ព័ត៌មានជាតិ

ជីក ១០៧ រណ្ដៅ តាមបណ្ដោយផ្លូវលេខ១ ក្នុងក្រុងបាត់ដំបង យុទ្ធនាការផ្ទះ ១ ខ្នង ដើមឈើ ១ ដើម

បានផុស

២ years មុន

នៅ

ថ្ងៃអង្គារ ២៥ មិថុនា ២០២៤

ដោយ

នៅក្នុងពិធីជីករណ្ដៅដាំកូនឈើ ក្នុងយុទ្ធនាការ «ផ្ទះ ១ខ្នង ដើមឈើ ១ដើម» កាលពីថ្ងៃទី២៣ ខែមិថុនា លោក លាង វាសនា អភិបាលក្រុងបាត់ដំបង បានលើកឡើងថា សម្រាប់យុទ្ធនាការជីករណ្ដៅដាំកូនឈើ ក្នុងយុទ្ធនាការ ផ្ទះ ១ខ្នង ដើមឈើ ១ដើម គឺគ្រោងជីករណ្តៅចំនួន ១០៧រណ្ដៅ តាមបណ្ដោយផ្លូវលេខ១ សង្កាត់ស្វាយប៉ោ ក្រុងបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក លាង វាសនា បានឱ្យដឹងថា សម្រាប់ការជីករណ្តៅចំនួន ១០៧រណ្ដៅ ក្នុងយុទ្ធនាការជីករណ្ដៅដាំកូនឈើ ក្នុងយុទ្ធនាការ «ផ្ទះ ១ខ្នង ដើមឈើ ១ដើម» ក្រុមការងារនឹងធ្វើការជីករណ្តៅតាមបណ្ដោយផ្លូវលេខ១ សង្កាត់ស្វាយប៉ោ ក្រុងបាត់ដំបង ដែលមានទីតាំងទី១ ចាប់ពីផ្លូវកែងបណ្ណាគារឥន្ទ្រទេវី ដល់ហាង LG ចំនួន ២១ រណ្ដៅ ទីតាំងទី២ ចាប់ពីហាងលក់ទូរស័ព្ទសុខហៃ ដល់ធនាគារ T-Trust ចំនួន ៣៥ រណ្ដៅ ទីតាំងទី៣ ចាប់ពីធនាគារ AEON ដល់ធនាគារស្ថាបនា ចំនួន ២៩ រណ្ដៅ ទីតាំងទី៤ នៅលើសួនច្បារចាប់ពីស្ពានសម្ដេចក្រឡាហោម ដល់ស្ពានសោហឺ ចំនួន ២២ រណ្ដៅ។

ក្នុងឱកាសដដែលនោះ លោក សុខ លូ អភិបាលខេត្តបាត់ដំបងមានប្រសាសន៍ថា សម្រាប់យុទ្ធនាការ «ផ្ទះ ១ ខ្នង ដើមឈើ ១ ដើម» នេះ ធ្វើឡើងសម្រាប់ក្រុងស្រុកទាំង ១៤ ក្នុងខេត្តបាត់ដំបងតែម្ដង។ ជំហានដំបូងគឺ ផ្ដោតទៅលើទីប្រជុំជន ក្នុងគោលបំណងសំខាន់បំផុតគឺ ដើម្បីកំណត់ឱ្យច្បាស់អំពីព្រំដីចំណីផ្លូវ ជៀសវាងមានការរំលោភបំពានដីចំណីផ្លូវ ជាពិសេសលើកកម្ពស់សម្រស់នៅតាមទីប្រជុំជននៅតាមក្រុងស្រុកទាំង១៤ ក្នុងខេត្តបាត់ដំបង ។

លោកបានសង្កត់ធ្ងន់ថា «នៅថ្ងៃនេះគឺ គ្រាន់តែជាការជីករណ្ដៅសិន ហើយនៅថ្ងៃទី១១ ខែកក្កដា ឆ្នាំ២០២៤ នឹងធ្វើការដាំកូនឈើដែលបានគ្រោងទុកទូទាំងទីប្រជុំជនក្នុងខេត្តបាត់ដំបង ពោលគឺទាំង ១៤ក្រុង-ស្រុក នឹងរៀបចំពិធីដាំកូនឈើនេះព្រមគ្នាតែម្ដង»៕