ខេត្តព្រះសីហនុ ប្រកាសតែងតាំងមេបញ្ជាការរងនិងជានាយសេនាធិការបញ្ជាការដ្ឋានកងរាជអាវុធហត្ថខេត្ត

លោកវរៈសេនីយ៌ឯក ឆេង វុទ្ធី ត្រូវបានប្រកាសតែងតាំងមុខតំណែងជាមេបញ្ជាការរង និងជានាយសេនាធិការបញ្ជាការដ្ឋានកងរាជអាវុធហត្ថខេត្តព្រះសីហនុ។

ពិធីប្រកាសតែងតាំងមុខតំណែងជាផ្លូវការនេះ បានធ្វើឡើងនៅព្រឹកថ្ងៃទី ១២ ខែកក្កដា ឆ្នាំ២០២៤ នៅសាលប្រជុំ A នៃបញ្ជាការដ្ឋានកងរាជអាវុធហត្ថខេត្ត ក្រោមអធិបតីភាពលោកឧត្តមសេនីយ៌ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ។

យោងតាមសេចក្តីប្រកាសតែងតាំងផ្លាស់ប្តូរមុខតំណែង នាយទាហានក្រសួងការពារជាតិលេខ ១៨០.ត.ត.០៧២៤ ចុះថ្ងៃទី ២ ខែកក្កដា ឆ្នាំ២០២៤ ចុះហត្ថលេខាដោយនាយឧត្តមសេនីយ៌ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានប្រកាសតែងតាំងលោកវរៈសេនីយ៌ឯក ឆេង វុទ្ធី អត្តលេខ១៩៩២៧៣ ជាមេបញ្ជាការរង និងជានាយសេនាធិការបញ្ជាការដ្ឋានកងរាជអាវុធហត្ថខេត្តព្រះសីហនុ។

មានប្រសាសន៌នៅក្នុងពិធីនេះដែរ លោកឧត្តមសេនីយ៌ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ បាន​ធ្វើការណែនាំដល់លោកមេបញ្ជាការង ដែលទើបទទួលការតែងតាំងមុខតំណែងបន្ថែមថ្មីយកចិត្តទុកដាក់បំពេញការងារភារកិច្ចដែលថ្នាក់ដឹកនាំប្រគល់ជូនឱ្យបានល្អ ហើយត្រូវរួបរួមកម្លាំងសាមគ្គីផ្ទៃក្នុងឱ្យបានល្អ និងកាន់តែរឹងមាំថែមទៀត។

ការងារចំពោះមុខត្រូវត្រៀមកម្លាំងអន្តរាគមន៌ មធ្យាបាយនិងគ្រឿងបំពាក់ ដើម្បីជួយសង្គ្រោះប្រជាពលរដ្ឋដែលប្រឈមមុខ​និងគ្រោះធម្មជាតិ ដូចជា ជំនន់ទឹកភ្លៀងនិងខ្យល់កន្ទ្រាក់ ដែលអាចនឹងកើតមាននៅពេលខាងមុខនេះ។ ជាមួយគ្នានេះផងដែរ លោកមេបញ្ជាការក៏បានកោតសរសើរដល់កម្លាំងជំនាញគ្រប់ផ្នែកទាំងអស់ ស្រុកក្រុងចំណុះអាវុធហត្ថខេត្តដែលបានខិតខំបំពេញការងារភារកិច្ចជូនជាតិប្រកបដោយយកចិត្តទុកដាក់ និងមានការទទួលខុសត្រូវខ្ពស់ ព្រមទាំងសម្រេចបានផ្លែផ្កាជាទីមោតនៈភាព។ ជាពិសេសការងារសន្តិសុខ រក្សាសុវត្ថិភាពនិងការការពារសណ្តាប់ធ្នាប់ជូនថ្នាក់ដឹកនាំ​កំពូលៗ និងប្រជាពលរដ្ឋនៅក្នុងខេត្តដោយសម្រេចបានលទ្ធផលយ៉ាងល្អប្រសើរផងដែរ។

ឆ្លៀតក្នុងឱកាសនេះដែរ លោកមេបញ្ជាការក៏បានមានប្រសាសន៌ដាស់តឿនដល់កម្លាំងនៅក្នុងទីបញ្ជាការ កម្លាំងមូលដ្ឋាន ស្នាក់ការ ស្រុក ក្រុងទាំងអស់ត្រូវបន្តយកចិត្តទុកដាក់ ការងារបង្កបង្កើនផល ចិញ្ចឹមសត្វនិងដាំដុះបន្លែបង្ការនិងដំណាំរួមផ្សំផ្សេងទៀតឱ្យបានច្រើនដើម្បីទុកសម្រាប់ហូបចុកប្រចាំថ្ងៃនៅក្នុងអង្គភាព៕

អត្ថបទ៖ ស៊ុយ ចាន់ធា