នាយករដ្ឋមន្ត្រី អំពាវនាវឱ្យចូលរួមស្ដាវិស័យទេសចរណ៍កម្ពុជា ដើម្បីផ្ដល់ផ្លែផ្កាដល់គ្រប់ភាគី

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា​ អំពាវនាវឱ្យចូលរួមស្ដាវិស័យទេសចរណ៍កម្ពុជា ដើម្បីបង្កជាផ្លែផ្កាទៅដល់គ្រប់ភាគីពាក់ព័ន្ធ។ សម្ដេចធិបតី នាយករដ្ឋមន្ត្រី អំពាវនាវដូច្នេះ តាមរយៈសារលិខិតអបអរសាទរទិវាទេសចរណ៍ពិភពលោកឆ្នាំ២០២៤ ចុះថ្ងៃទី២៦ ខែកញ្ញា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារលិខិតកម្រាស់៤ទំព័រ សម្ដេច​ប្រមុខរដ្ឋាភិបាលបានអំពាវនាវដូច្នេះ៖«ខ្ញុំសូមអំពាវនាវឱ្យមានការចូលរួមឱ្យបានផុសផុលបន្ថែមទៀត ដើម្បីស្តារវិស័យទេសចរណ៍កម្ពុជា ទាំងទៅលើទិដ្ឋភាពគុណភាព និងបរិមាណ ប្រកបដោយនិរន្តរភាព បរិយាបន្ន ដើម្បីឱ្យការអភិវឌ្ឍបានជាផ្លែផ្កាទៅគ្រប់ភាគីពាក់ព័ន្ធ»។

ដើម្បីជាការចូលរួមអបអរសាទរ ទិវាទេសចរណ៍ពិភពលោក ឆ្នាំ២០២៤ ក្រោមប្រធានបទ “ទេសចរណ៍ និងសន្តិភាព” សម្ដេចនាយករដ្ឋមន្ត្រី បានអំពាវនាវដល់ប្រជាពលរដ្ឋគ្រប់រូប ក្រសួង ស្ថាប័ន អាជ្ញាធរពាក់ព័ន្ធ វិស័យឯកជន អង្គការជាតិ និងអន្តរជាតិ ចូលរួមគាំទ្រ និងរក្សាឱ្យបានសុខសន្តិភាព វិបុលភាពទោះនៅក្នុងតម្លៃណាក៏ដោយ។ បើតាមសារលិខិតដដែល សម្ដេចនាយករដ្ឋមន្ត្រីអំពាវនាវឱ្យរក្សាសន្តិភាព គឺព្រោះទាល់តែមានសន្តិភាពទើបមានការអភិវឌ្ឍលើគ្រប់វិស័យ។

បន្ថែមពីនេះ សម្ដេច ហ៊ុន​ ម៉ាណែត  ក៏បានអំនាវពាវឱ្យគ្រប់តួអង្គ មិនថាពលរដ្ឋ អាជ្ញាធរ និងភាគីអន្តរជាតិ ត្រូវរួមគ្នា អភិរក្សវិស័យទេសចរណ៍វប្បធម៌ និងធម្មជាតិ សហគមន៍ទេសចរណ៍ វប្បធម៌ ប្រពៃណី ឧទ្យានជាតិ ព្រៃសហគមន៍ ផ្សោតទន្លេមេគង្គ ព្រៃឈើ ការការពារបរិស្ថាន ការជំរុញបង្កើនគុណភាពផលិតផល និងសេវាទេសចរណ៍ ការរក្សាបាននូវសុខសន្តិភាព សុវត្ថិភាពទេសចរ ការរក្សាភាពញញឹមរួសរាយរាក់ទាក់ដែលជាប្រពៃណីរបស់ប្រជាជនខ្មែរ ក្នុងការធ្វើបដិសណ្ឋារកិច្ចស្វាគមន៍ភ្ញៀវយ៉ាងកក់ក្តៅក្នុងស្មារតីស្រលាញ់រាប់អាន សហប្រតិបត្តិការល្អ  ជាពិសេសចូលរួមកាន់តែខ្លាំងក្លាដល់ចលនាប្រឡងប្រណាំងទីក្រុងស្អាត រមណីយដ្ឋាន ស្អាត សេវាល្អ ដើម្បីធ្វើឱ្យកម្ពុជាស័ក្តិសមជាព្រះរាជាណាចក្រអច្ឆរិយៈ និងក្លាយជាគោលដៅទេសចរណ៍លំដាប់ ពិភពលោក។

គួរឱ្យដឹងថា កាលពីឆ្នាំ២០២៣ កន្លងទៅ កម្ពុជាទទួលបានភ្ញៀវទេសចរអន្តរជាតិ ៥.៤៥លាននាក់ កើនឡើង ១៣៩.៥% ធៀបជាមួយរយៈពេលដូចគ្នាឆ្នាំ២០២២។ ដោយឡែកសម្រាប់ ៧ខែដើមឆ្នាំ២០២៤ កម្ពុជាទទួលបានទេសចរអន្តរជាតិ ៣,៧០០,០០០នាក់ ហើយរំពឹងថានៅឆ្នាំ២០២៤នេះ កម្ពុជានឹងទទួលបានទេសចរ អន្តរជាតិប្រមាណជិត ៦លាននាក់ និងប្រមាណ ៧លាននាក់ នៅឆ្នាំ២០២៦៕

ដោយ៖ ង៉ិល ណារ៉ាត់