រដ្ឋមន្រ្តីក្រសួងបរិស្ថាន ព្រមានដកមន្រ្តីអសកម្ម មិនបំពេញ​តួនាទី​​បង្រ្កាបបទល្មើសបរិស្ថាន

ក្នុងជួបជាមួយថ្នាក់ដឹកនាំនិងមន្រ្តីទទួលបន្ទុកនាយកដ្ឋានគ្រប់គ្រងគុណភាពទឹក និងនាយកដ្ឋានអធិការកិច្ច និងពង្រឹងការអនុវត្តច្បាប់ នៅទីស្តីការក្រសួងបរិស្ថាន នៅ​រសៀល​ថ្ងៃ​ទី​២១ ខែ​សីហា នេះ លោក អ៊ាង សុផល្លែត រដ្ឋមន្ត្រី​ក្រសួង​បរិស្ថាន ព្រមានដកតួនាទី និងបញ្ចប់ក្របខ័ណ្ឌ ចំពោះមន្រ្តីដែលមិនបានបំពេញតួនាទី ភារកិច្ច និងការទទួលខុសត្រូវរបស់ខ្លួន ក្នុងការបង្រ្កាបបទល្មើសបរិស្ថាន ដែលធ្វើឱ្យមានបញ្ហាបរិស្ថាន ប៉ះពាល់​សុខភាព និងអាយុជីវិត របស់ប្រជាពលរដ្ឋ។

លោក អ៊ាង សុផល្លែត បាន​គូស​បញ្ជាក់​ថា មន្រ្តីបរិស្ថាន​ត្រូវរួមគ្នាការពារសុខភាព និង​អាយុជីវិតប្រជាពលរដ្ឋកម្ពុជាចំនួន ១៧ លាននាក់។ កាលណាមានការបំផ្លាញបរិស្ថានធ្ងន់ធ្ងរ ប៉ះពាល់សុខភាព និងអាយុជីវិតប្រជាជន វាក៏បំផ្លាញមុខមាត់ក្រសួងបរិស្ថាន និងមុខមាត់របស់កម្ពុជាទាំងមូលដែរ។

លោក​​សង្កត់​ធ្ងន់​ថា «ខ្ញុំសូមក្រើនរំលឹកជាថ្មី ចំពោះមន្ត្រីរាជការមួយចំនួន ដែលមិនគោរពកាតព្វកិច្ច និងករណីយកិច្ចរបស់ខ្លួន ក្នុងនាមជាមន្រ្តីរាជការសាធារណៈ ហើយបើនៅតែបន្តភាពអសកម្ម ក្នុងការ​ចាត់វិធានការច្បាប់ក្នុងការបង្រ្កាបបទល្មើសបរិស្ថាន ជាពិសេសការបំពុលបរិស្ថានទឹកធ្ងន់ធ្ងរ ដែលអាចប៉ះពាល់សុខភាព និងអាយុជីវិតប្រជាពលរដ្ឋ គឺអាចបញ្ឈប់ និង​ស្នើលុប​ឈ្មោះចេញ​ពីបញ្ជី​ក្របខ័ណ្ឌ​នៃមន្ត្រីរាជការរបស់ក្រសួង»។

ក្រសួង​បរិស្ថាន​បានដាក់ចេញឲ្យ​​អនុវត្តយុទ្ធសាស្រ្តចក្រាវិស័យបរិស្ថាន ដែលផ្តោតលើសរសស្តម្ភចំនួន ៣ គឺ ភាពស្អាត បៃតង និងចីរភាព។

លោក រដ្ឋមន្ត្រី ក៏​បានបញ្ជាក់ផងដែរថា សុខភាពបរិស្ថាន មាន៣ គឺ ទី១ បរិស្ថានលើមេឃ គឺខ្យល់នៅកម្ពុជា មិនមានជាតិពុលទេ តាមរយៈការវាស់វែង ជាប្រចាំថ្ងៃរបស់ក្រសួងបរិស្ថាន។

ទី២ បរិស្ថានលើដី យើងបានបើកយុទ្ធនាការផ្សព្វផ្សាយ ប្តេជ្ញាចិត្ត និងអនុវត្តដោះ​ស្រាយផលប៉ះពាល់ដល់បរិស្ថាន ជាមួយ​នឹងការប្តេជ្ញាចិត្តធ្វើឱ្យបរិស្ថានល្អប្រសើរឡើង។ ដូចជា​ការកាត់បន្ថយការប្រើប្រាស់ថង់ប្លាស្ទិក មានអ្នកបេ្តជ្ញាចិត្ត ដោយមាន​អ្នកចូលរួមកាត់បន្ថយ ប្រមាណជាង ៩លាន ៥សែននាក់។

ទី៣ បរិស្ថានក្នុងទឹក ក្រសួងបរិស្ថាន បាននិងកំពុងយកចិត្តទុកដាក់ ដោយដាក់ឧបករណ៍ស្វ័យត្រួតពិនិត្យ គុណភាពទឹកកខ្វក់របស់រោងចក្រសហគ្រាស ធ្វើយ៉ាងណាធានាប្រភពទឹកមានបរិស្ថានល្អ។

លោករដ្ឋមន្រ្តី​បានបញ្ជាក់ថា កន្លងមកនេះ ក៏​មាន​ការ​ណែនាំឱ្យមន្ត្រីក្រសួងបរិស្ថាន ពិសេសនាយកដ្ឋានគ្រប់គ្រងគុណភាពទឹក និងនាយកដ្ឋានអធិការកិច្ច និងពង្រឹងការអនុវត្តច្បាប់ ចុះពិនិត្យតាមដានការបង្ហូរទឹកកខ្វក់​ចូលប្រភពទឹក នៅខេត្តបាត់ដំបង និងនៅខេត្តព្រះសីហនុ តែមន្ត្រីទាំងនោះហាក់មិនបានយកចិត្តទុកដាក់លើការងារនេះឡើយ។

លោករដ្ឋមន្រ្តីព្រមាន​ថា បើនៅតែមិនព្រមចាត់វិធានការលើការងារនេះទេ មន្ត្រីទាំងនោះនឹងប្រឈមមុខ ទៅនឹងការដកតំណែងនិងបញ្ឈប់ពីក្របខ័ណ្ឌមន្រ្តីរាជការហើយ។

ជាមួយគ្នានេះ​ដែរ លោក អ៊ាង សុផល្លែត ជឿជាក់ថា នៅឆ្នាំ២០២៥ នឹងគ្មានថង់ប្លាស្ទិកហោះតាមផ្លូវទៀតទេ តាមរយៈ​យុទ្ធនាការបន្ទាប់គឺ «កម្ពុជាស្អាត ខ្មែរធ្វើបាន»៕