រដ្ឋបាលខេត្តកណ្តាល បិទចរាចរណ៍ផ្លូវជាតិលេខ១ ជាបណ្តោះអាសន្ន នៅថ្ងៃបើកការដ្ឋានសាងសង់ព្រែកជីកហ្វូណនតេជោ

រដ្ឋបាលខេត្តកណ្តាល នឹងបិទចរាចរណ៍រថយន្តដឹកទំនិញ និងរថយន្តដឹកអ្នកដំណើរគ្រប់ប្រភេទ នៅលើកំណាត់ផ្លូវជាតិលេខ១ និងបិទការធ្វើនាវាចរគ្រប់ប្រភេទតាមបណ្តោយដងទន្លេមេគង្គ ជាបណ្តោះអាសន្ន ក្នុងពិធីបើកការដ្ឋានសាងសង់ព្រែកជីកហ្វូណនតេជោ។ នេះបើយោងតាមលិខិតជូនដំណឹងចុះថ្ងៃទី០២ ខែសីហា ឆ្នាំ២០២៤។

រដ្ឋបាលខេត្តកណ្តាល បានឱ្យដឹងថា ការបិទចរាចរណ៍រថយន្តដឹកទំនិញ និងរថយន្តដឹកអ្នកដំណើរគ្រប់ប្រភេទ នៅលើកំណាត់ផ្លូវជាតិលេខ១ គឺចាប់ពីស្តុបបំបែកខ្នែងផ្លូវក្រវ៉ាត់ក្រុងទី៣ ត្រង់កំពង់ផែស្វយ័តក្រុងភ្នំពេញ គ.ម៣០+១៤០ ភូមិកណ្តាលលើ ឃុំបន្ទាយដែក ស្រុកកៀនស្វាយ រហូតដល់អ្នកលឿង ត្រើយខាងលិច។ ព្រមទាំងបិទការធ្វើនាវាចរគ្រប់ ប្រភេទតាមបណ្តោយដងទន្លេមេគង្គ ក្នុងភូមិសាស្ត្រទឹកដីខេត្តកណ្តាល ចាប់ពីម៉ោង ០០:០០ កណ្តាលអធ្រាត្រ រហូតដល់ម៉ោង ១៣:០០ រសៀល ថ្ងៃទី០៥ ខែសីហា ឆ្នាំ២០២៤ ដើម្បីរៀបចំពិធីបើកការដ្ឋានសាងសង់ ព្រែកជីកហ្វូណនតេជោ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ ព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី។

ចំពោះរថយន្តដឹកទំនិញគ្រប់ប្រភេទ និងរថយន្តដឹកអ្នកដំណើរ ដែលមានបំណងធ្វើដំណើរចូលរាជធានីភ្នំពេញ អាចធ្វើចរាចរណ៍ចេញពីផ្លូវជាតិលេខ១ ពីអ្នកលឿងត្រើយខាងកើត វាងតាមផ្លូវជាតិលេខ១១ ដល់រង្វង់មូលស្វាយអន្ទរ បន្តមកផ្លូវជាតិលេខ៨ ដល់ស្ពាន ព្រែកតាមាក់ ឆ្លងចូលផ្លូវជាតិលេខ៦ និងអាចបន្តធ្វើដំណើរតាមមហាវិថីឈ្នះ-ឈ្នះ ឆ្ពោះមកផ្លូវជាតិលេខ៥។ រីឯចំពោះរថយន្តដឹកទំនិញធុនធ្ងន់ និងរថយន្តដឹកអ្នកដំណើរ ពីរាជធានីភ្នំពេញទៅ អ្នកលឿង អាចវាងត្រឡប់តាមទិសដៅដូចបានរៀបរាប់ខាងលើ។

អាស្រ័យហេតុនេះ ​សូមប្រជាពលរដ្ឋទាំងអស់ ព្រមទាំងស្ថាប័នមានសមត្ថកិច្ចពាក់ព័ន្ធមេត្តាជ្រាប និងជួយចូលរួមសហការ អនុវត្តតាមខ្លឹមសារសេចក្តីជូនដំណឹងនេះប្រកបដោយប្រសិទ្ធភាព៕