផ្តល់ជូនលលរដ្ឋ ទី១. នៅស្រុកឈូក៨១គ្រួសារ (ធ្វើនៅបរិវេណសាលាស្រុក)៖  គ្រួសាររងគ្រោះមធ្យម៧០ គ្រួសារមួយគ្រួសារៗទទួលបាន ៖ អង្ករ២៥គីឡូក្រាម ត្រីខ១០កំប៉ុង  ទឹកត្រី១យួរ មី១កេស   និងថវិកា៥ម៉ឺនរៀល។

គ្រួសាររងគ្រោះធ្ងន់ធ្ងរចំនួន១១គ្រួសារ ទទួលបាន ៖ អង្ករ ២៥គីឡូក្រាម មី១កេស ត្រីខ១០កំប៉ុង ទឹកត្រី១យួរ  កៅស៊ូតង់១ដុំ និងថវិកា២០ម៉ឺនរៀល។

ទី២.ស្រុកដងទង់១០៥ គ្រួសារ(ធ្វើនៅបរិវេណវត្តក្រាំងលាវ) ៖ គ្រួសាររងគ្រោះមធ្យមចំនួន៩៧ គ្រួសារ មួយគ្រួសារទទួលបាន ៖ អង្ករ២៥គីឡូក្រាម ត្រីខ១០កំប៉ុង  ទឹកត្រី១យួរ មី១កេស   និងថវិកា៥ម៉ឺនរៀល។

គ្រួសាររងគ្រោះធ្ងន់ធ្ងរចំនួន៨គ្រួសារ ក្នុងមួយគ្រួសារៗទទួលបាន ៖ អង្ករ ២៥គីឡូក្រាម មី១កេស ត្រីខ១០កំប៉ុង ទឹកត្រី១យួរ  កៅស៊ូតង់១ដុំ និងថវិកា២០ម៉ឺនរៀលផងដែរ៕

អត្ថបទ៖ សឹង រ៉ាត់