ស​ម្ដេចតេជោ សាទរលោក Shigeru Ishiba ដែលជាប់ឆ្នោតជាប្រធានបក្សប្រជាធិបតេយ្យសេរីរបស់ជប៉ុន

សម្ដេចតេជោ ហ៊ុន សែន  ប្រធានគណបក្សប្រជាជនកម្ពុជា ផ្ញើលិខិតអបអរសាទរចំពោះលោក Shigeru Ishiba ដែលបានជាប់ឆ្នោតជាប្រធានគណបក្សប្រជាធិបតេយ្យសេរីរបស់ជប៉ុន (LDP)។

ក្នុងនាមគណបក្សប្រជាជនកម្ពុជា សម្ដេចតេជោ ហ៊ុន សែន បានចូលរួមអបអរសាទរដោយក្តីសោមនស្សរីករាយ និងដោយស្មោះជូនចំពោះលោក Shigeru Ishiba ដែលបានជាប់ឆ្នោតជាប្រធានគណបក្សប្រជាធិបតេយ្យសេរី (LDP) កាលពីពេលថ្មីៗនេះ។ សារលិខិតរបស់សម្ដេចតេជោ នៅថ្ងៃទី២៨ ខែកញ្ញានេះ បានលើកឡើងថា ជោគជ័យរបស់លោក គឺជាសក្ខីភាពនៃសមត្ថភាពដឹកនាំពិសេស ជាពិសេសក្នុងពេលមានបញ្ហាប្រឈម និងការលះបង់ដ៏ធំធេងចំពោះមាតុភូមិ និងប្រជាជនរបស់លោក Shigeru Ishiba។

សម្ដេចតេជោ មានជំនឿយ៉ាងមុតមាំថា ក្រោមការដឹកនាំរបស់លោក Shigeru Ishiba គណបក្សប្រជាធិបតេយ្យសេរី នឹងបន្តពង្រឹងរីកចម្រើនលូតលាស់ និងជម្នះរាល់បញ្ហាប្រឈម និងឧបសគ្គរបស់ប្រទេសជប៉ុនសម្រាប់ផលប្រយោជន៍របស់ប្រជាជនជប៉ុន។ សម្រាប់ទំនាក់ទំនង និងកិច្ចសហប្រតិបត្តិការជិតស្និទ្ធជាប្រវត្តិសាស្ត្រយូរអង្វែងរវាងប្រទេសកម្ពុជា និងជប៉ុន សម្ដេចតេជោ ជឿថា នឹងត្រូវបានបន្តពង្រឹងនិងពង្រីកបន្ថែមទៀត ដោយផ្អែកលើស្មារតីគោរពគ្នាទៅវិញទៅមក ការជឿទុកចិត្តគ្នា និងប្តេជ្ញាចិត្តក្នុងការលើកកម្ពស់សន្តិភាព និងវិបុលភាពក្នុងប្រជាជាតិយើងទាំងពីរ និងតំបន់ ពិសេស តាមរយៈក្របខណ្ឌនៃកិច្ចសហប្រតិបត្តិការនៃគណបក្សទាំងពីរ។

ទន្ទឹមនេះ សម្ដេចតេជោ មានជំនឿយ៉ាងមុតមាំថា ក្នុងតួនាទីថ្មីជានាយករដ្ឋមន្ត្រីជប៉ុន លោក Shigeru Ishiba នឹងបន្តពង្រឹងបន្ថែមទៀតនូវទំនាក់ទំនង និងកិច្ចសហប្រតិបត្តិការរបស់ប្រទេសទាំងពីរលើគ្រប់វិស័យរវាងកម្ពុជានិងជប៉ុន។

សម្ដេចតេជោ ក៏បង្ហាញការទន្ទឹងរង់ចាំធ្វើការយ៉ាងជិតស្និទ្ធជាមួយមេដឹកនាំថ្មីជប៉ុនរូបនេះ និងគណបក្សរបស់លោក ដើម្បីពង្រឹងបន្ថែមទៀតនូវភាពជាដៃគូ និងលើកកម្ពស់កិច្ចសហប្រតិបត្តិការរវាងប្រទេស និងគណបក្សយើងទាំងពីរ ដើម្បីផលប្រយោជន៍ទៅវិញទៅមករបស់ប្រជាជន និងប្រទេសយើងទាំងពីរ៕