ក្រសួងអប់រំ ប្រជុំត្រៀមសម្រាប់ការចរចាថវិកាអប់រំ ឆ្នាំ២០២៥

បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដឹកនាំកិច្ចប្រជុំ ស្តីពី ការត្រៀមសម្រាប់ការចរចាថវិកាអប់រំ ឆ្នាំ២០២៥ ដោយមានចូលរួមពីសំណាក់ ថ្នាក់ដឹកនាំ និងមន្ត្រីមកពីអង្គភាពពាក់ព័ន្ធក្រោមឱវាទ។

ប្រធានបទមួយចំនួនត្រូវបានលើកយកមកពិភាក្សាក្នុងកិច្ចប្រជុំ នាថ្ងៃទី១៦ ខែសីហា ឆ្នាំ២០២៤ នេះ រួមមាន ១. ការគ្រោងចំណូល ២. ការគ្រោងចំណាយថវិកា សម្រាប់ក្រសួងជារួម រដ្ឋបាលកណ្តាល មន្ទីរអប់រំ យុវជន និងកីឡា ថ្នាក់ក្រោមជាតិ និងគម្រោងចំណាយព្យួរតាមកម្មវិធី ៣. មតិសំណេះសំណាល និងអនុសាសន៍។

ដើម្បីជំរុញប្រសិទ្ធភាព និងប្រសិទ្ធផលការងារ ឆ្លើយតបទៅនឹងផែនការអាទិភាព ក៏ដូចជាកញ្ចប់ថវិកាជាតិ បណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍គន្លឹះមួយចំនួនជូនដល់ក្រុមការងារ ដូចជា៖ ១. ត្រូវរៀបចំរបាយការណ៍សមិទ្ធកម្ម វិធានការកែលម្អ និងផ្តល់ព័ត៌មានឱ្យបានពេញលេញ ដើម្បីជាទឡ្ហីករណ៍ក្នុងការចរចា និងពន្យល់។ ២. នាយកដ្ឋាននីមួយៗ ត្រូវពិនិត្យថ្លឹងថ្លែងដោយខ្លួនឯងឱ្យអស់ពីលទ្ធភាព ដើម្បីកំណត់ឱ្យបាននូវអាទិភាព ហើយសូមផ្តល់ជាជម្រើស និងដំណោះស្រាយ សម្រាប់ការងារដែលត្រូវតែអនុវត្តនៅក្នុងឆ្នាំក្រោយ និងកម្មវិធីដែលអាចទុកសម្រាប់អនុវត្តនៅពេលបន្ទាប់។

៣. សូមពិនិត្យមើលឡើងវិញនូវកម្មវិធីដែលអាចទុកសម្រាប់អនុវត្តជាមួយដៃគូអភិវឌ្ឍ។ ៤. សូមរៀបចំ និងពង្រឹងប្រព័ន្ធរបាយការណ៍ និងភាពជាម្ចាស់លើផ្នែកបច្ចេកទេស។ ៦. ត្រូវធ្វើការងារប្រកបដោយភាពបុរេសកម្ម និង ៧. ត្រូវមានការវាយតម្លៃផ្ទៃក្នុង ពាក់កណ្តាលឆ្នាំ និងចុងឆ្នាំ ដើម្បីឱ្យប្រាកដថាការវិនិយោគ ឆ្លើយឆ្លងគ្នាទៅនឹងលទ្ធផល និងចំគោលដៅ៕