សត្វរុយ ស និងដង្កូវមូរស្លឹកបំផ្លាញដំណាំស្រូវក្នុងស្រុកពាមជរ ខេត្តព្រៃវែងជាង៣៥០០ហិកតា

លោក សុន សុគន្ធ អភិបាលរងស្រុកពាមជរ បានឱ្យដឹងថា នៅស្រុកពាមជរបានដាំដុះស្រូវរដូវវស្សាសរុបចំនួន ៩ ៨៩៨ហិកតា ក្នុងនោះផ្ទៃដីដែលរងផលប៉ះពាល់ដោយសារសត្វរុយ ស និងដង្កូវមូរស្លឹកចំនួន៣៥៩៤ហិកតា។

កៅក្នុងឱកាសចូលរួមកិច្ចប្រជុំជាមួយលោក ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោកបានបន្តថា ចំពោះ «រុយស» បានកើតមានតាំងពីដើមខែមិថុនា និងដង្កូវមូរស្លឹកចាប់ផ្តើមកើតច្រើននៅចុងខែ មិថុនា ឆ្នាំ២០២៤មកម្លេះ ហើយកសិករក៏បានចាត់វិធានការបាញ់ថ្នាំសម្លាប់ «រុយស» ប៉ុន្តែហាក់មិនសូវមានប្រសិទ្ធភាពឡើយ។ តាមការវាយតម្លៃរបស់កសិករ គឺដំណាំស្រូវរបស់ពួកគាត់ដែលរងការបំផ្លាញក្នុងដំណាក់កាលផើមបាត់ទិន្នផលប្រមាណ៤០-៥០%។

លោកបណ្ឌិត គង់ គា ប្រធាននាយកដ្ឋានដំណាំស្រូវនៃអគ្គនាយកដ្ឋានកសិកម្មបានណែនាំដល់ប្រជាកសិករថា ដំណាំស្រូវដែលស្ថិតក្នុងដំណាក់កាលបែកគុម្ព និងដំណាក់កាលកកើតកួរដែលស្លឹកទងនៅល្អអាចសង្គ្រោះបានប្រសិនជាអាចកម្ចាត់សត្វ «រុយស» បានទាន់ពេលវេលា។

លោក ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ ក៏បានស្នើឱ្យអាជ្ញាធរមូលដ្ឋានពិភាក្សាជាមួយប្រជាកសិករដើម្បីរៀបចំផែនការបាញ់ថ្នាំឱ្យបានស្របពេលគ្នា ។

គួរបញ្ជាក់ថា ខេត្តចំនួន៤នៃប្រទេសកម្ពុជារួមមានខេត្តព្រៃវែង ខេត្តស្វាយរៀង ខេត្តតាកែវ និងខេត្តត្បូងឃ្មុំ បានទទួលរងនូវការបំភ្លិចបំផ្លាញដោយសារសត្វរុយសធ្វើឱ្យប៉ះពាល់ដល់ដំណាំស្រូវខ្ទង់ម៉ឺនហិចតា៕

អត្ថបទ៖ សំអឿន