ព័ត៌មានជាតិ

ដីព្រលានយន្តហោះចាស់ខេត្តរតនគិរី គ្រោងអភិវឌ្ឍជាទីតាំងសាលាខេត្តរតនគិរីថ្មី

បានផុស

១០ ខែ មុន

នៅ

ថ្ងៃអង្គារ ១៣ សីហា ២០២៤

ដោយ

លោក ញ៉ែម សំអឿន អភិបាលខេត្តរតនគិរីបានអះអាងថា ដីព្រលានយន្តហោះចាស់នៅក្នុងក្រុងបានលុង គ្រោងអភិវឌ្ឍរៀបចំជាទីតាំងសាលាខេត្តរតនគិរីថ្មី ដើម្បីជួយបង្កើនទីធ្លានិងសោភណភាពទីក្រុងបានលុង ឱ្យកាន់តែមានភាពប្រណិត និងជឿនលឿនបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលខេត្តបានសង្កត់ធ្ងន់ថា «នាពេលបន្តិចទៀតនេះ ទីតាំងសាលាខេត្តរតនគិរី នឹងរុះរើទៅកាន់ដីនៅព្រលានយន្តហោះចាស់ ដោយទីតាំងសាលាខេត្តនឹងជំនួសមកវិញជាសាលាក្រុង ដើម្បីធ្វើយ៉ាងណាឱ្យសោភណភាពក្រុងបានលុង ក្លាយជាក្រុងមួយដែលកាន់តែមានភាពស៊ីវិល័យ»។

ជាមួយគ្នានេះ លោកបញ្ជាក់ជុំវិញទីតាំងមន្ទីរសុខាភិបាលខេត្តដែលនៅជាប់នឹងច្រាំងបឹងកន្សែង ក៏នឹងត្រូវរុះរើមកទីតាំងថ្មីលើដីទំហំជាង ១ហិតា ស្ថិតនៅលើដីនៃព្រលានយន្តហោះចាស់ដែលរាជរដ្ឋាភិបាលបានប្រគល់ជូនមកដល់ខេត្ត។

លោក ញ៉ែម សំអឿន អភិបាលខេត្តរតនគិរី

លោក ញ៉ែម សំអឿន បានលើកពីអនុសាសន៍របស់នាយករដ្ឋមន្ត្រីកម្ពុជាសម្តេចធិបតី ហ៊ុន ម៉ាណែត ដែលបានណែនាំឲ្យរដ្ឋបាលខេត្តកែប្រែនិងអភិវឌ្ឍន៍ក្រុងបានលុងឱ្យកាន់តែមានភាពទាក់ទាញ ជាពិសេសសោភណភាពជុំវិញបឹងកន្សែង ព្រោះនាពេលកន្លងមក ឃើញមានការទើសទាល់ពីសំណាក់មហាជនចំពោះទីតាំងមន្ទីរសុខាភិបាលខេត្ត ដែលនៅជាប់នឹងច្រាំងបឹងកន្សែង ដែលធ្វើឱ្យទីធ្លាក្បែរមាត់បឹងមិនសូវភាពធំទូលាយ។

បន្ថែមពីនេះ លោកអភិបាលខេត្តបានអះអាងថា នាពេលដ៏ខ្លីខាងមុខនេះ នៅថ្ងៃអ៊ុំទូកពលរដ្ឋនឹងឃើញការប្រែក្លាយបឹងកន្សែងកាន់តែស្រស់ស្អាតជាងមុន ដោយលោកជំរុញឱ្យមានការរៀបចំឲ្យបានស្រស់ស្អាតជាងមុន មានសុខភាពសាធារណៈ អនាម័យបរិស្ថាន ដើម្បីពលរដ្ឋក្នុងខេត្តអាចហាត់ប្រាណ និងទស្សនាកម្សាន្តកាន់តែច្រើនកុះករនៅទីនេះថែមទៀត។

នៅក្នុងអាណត្តិដែលដឹកនាំខេត្តរតនគិរី លោក ញ៉ែម សំអឿនបានអះអាងថា ប្រសិនបើលោកអាចកសាងនូវសាលាខេត្តថ្មីបានមែននោះគឺពិតជាមោទនភាពសម្រាប់លោកផ្ទាល់ ដែលនេះនឹងបង្ហាញឱ្យឃើញពីភាពរីកចម្រើននៅក្នុងខេត្តពីមួយថ្ងៃទៅមួយថ្ងៃ។

ខេត្តរតនគីរីមានព្រលានយន្តហោះចាស់មួយ ដែលដំណើរការតាំងពីចុងទសវត្សរ៍ឆ្នាំ ១៩៦០ រហូតដល់ឆ្នាំ ២០០៦ ទើបបានផ្អាកដំណើរការទាំងស្រុង។ បច្ចុប្បន្ននេះនៅក្នុងបរិវេណាព្រលាន ពុំមានសេសសល់សំណង់ហេដ្ឋារចនាសម្ព័ន្ធធំដុំទេ ក្រៅពីផ្លូវយន្តហោះក្រួសក្រហមប្រវែងជាង ៣ គីឡូម៉ែត្រ សម្រាប់បម្រើការហោះឡើងចុះ។

គួរជម្រាបថា កាលពីថ្ងៃទី៦ ខែមិថុនា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានឧបត្ថម្ភថវិកាចំនួន ២០០ លានរៀល ដល់ដំណើរការកែលម្អសោភ័ណភាពរមណីយដ្ឋានបឹងកន្សែង ស្ថិតនៅកណ្តាលក្រុងបានលុង ខេត្តរតនគិរី៕

អត្ថបទ៖ ឌិន ថារី