លោក ស សុខា ថាក្រុមជ្រុលនិយមមួយក្ដាប់តូចយកសារសំឡេងលោកក្លែងបន្លំ ប្រឌិតថាលោកគាំទ្រចលនាជ្រុលនិយមរបស់ពួកគេ

តាមរយៈគណនីហ្វេសប៊ុកផ្លូវការ នារាត្រី ថ្ងៃទី១៥ ខែសីហា លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លើកឡើងថាថ្មីៗនេះ មានក្រុមប្រឆាំងជ្រុលនិយមមួយចំនួនតូច ដែលកំពុងជ្រុលខ្លួនប៉ុនប៉ងបំផ្លាញជាតិឯង បានព្យាយាមបង្កើតព័ត៌មានក្លែងក្លាយជាបន្តបន្ទាប់ ដើម្បីឈានទៅសម្រេចផែនការផ្ដួលរំលំរាជរដ្ឋាភិបាលស្របច្បាប់ ដោយក្នុងនោះ ក៏មានអ្នកយកសារសំឡេងលោកទៅក្លែងបន្លំ និងផ្សាយខុសពីការពិតថា លោកជាអ្នកគាំទ្រទង្វើប្រាសចាកពីច្បាប់រស់ពួកគេ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ការក្លែងបន្លំសំឡេងបែបនេះ លោកប្រមុខក្រសួងមហាផ្ទៃ ចាត់ទុកថានេះជាអំពើទុច្ចរិតថ្មីមួយទៀត ដែលក្រុមជ្រុលនិយមបន្តប្រព្រឹត្តដោយមិនអៀនខ្មាស់ និងដោយគ្មានគិតពីសេចក្ដីសុខរបស់ប្រជាជនជាង១៧លាននាក់នៅមាតុប្រទេស។ 

ទន្ទឹមនឹងច្រានចោលព័ត៌មានក្លែងក្លាយដូចបានបញ្ជាក់មកនេះ លោក ស សុខា ផ្ញើសារដាស់តឿនទៅកាន់ជនរួមជាតិមួយចំនួនតូច ដែលកំពុងងប់ជ្រុលខ្លួនលុះដោយមនោគមវិជ្ជាបំផ្លាញជាតិ សូមមានការភ្ញាក់រលឹក និងដកខ្លួនចេញជាបន្ទាន់ ពីក្រុមអគតិមួយក្ដាប់តូចដែលកំពុងអុចអាលពីក្រៅប្រទេស ដែលទីបំផុតគឺពលរដ្ឋក្នុងប្រទេសទៅវិញទេ ដែលជាអ្នកប្រឈមនឹងចំណាត់ការច្បាប់ ប្រសិនបើជ្រុលខ្លួនប្រព្រឹត្តតាមការបំពងសំឡេងរបស់ជនទាំងនោះ។

លោក ស សុខា បញ្ជាក់ថាជូនថា ថ្នាក់ដឹកនាំមន្ត្រីរាជការសុីវិល មន្ត្រីនគរបាលជាតិ និងមន្ត្រីពន្ធនាគារ នៃក្រសួងមហាផ្ទៃ រួមទាំងរូបលោក ក្នុងនាមជាសេនាធិការរបស់រាជរដ្ឋាភិបាល ដែលមានសម្ដេចធិបតី ហ៊ុន ម៉ាណែត ជាប្រមុខ គឺប្រឆាំងដាច់ខាតរាល់ការប៉ុនប៉ងណាមួយដើម្បីបំផ្លាញសុខសន្តិភាព។ 

តាមលោក ស សុខា ក្រសួងមហាផ្ទៃគ្មានដំណោះស្រាយអ្វី ក្រៅពីពីយកច្បាប់មកអនុវត្តន៍ឡើយ។

លោក ស សុខា បញ្ចប់សំណេរលើទំព័រហ្វេសប៊ុកដូច្នេះ÷<យើងគ្មានជម្រើសអ្វី ក្រៅពីការអនុវត្តច្បាប់ ដោយស្រាវជ្រាវ ចាប់ខ្លួន និងបញ្ជូនរាល់ជនល្មើស ទៅកាន់ស្ថាប័នតុលាការ ដើម្បីទទួលខុសត្រូវចំពោះមុខច្បាប់នោះឡើយ>៕