រដ្ឋដាក់ឲ្យប្រើប្រាស់ថ្នាលផ្ទៀងផ្ទាត់ឯកសារ ដើម្បីលុបបំបាត់ការក្លែងបន្លំ និងផ្ដល់ភាពងាយស្រួលដល់ពលរដ្ឋ

ទីស្ដីការគណៈរដ្ឋមន្ត្រី កាលពីថ្ងៃទី០៣ ខែកញ្ញា ប្រកាសដាក់ឱ្យប្រើថ្នាលផ្ទៀងផ្ទាត់ឯកសារ verify.gov.kh ក្នុងការផ្តល់សេវាសាធារណៈ សម្រាប់ផ្ទៀងផ្ទាត់ភាពត្រឹមត្រូវនៃឯកសារដែលមានដាក់បញ្ចូលនូវ QR Code ស្តង់ដា ក្នុងគោលបំណងលុបបំបាត់ ការក្លែងឯកសារសាធារណៈ បង្កើនជំនឿទុកចិត្ត និងផ្តល់ភាពងាយស្រួលដល់ប្រជាពលរដ្ឋ ព្រមទាំងជំរុញការធ្វើបរិវិត្តកម្មឌីជីថលសេវាសាធារណៈ។ នេះបើតាមលិខិតរបស់ទីស្ដីការគណៈរដ្ឋមន្ត្រី ដាក់ជូនឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី អភិបាលរាជធានីខេត្ត។

ការប្រកាសដាក់ឱ្យប្រើប្រាស់ថ្នាលឯកសារសាធារណៈនាពេលនេះ ធ្វើឡើងក្រោយការសម្រេចដ៏ខ្ពង់ខ្ពស់បំផុតរបស់សម្តេចមហាបវរធិបតីនាយករដ្ឋមន្ត្រី ក្នុងកិច្ចប្រជុំគណៈអចិន្ត្រៃយ៍ គណៈរដ្ឋមន្ត្រី កាលថ្ងៃទី២៨ខែសីហា ឆ្នាំ២០២៤។

នៅក្នុងលិខិត បានឱ្យដឹងថា គ្រប់ក្រសួង ស្ថាប័ន រដ្ឋបាលថ្នាក់ក្រោមជាតិ និងនីតិបុគ្គលសាធារណៈ អាចសហការជាមួយក្រសួង ប្រៃសណីយ៍និងទូរគមនាគមន៍ ដើម្បីរៀបចំអនុវត្តផ្ទាលផ្ទៀងផ្ទាត់ឯកសារ verify.gov.kh នេះក្នុងការផ្តល់សេវា សាធារណៈរបស់ខ្លួនប្រកបដោយប្រសិទ្ធភាព ដោយត្រូវអនុវត្តតាមដំណាក់កាល និងត្រូវចាត់ចែងរៀបចំផែនការ ដាក់បញ្ចូល ឃ្យូ.អ.កូដ. (QR Code) ស្តង់ដា នៅលើឯកសាររបស់ខ្លួន ស្របតាមបែបបទនិងនីតិវិធីជាធរមាន។

ជាមួយគ្នានេះ លិខិតរបស់ទីស្ដីការគណៈរដ្ឋមន្ត្រី បានបង្គាប់ឱ្យក្រសួងប្រៃសណីយ៍និងទូរគមនាគមន៍ ត្រូវផ្តល់ជំនួយបច្ចេកទេស ក្នុងករណីចាំបាច់ ដើម្បីធានាបាននូវប្រសិទ្ធភាព និងសុវត្ថិភាពខ្ពស់៕