លោក​ សូ ម៉ារ៉ា ត្រូវដំឡើងពីរដ្ឋលេខាធិការក្រសួងទេសចរណ៍ ទៅជារដ្ឋមន្ត្រីប្រតិភូអមនាយករដ្ឋមន្ត្រី

មន្ត្រីជាន់ខ្ពស់ក្រសួងទេសចរណ៍ លោក សូ ម៉ារ៉ា ត្រូវបានព្រះមហាក្សត្រនៃកម្ពុជា ចេញព្រះរាជក្រឹត្យតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី។​

យោងតាមព្រះរាជក្រឹត្យ ចុះថ្ងៃទី០១ ខែវិច្ឆិកា ឆ្នាំ២០២៤ ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានត្រាស់បង្គាប់តែងតាំងមុខតំណែងលោក សូ ម៉ារ៉ា ជារដ្ឋមន្ត្រីប្រតិភូអមនាយករដ្ឋមន្ត្រី តាមសំណើទូលថ្វាយរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

មុនការតែងតាំងនេះ លោក សូ ម៉ារ៉ា មានតំណែងជារដ្ឋលេខាធិការក្រសួងទេសចរណ៍ ជាច្រើនឆ្នាំមកហើយ។

គួរជម្រាបថា ដូចគ្នានឹងមុខតំណែងជារដ្ឋលេខាធិការ និងអនុរដ្ឋលេខាធិការដែរ គឺរដ្ឋមន្ត្រីប្រតិភូអមនាយករដ្ឋមន្ត្រីមិនមែនជាសមាជិករាជរដ្ឋាភិបាលទេ ហើយក៏មិនមែនជាភ្នាក់ងាររដ្ឋបាលអចិន្ត្រៃយ៍ដែរ។ រដ្ឋមន្ត្រីប្រតិភូអមនាយករដ្ឋមន្ត្រីត្រូវបានតែងតាំង ផ្លាស់ប្ដូរ និងបញ្ចប់មុខតំណែងដោយព្រះរាជក្រឹត្យ ហើយត្រូវបំពេញភារកិច្ចតាមការប្រគល់ពីនាយករដ្ឋមន្ត្រី៕