ដំណើរទស្សនកិច្ច​តំបន់ព្រំដែនភាគ​ឦសាន លើកទីពីរ​​ដំណើរការ​តាមការ​គ្រោង​ទុក មាន​ពលរដ្ឋ​ចូលរួម ២០០ នាក់

ដំណើរទស្សនកិច្ចមកកាន់ទិសឦសានជើង​ទី ២ បាន​រៀបចំ​តាមការ​គ្រោង​ទុក​នាព្រឹកថ្ងៃ១៤ ខែកញ្ញា ឆ្នាំ២០២៤ ដោយ​មានអ្នកចូលរួមសរុបចំនួនប្រមាណ ២០០ នាក់ ដែល​បានធ្វើដំណើរតាមរថយន្តចំនួន ១៣ ​គ្រឿង ចេញពីរាជធានីភ្នំពេញ ឆ្ពោះ​ទៅ​​តាមតម្រាយ​​ផ្លូវ​ភូមិសាស្រ្ត​គោលដៅ​ក្នុង​ខេត្ត​ត្បូងឃ្មុំ ក្រចេះ និង​មណ្ឌលគិរី។

ដំណើរទស្សនកិច្ចជើងទីពីរនេះ បាន​ចុះនៅ​ភូមិអភិវឌ្ឍន៍អន្លង់ជ្រៃ ក្នុងស្រុកពញាក្រែក ខេត្តត្បូងឃ្មុំ ដើម្បីពិនិត្យស្ថានភាពភូមិសាស្ត្រពិតជាក់ស្តែងទីតាំងបង្គោលព្រំដែនរវាងកម្ពុជា-វៀតណាម ​នៅក្នុងតំបន់ភូមិសាស្ត្រខាងលើ ក៏ដូចជា​ស្វែងយល់​ពី​ស្ថានភាពសង្គម-សេដ្ឋកិច្ច ព្រមទាំងវិស័យហេដ្ឋារចនាសម្ព័ន្ធដែលមានការអភិវឌ្ឍ​ជាក់ស្តែង និង​ក្រុមទស្សនកិច្ច​បានបន្តដំណើរទៅកាន់ទីតាំងសំខាន់ៗផ្សេងៗទៀតដូចដែលបានគ្រោងទុកក្នុងភូមិសាស្ត្រខេត្តក្រចេះ និងខេត្តមណ្ឌលគិរី ជាបន្តបន្ទាប់។

ដំណើរទស្សនៈកិច្ចសិក្សានេះ ផ្តល់ឱកាសដល់បងប្អូនប្រជាពលរដ្ឋបានឃើញដោយផ្ទាល់នូវការអភិវឌ្ឍជាក់ស្តែងនៅតាមតំបន់ព្រំដែន ការកសាងហេដ្ឋារចនាសម្ព័ន្ធផ្លូវក្រវ៉ាត់ព្រំដែន និងការអភិវឌ្ឍជារួមរបស់ប្រជាពលរដ្ឋក្នុងភូមិភាគឦសាន។

កម្មវិធីដំណើរទស្សនកិច្ច​ស្វែង​យល់ពី​តំបន់​ព្រំដែន​នៅ​ខេត្ត​ភាគ​ឦសាន​នេះ រៀបចំឡើង​រៀងរាល់ថ្ងៃ​សៅរិ៍​ចុង​សប្តាហ៍ ដោយ​រាល់ការចំណាយលើការធ្វើដំណើរ អាហារ ភេសជ្ជៈ និងការស្នាក់នៅ គឺផ្តល់ជូនដោយឥតគិតថ្លៃ ដែលឧបត្ថម្ភដោយ សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី និងការចូលរួមចំណែកឧបត្ថម្ភពីសប្បុរសជន ដោយមិនប៉ះពាល់ដល់កញ្ចប់ថវិការដ្ឋ ឬកញ្ចប់ថវិកាមូលនិធិកសាងហេដ្ឋារចនាសម្ព័ន្ធតាមព្រំដែននោះឡើយ ៕

អត្ថបទ៖ សាន វិឡែម