ថ្នាក់ដឹកនាំ និងនិស្សិតជាង២៦០០នាក់ នៅសាកលវិទ្យាល័យវិទ្យាសាស្ត្រសុខាភិបាលចូលរួមអបអរសាទរពិធីបើកការដ្ឋានព្រែកជីកហ្វូណន តេជោយ៉ាងអធិកអធម

សាកលវិទ្យាល័យវិទ្យាសាស្ត្រសុខាភិបាលបានរៀបចំប្រារព្ធពិធីអបអរសាទរបើកការដ្ឋាន ព្រែកជីកហ្វូណនតេជោ ដែលជាមរតកប្រវត្តិសាស្ត្រសម្រាប់កូនចៅជំនាន់ក្រោយទាំងអស់គ្នាដោយមានការចូលរួមពីថ្នាក់ដឹកនាំមន្ត្រីរាជការ បុគ្គលិក និងនិស្សិតប្រមាណជាង២៦០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីអបអរសាទរបើកការដ្ឋានព្រែកជីកហ្វូណនតេជោនៅព្រឹកថ្ងៃទី០៥ ខែសីហា ឆ្នាំ២០២៤នេះ លោកសាស្ត្រាចារ្យ ​សាវុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាលបានមានប្រសាសន៍ថា «ថ្ងៃនេះ យើងទាំងអស់គ្នា ពិតជាមានសេចក្តីសប្បាយរីករាយ និងមោទនភាព
ដែលបានចូលរួមជាមួយគ្នា ទាំងថ្នាក់ដឹកនាំ មន្ត្រីរាជការ បុគ្គលិក និងនិស្សិតនៃសាកលវិទ្យាល័យ វិទ្យាសាស្ត្រសុខាភិបាលទាំងអស់ចូលរួមអបអរសាទរការបើកការដ្ឋានព្រែកជីកហ្វូណនតេជោ។ វត្តមានរបស់លោក លោកស្រី និងនិស្សិតបានបង្ហាញយ៉ាងច្បាស់នូវចលនាជាតិគាំទ្រគម្រោងព្រែកជីកហ្វូណនតេជោ ដែលជាគំនិតផ្តួចផ្តើមប្រកបដោយ ចក្ខុវិស័យវែងឆ្ងាយរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណា ចក្រកម្ពុជា ហើយបាននិងកំពុងអនុវត្តដោយរាជរដ្ឋាភិបាល នីតិកាលទី៧ នៃរដ្ឋសភាដើម្បីបន្សល់ទុកជាកេរមរតកប្រវត្តិសាស្ត្រសម្រាប់កូនចៅជំនាន់ក្រោយរាប់ពាន់ឆ្នាំតទៅ មុខ»។

លោកសាស្ត្រាចារ្យបានថ្លែងអំណរគុណដល់ថ្នាក់ដឹកនាំ មន្ត្រីរាជការ បុគ្គលិក និងនិស្សិតនៃសាកលវិទ្យាល័យវិទ្យា សាស្ត្រសុខាភិបាលទាំងអស់ដែលបានចូលរួមអបអរសាទរការបើកការដ្ឋានព្រែកជីក ហ្វូណនតេជោ ដោយទឹកចិត្តចូលរួមចេញពីបេះដូង។

លោកសាស្ត្រាចារ្យបានលើកឡើងថា ព្រែកជីកហ្វូណនតេជោ នេះ មានប្រវែង ១៨០គីឡូម៉ែត លាតសន្ធឹងកាត់តាមខេត្ត កណ្តាល ខេត្តតាកែវ ខេត្តកំពតនិងខេត្តខេត្តកែប។ គម្រោងព្រែកជីកហ្វូណនតេជោនេះនឹងផ្តល់ផលប្រយោជន៍ដ៏មហាសាលដល់សង្គម- សេដ្ឋកិច្ចកម្ពុជា ដូចជាពង្រីកការតភ្ជាប់ប្រព័ន្ធដឹកជញ្ជូន ពហុមធ្យោបាយ ចំណេញចម្ងាយផ្លូវ
ពេលវេលា និងថ្លៃដឹកជញ្ជូនប្រកបដោយភាពប្រកួតប្រជែងត្រង់ទៅសមុទ្រ។ បង្កើនវិសាលភាពនៃប្រព័ន្ធស្រោចស្រព និងរំដោះទឹកជំនន់។ ជួយពង្រីក និងបង្កើនផលិតភាពនៃការដាំដុះនៅភាគនិរតីនិងទទួលបានផលពីការនេសាទនិងពីវារីវប្បកម្មព្រមទាំង​ជំរុញវិស័យទេសចរណ៍ និងវិនិយោគ ជាពិសេសការបង្កើត តំបន់សេដ្ឋកិច្ចពិសេស តំបន់ឧស្សាហកម្ម និងការកែច្នៃនាំចេញ។

លោកសាស្ត្រាចារ្យបានបន្តថា ទន្ទឹមនេះ គម្រោងព្រែកជីកហ្វូណនតេជោ នឹងជួយឱ្យកម្ពុជាពង្រឹងនូវឯករាជ្យភាពខាង នយោបាយលើការដឹកជញ្ជូនតាមផ្លូវទឹកហើយនឹងមិនបង្កផលប៉ះពាល់ដល់ បរិស្ថាន ប្រព័ន្ធអេកូឡូស៊ី
និងរំហូរទឹកទន្លេមេគង្គឡើយ។

លោកសាស្ត្រាចារ្យបានបញ្ជាក់ថា «អ្វីដែលកាន់តែមានមោទនភាពសម្រាប់យើងទាំងអស់គ្នានោះគម្រោងព្រែកជីកហ្វូណន តេជោ នេះ ជាគម្រោងរបស់ខ្មែរទាំងអស់គ្នាដោយខ្មែរនិងដើម្បីខ្មែរគ្រប់រូប»។ លោកសាស្ត្រាចារ្យបានបន្ថែមថា« ថ្ងៃទី៥ ខែសីហា ឆ្នាំ២០២៤នេះជាមហាព្រឹត្តការណ៍ប្រវត្តិសាស្ត្រ ដែលសម្តេចមហាបវរ ធិបតី ហ៊ុន ម៉ាណែត
កំពុងបើកការដ្ឋានព្រែកជីកហ្វូណននេះ នៅព្រែកតាកែវ នៃខេត្តកណ្តាល។ដូចនេះសូមទាំងអស់គ្នា ទះដៃ ដើម្បីបង្ហាញពីការគាំទ្ររបស់យើង លើគម្រោងព្រែកជីកហ្វូណនតេជោ ដែលជាគម្រោងរបស់ខ្មែរទាំងអស់គ្នា ដោយខ្មែរនិងដើម្បីខ្មែរគ្រប់រូប»៕

អត្ថបទ៖ សំអឿន