សម្ដេចធិបតី អំពាវនាវឱ្យពលរដ្ឋបរិច្ចាគថវិកា ដើម្បីសាងសង់ហេដ្ឋារចនាសម្ព័ន្ធការពារព្រំដែន  

សម្ដេចធិបតី ហ៊ុន ម៉ាណែត អំពាវនាវឱ្យពលរដ្ឋកម្ពុជាចូលរួមបរិច្ចាគថវិកាជាមួយសម្ដេច ដើម្បីកសាងហេដ្ឋារចនាសម្ព័ន្ធនៅតាមបណ្ដោយព្រំដែន។ សម្ដេចអំពាវដូច្នេះ តាមរយៈសេចក្តីថ្លែងការណ៍ពិសេសស្តីពី “ សមិទ្ធផល១ឆ្នាំ របស់រាជរដ្ឋាភិបាល នីតិកាលទី៧ នៃរដ្ឋសភា ដែលថ្លែងចេញនៅល្ងាចថ្ងៃទី២២ ខែសីហា​ ឆ្នាំ២០២៤។

តាមរយៈសេចក្ដីថ្លែងការណ៍ពិសេសជាង២ម៉ោង សម្ដេចធិបតី ឱ្យដឹងថា សម្ដេច សម្រេចបង្កើតមូលនិធិកសាងហេដ្ឋារចនាសម្ព័ន្ធតាមបណ្ដោយព្រំដែនឡើង ទុកប្រមូលថវិកាបន្ថែម និងសម្រាប់ឱ្យប្រជាជនទូទាំងប្រទេសបានចូលរួមថវិកាដោយផ្ទាល់ ចូលរួមថវិការ ទុកសាងសង់ហេដ្ឋារចនាសម្ព័ន្ធតាមបណ្ដោយព្រំដែន។

សម្ដេចធិបតី សង្កត់ធ្ងន់ដូច្នេះ៖«ខ្ញុំបានសម្រេចផ្ដួចផ្ដើមបង្កើតមូលនិធិកសាងហេដ្ឋារចនាសម្ព័ន្ធតាមបណ្ដោយព្រំដែនដែលមានគោលដៅពីរ ទីមួយគឺកៀរគរថវិកាបន្ថែម និងទីពីរផ្ដល់ឱកាសឲ្យប្រជាពលរដ្ឋទូទាំងប្រទេសបានចូលរួមដោយផ្ទាល់ជាមួយរាជរដ្ឋាភិបាល នៅក្នុងការកសាងហេដ្ឋារចនាសម្ព័ន្ធរូបវន្តទៅតាមបណ្ដោយព្រំដែនដោយផ្ដោតការយកចិត្តទុកដាក់ទោសលើផ្លូវក្រវាត់ព្រំដែន។ ហេតុដូច្នេះខ្ញុំសូមយកឱកាសនេះ ដើម្បីអំពាវនាវដល់បងប្អូនជនរួមជាតិទាំងអស់ដើម្បីចូលរួមក្នុងបុព្វហេតុនេះ ដើម្បីរួមគ្នានៅក្នុងការកសាងផ្លូវក្រវាត់ព្រំដែន ដែលរួមគ្នានៅក្នុងការកសាងការពារបូរណភាពទឹកដីរបស់យើង»។

បើនិយាយពី​វឌ្ឍនភាព​នៃ​ការ​ស្ថាបនា​ផ្លូវក្រវាត់​ព្រំដែនតាម​​បណ្តា​ខេត្ត​ភាគឦសាន​គឺ​​ខេត្ត​ក្រចេះ​​បាន​ស្ថាបនា​​ផ្លូវ​ក្រវាត់ព្រំដែន​​បញ្ចប់​ទាំង​ស្រុង។ ខេត្ត​មណ្ឌលគិរី​សាងសង់​បាន​ប្រវែង ១៥៥ គីឡូម៉ែត្រ​លើប្រវែងផ្លូវ​ ៣១៩ គីឡូម៉ែត្រ​ និង​ខេត្ត​រតនគីរី​បាន​ប្រវែង ៨៩ គីឡូម៉ែត្រ​លើប្រវែងផ្លូវ ​២២០ គីឡូម៉ែត្រ និង​កំពុង​បន្ត​ជំរុញ​សាងសង់​ឲ្យ​ដល់​​តំបន់​កន្ទុយនាគ​។

នាយករដ្ឋមន្ត្រី​កម្ពុជា​ សម្តេច​ធិបតី ហ៊ុន ម៉ាណែត បាន​អះអាង​ថា ផ្លូវ​ក្រវាត់​ព្រំដែន​ដែល​កម្ពុជា​បាន​សាងសង់​ កន្លែង​​ខ្លះ​មាន​​ចម្ងាយ​ត្រឹម ១០ ទៅ ៣០ ម៉ែត្រ​ពី​បង្គោល​ព្រំដែន​ប៉ុណ្ណោះ។ តាម​រយៈ​ផ្លូវ​ក្រវាត់ព្រំដែន​ ពលរដ្ឋ​អាច​ជិះ​ធ្វើ​ដំណើរ​មើលឃើញបង្គោល​​ព្រំដែនបាន​យ៉ាងកៀក​ ​ដែលកន្លែង​ខ្លះ​​មានចម្ងាយ​ត្រឹម ១០ ទៅ ៣០ ម៉ែត្រ​​​ប៉ុណ្ណោះ៕