កម្ពុជា-អាមេរិក បន្តកិច្ចសហប្រតិបត្តិការប្រយុទ្ធប្រឆាំងអំពើជួញដូរមនុស្ស

ស្ថាប័នប្រយុទ្ធប្រឆាំងអំពើជួញដូរមនុស្សកម្ពុជា និងស្ថានទូតសហរដ្ឋអាមេរិក ឯកភាពគ្នាបន្តកិច្ចសហប្រតិបត្តិការប្រយុទ្ធប្រឆាំងអំពើជួញដូរមនុស្ស និងសកម្មភាពឆបោកតាមប្រព័ន្ធអ៊ីនធឺណិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឯកភាពគ្នានេះ ធ្វើឡើងក្នុងកិច្ចប្រជុំស្តីពីការផ្លាស់ប្តូរព័ត៌មានការងារអនុវត្តច្បាប់រួមគ្នារវាងកម្ពុជា និងសហរដ្ឋអាមេរិកដោយមានលោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស និងលោកស្រី Aleks Zittle អនុប្រធានបេសកកម្មស្តីទីនៃស្ថានទូតសហរដ្ឋអាមេរិក ធ្វើជា សហប្រធានដឹកនាំកិច្ចប្រជុំ។

ដោយមានការសម្របសម្រួលពីគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស កិច្ចប្រជុំដែលប្រព្រឹត្តទៅកាលពីថ្ងៃទី៩ ខែសីហា ឆ្នាំ២០០៤ ក៏មានការចូលរួមពីមន្ត្រីសំខាន់ៗនៃស្ថាប័នប្រយុទ្ធប្រឆាំងអំពើជួញដូរមនុស្ស និងឆបោកពីក្រសួងមហាផ្ទៃ ក្រសួងយុត្តិធម៌ អគ្គនាយកដ្ឋានអន្តោប្រវេសន៍ អគ្គស្នងការដ្ឋាននគរបាលជាតិ មន្ត្រីអនុវត្តច្បាប់ និងរៀបចំគោលនយោបាយដទៃទៀតពីស្ថានទូតសហរដ្ឋអាមេរិកនៅរាជធានីភ្នំពេញ។

ភាគីទាំងពីរ បានពិភាក្សារកមធ្យោបាយបង្កើនវឌ្ឍនភាពរបស់ចំណុចនានាដែលលើកឡើងនៅក្នុងផែនការសកម្មភាពប្រយុទ្ធប្រឆាំងអំពើជួញដូរមនុស្សឆ្នាំ២០២៤ របស់ក្រសួងការបរទេសសហរដ្ឋអាមេរិក។

ភាគីទាំងពីរ បានយល់ព្រមបន្តកិច្ចសហប្រតិបត្តិការប្រយុទ្ធប្រឆាំងអំពើជួញដូរមនុស្ស និងសកម្មភាពឆបោកតាមប្រព័ន្ធអ៊ីនធឺណិត និងទីតាំងប្រព្រឹត្តសកម្មភាពទាំងនោះ ដែលបានរីកសាយភាយទាំងនៅក្នុងតំបន់ និងជុំវិញពិភពលោក បង្កឱ្យមានជនរងគ្រោះជាលក្ខណៈសាកលរួមទាំងសហរដ្ឋអាមេរិកផងដែរ៕