ផ្លូវជាតិលេខ ៣៣ ក្រាលកៅស៊ូ (AC) ពីក្រុង​កំពត​ ទៅ​​ព្រំដែន​វៀតណាមគ្រោងបញ្ចប់នៅចុងឆ្នាំនេះ

គម្រោងស្តារ និងលើកកម្រិតគុណភាពផ្លូវជាតិលេខ ៣៣ ប្រវែង ៥២,៥៧ គីឡូម៉ែត្រ ពីក្រុងកំពត (បំបែកផ្លូវជាតិលេខ ៣ ត្រង់ចំណុចគ.ម ១៤៨+១០០) ទៅកាន់ច្រកលក (ព្រំដែនកម្ពុជា-វៀតណាម) សម្រេចលទ្ធផលបាន ៨៣,៥៨% គិតត្រឹមបំណាច់ខែមិថុនា ឆ្នាំ២០២៤ ហើយ​គ្រោងនឹងបញ្ចប់ការសាងសង់នៅចុងឆ្នាំ ២០២៤។

ផ្លូវជាតិ​ដ៏​សំខាន់​នេះសាងសង់​ឡើង​ ដោយ​​ឆ្លងកាត់ភូមិសាស្រ្តស្រុកទឹកឈូ និងស្រុកកំពង់ត្រាច នៃខេត្តកំពត ទៅកាន់ក្រុងកែប និងស្រុកដំណាក់ចង្អើរនៃខេត្តកែប ឆ្ពោះ​ទៅកាន់ច្រកលក (ព្រំដែនកម្ពុជា-វៀតណាម)។

កាលពីពេលថ្មីៗនេះ មន្រ្តីក្រសួងសាធារណការ​និងដឹកជញ្ជូនដឹកនាំ​ដោយលោក ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគ្រប់គ្រងសម្របសម្រួលគម្រោង បានចុះ​ទៅ​ពិនិត្យលក្ខណៈបច្ចេកទេស និងវឌ្ឍនភាពការងារពង្រីកនិងលើកកម្រិតគុណភាពផ្លូវជាតិលេខ ៣៣ ដើម្បីធានាឱ្យប្រាកដថាគម្រោងផ្លូវជាតិលេខ៣៣ អនុវត្តទៅតាមលក្ខណៈបទដ្ឋានត្រឹមត្រូវ ប្រកបដោយគុណភាព និងអាចប្រើប្រាស់បានយូរអង្វែង។

គម្រោងពង្រីក និងលើកកម្រិតគុណភាពផ្លូវជាតិលេខ៣៣ បានប្រកាសបើកការដ្ឋានកាលពីថ្ងៃទី៣០ ខែធ្នូ ឆ្នាំ២០២២ ដែលមានតម្លៃជាងសង់ជាង ៦១ លានដុល្លារអាមេរិក និងមានរយៈពេល ៤០ ខែ សាងសង់ដោយក្រុមហ៊ុនសាជីវកម្មស្ពានថ្នល់ចិន (CRBC) និងប្រឹក្សាបច្ចេកដោយក្រុមហ៊ុនក្វាងចូវ វ៉ាងអាន ជាប្រភេទក្រាលបេតុងកៅស៊ូ (AC)៕