UN ប្រចាំកម្ពុជា វាយតម្លៃខ្ពស់ចំពោះការរៀបចំបដិសណ្ឋារកិច្ចជូនមន្រ្តី UN អន្តរជាតិ

លោក Jo Scheuer អ្នកសម្របសម្រួលអង្គការសហប្រជាជាតិប្រចាំកម្ពុជា បានវាយតម្លៃខ្ពស់ចំពោះ ទេសរដ្ឋមន្រ្តី លី ធុជ អនុប្រធានទី​១ អាជ្ញាធរមីន ដែលបានសម្របសម្រួលដល់ដំណើរទស្សនកិច្ចរបស់ លោក Jean-Pierre Lacroix អគ្គលេខាធិការរងអង្គការសហប្រជាជាតិ ទទួលបន្ទុកប្រតិបត្តិការរក្សាសន្តិភាព មកកាន់កម្ពុជានាពេលកន្លងទៅ។

គួរជម្រាបថា​ លោក Jean-Pierre Lacroix បានធ្វើដំណើរទស្សនកិច្ចមកកាន់រាជធានីភ្នំពេញ និងតំបន់រមណីយដ្ឋានបេតិកភណ្ឌពិភពលោកកោះកេរ កាលពីថ្ងៃទី ០៥ ដល់ថ្ងៃទី ០៨ ខែកក្កដា ឆ្នាំ២០២៤។
នៅក្នុងលិខិតថ្លែងអំណរគុណរបស់ លោក Jo Scheuer ដែលបានផ្ញើជូនលោក លី ធុជ បានកោតសរសើរ និងវាយតម្លៃខ្ពស់ដែលបានរៀបចំ និងចូលរួមដោយផ្ទាល់ជាមួយ លោក Jean-Pierre សម្រាប់ទស្សនកិច្ចសកម្មភាពបោសសម្អាតមីន ក្នុងភូមិកោះកេរ ដែលកាយវិការនេះ បានបញ្ជាក់យ៉ាងច្បាស់​លាស់នូវការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការគាំទ្រដល់សកម្មភាពបោសសម្អាតមីន។
ជាមួយគ្នានេះ លោកថ្លែងអំណរគុណចំពោះ លោក លី ធុជ ដែលបានសម្របសម្រួលជាមួយភាគីពាក់ព័ន្ធ រួមទាំងក្រុមការងាររបស់ មជ្ឈមណ្ឌលជាតិគ្រប់គ្រងកងកម្លាំងរក្សា សន្តិភាព បោសសម្អាតមីន និងកាកសំណល់សង្គ្រាម ដើម្បីធានាថា ទស្សនកិច្ចរបស់លោក Jean-Pierre Lacroix ទទួលបានជោគជ័យ និងលទ្ធផលផ្លែផ្កា។

លោក Jo Scheuer គូសបញ្ជាក់ថា៖«ក្នុងឱកាសនេះផងដែរ សូមវាយតម្លៃខ្ពស់ចំពោះការងារ និងកិច្ចខិតខំប្រឹងប្រែងរបស់អាជ្ញាធរមីន និងសង្ឃឹមថា យើងនឹងបង្កើនកិច្ចសហប្រតិបត្តិការរបស យើងជាបន្ត ក្នុងពេលអនាគត»។

បន្ថែមពីនេះ លោក Jo បានកោតសរសើរចំពោះរាជរដ្ឋាភិបាលកម្ពុជា ក៏ដូចជាអាជ្ញាធរមីន ដែលបានផ្តល់កិច្ចសហប្រតិបត្តិការដ៏ល្អ និងការគាំទ្រយូរអង្វែងដល់អង្គការសហប្រជាជាតិ ខណៈលោក វាយតម្លៃខ្ពស់ចំពោះការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងវិស័យសកម្មភាពមីន ដើម្បីការអភិវឌ្ឍមនុស្ស។

នៅក្នុងជំនួបពិភាក្សាការងារជាមួយ នាយករដ្ឋមន្រ្តី សម្តេចធិបតី ហ៊ុន ម៉ាណែត នាដំណើរទស្សនកិច្ចនោះ លោក Jean-Pierre Lacroix បានវាយតម្លៃខ្ពស់ចំពោះសមិទ្ធផល និងភាពជោគជ័យរបស់កម្ពុជាក្នុងការប្រែក្លាយពីប្រទេសដែលរងគ្រោះដោយសារសង្គ្រាម ទៅជាប្រទេសចូលរួមចំណែកក្នុងការបញ្ជូនកងកម្លាំងរក្សាសន្តិភាពក្នុងក្របខ័ណ្ឌអង្គការសហប្រជាជាតិ ដើម្បីចូលរួមធានានូវសុខសន្តិសុខ និងសុវត្ថិភាពដល់បណ្តាប្រទេសដទៃទៀត ដែលការណ៍នេះគឺជាគំរូដ៏ល្អមួយសម្រាប់បណ្តាប្រទេសផ្សេងទៀតជុំវិញពិភពលោក។
ជាមួយគ្នានេះលោក Jean-Pierre បញ្ជាក់ថា អង្គការសហប្រជាជាតិនឹងបន្តកិច្ចសហប្រតិបត្តិការយ៉ាងរឹងមាំ ជាមួយនឹងរាជរដ្ឋាភិបាលកម្ពុជា៕

អត្ថបទ៖ ឡាយ សាមាន