ព័ត៌មានជាតិ

សម្ដេចតេជោ អនុញ្ញាតឲ្យសាសនិកមូស្លីម ដែលស្លាប់ដោយជំងឺកូវីដ-១៩ អាចបញ្ចុះសព

បានផុស

៥ years មុន

នៅ

ថ្ងៃពុធ ១០ មីនា ២០២១

ដោយ

មានប្រសាសន៍តាមរយៈសារជាសំឡេងហើយដែលបានផ្សព្វផ្សាយនាល្ងាចថ្ងៃទី១០ ខែមីនា ឆ្នាំ២០២១នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចអនុញ្ញាតជាគោលការណ៍ពិសេសមួយសម្រាប់សាសនិកឥស្លាមបានបញ្ចុះសព ប្រសិនបើមានករណីស្លាប់ដោយជំងឺកូវីដ-១៩។

សម្តេចបានលើកឡើងថា មានសំណើលើកឡើងពីសហគមន៍អ៊ីស្លាម ទាក់ទិន ទៅនឹងការបញ្ចុះសព ដែលជាកាតព្វកិច្ចមិនអាចជៀសវាងបានសម្រាប់សហគមន៍មូស្លីម ហើយសម្ដេចបានអនុញ្ញាត ដោយ មានការលើកលែងជាករណីពិសេស សម្រាប់បងប្អូនមូស្លីមកម្ពុជា ដែលត្រូវទទួលបានការយកចិត្តទុកដាក់ ក្នុងការបញ្ចុះសពទៅតាមរបៀប នៃការចាត់ចែងមួយ តែត្រូវធ្វើទៅតាមវិធានរបស់សុខាភិបាល។

សម្ដេចបានបញ្ជាក់ថា នៅពេលធ្វើអនុក្រឹត្យក៏ត្រូវមានចែង មានបញ្ញត្តិដោយឡែក ដោយមានករណីពិសេសសម្រាប់បងប្អូនមូស្លីមនៅកម្ពុជា ក្នុងករណីដែលមានស្លាប់ដោយជំងឺកូវីដ-១៩។ តែសម្ដេចសង្ឃឹមថា បងប្អូនមូស្លីម នឹងមិនមានករណីស្លាប់ដោយជំងឺនោះទេ តែនេះជាវិធានការរបស់យើង។ ជាមួយគ្នានោះ សម្ដេចសង្ឃឹមថា ប្រជាពលរដ្ឋទាំងអស់ នឹងធ្វើការយល់លើបញ្ហានេះ។

សម្ដេចចតេជោ ហ៊ុន សែន បានអះអាងថា ច្បាស់ជានឹងមានសំណើពីជនជាតិចិន ជាមិនខាន ប៉ុន្តែករណីជនជាតិចិននៅមិនទាន់មានការបែងចែកនោះទេ ប៉ុន្តែនេះជាករណីពិសេសសម្រាប់ជំងឺកូវីដ ដែលយើងត្រូវខិតខំពន្យល់អំពីរឿងនេះ ដើម្បីជៀសវាងនូវការចោទឡើងអំពីសាសនានេះ សាសនានោះ ។

ជាមួយគ្នានោះដែរ សម្ដេចក៏បានស្នើឲ្យខាងគណៈចាងហ្វាងសាសនាមូស្លីមពិនិត្យជ្រើសរើសទីតាំងឲ្យបានត្រឹមត្រូវពីព្រោះមិនអាចត្រូវកប់ពាសវាលពាស កាលនោះទេ។

សូមបញ្ជាក់ថា កាលពីម្សិលមិញ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃនេះ បានសម្រេចចេញវិធានការជាបន្ទាន់មួយ ពាក់ព័ន្ធសពដែលបានស្លាប់ដោយជំងឺកូវីដ-១៩ ដោយក្នុងនោះសម្តេចបានយកវិធានការ “បូជា” ជំនួយឲ្យការកប់ បើទោះជានៅតាមបណ្តាប្រទេសខ្លះមិនមានវប្បធម៌បូជាក៏ដោយ ជាមួយគ្នានោះសម្ដេចក៏តម្រូវឲ្យអាជ្ញាធរខេត្តទាំងអស់រៀបចំទីតាំងប៉ាឆាឲ្យហើយផងដែរ៕

ដោយ ៖ កោះកែវ