អភិបាលខេត្តយូណាន សន្យាផ្តល់អាហារូបករណ៍បន្ថែមដល់និស្សិតកម្ពុជា

នៅចំពោះមុខសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា, អភិបាលខេត្តយូណាន សន្យាផ្តល់អាហារូបករណ៍កាន់តែច្រើនដល់និស្សិតកម្ពុជា និងសន្យាជួយជំរុញទេសចរចិនទៅកម្ពុជាបន្ថែមទៀត។

ការសន្យារបស់អភិបាលខេត្តយូណាន បានធ្វើឡើងក្នុងជំនួបសម្តែងការគួរសម និងពិភាក្សាការងារ កាលពីល្ងាចថ្ងៃទី៥ ខែវិច្ឆិកា ឆ្នាំ២០២៤​ ជាមួយសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ក្នុងឱកាសដែលនៃការអញ្ជើញចូលរួមកិច្ចប្រជុំកំពូលរបស់បណ្ដាប្រទេសអនុតំបន់មេគង្គ នៅទីក្រុងគុនមិញ ខេត្តយូណាន ប្រទេសចិន។

លោក Wang Yubo អភិបាលខេត្តយូណាន បានស្វាគមន៍ចំពោះសម្ដេចធិបតី ដែលបានអញ្ជើញចូលរួមកិច្ចប្រជុំនៅទីក្រុងគុនមិញ នាពេលនេះ និងបានសម្ដែងក្ដីរីករាយ ដែលបានជួបសម្ដេចធិបតីម្ដងទៀត បន្ទាប់ពីលោកបានជួបជាមួយសម្ដេចធិបតី ក្នុងឱកាសនៃពិធីសម្ពោធដាក់ឱ្យប្រើប្រាស់ជាផ្លូវការអាកាសយានដ្ឋានអន្តរជាតិសៀមរាប-អង្គរ កាលពីចុងឆ្នាំ២០២៣។

អភិបាលខេត្តយូណាន ក៏បានជម្រាបជូនសម្ដេចធិបតី ហ៊ុន ម៉ាណែត អំពីការវិវឌ្ឍ និងសក្តានុពលរបស់ខេត្តយូណាន ផងដែរ ហើយលោកបានកត់សម្គាល់ថា កិច្ចសហប្រតិបត្តិការរវាងខេត្តយូណាន និងប្រទេសកម្ពុជា មានការរីកចម្រើន ជាពិសេសតាមរយៈការផ្លាស់ប្ដូរដំណើរទស្សនកិច្ច វិស័យពាណិជ្ជកម្ម និងការផ្លាស់ប្តូររវាងប្រជាជននិងប្រជាជន។

ជាការឆ្លើយតប សម្ដេចធិបតី ហ៊ុន ម៉ាណែត បានកោតសរសើរ និងវាយតម្លៃខ្ពស់ចំពោះការរីកចម្រើន និងការអភិវឌ្ឍរបស់ខេត្តយូណាន ដែលជាក្បាលម៉ាស៊ីនមួយសម្រាប់សេដ្ឋកិច្ចរបស់ប្រទេសចិន។ សម្តេចធិបតីបានវាយតម្លៃខ្ពស់អំពីភាពរីកចម្រើនជាលំដាប់នៃទំនាក់ទំនងកម្ពុជា-ចិន ស្របពេលប្រទេសចិន ដែលបានដើរតួនាទីយ៉ាងសំខាន់ក្នុងការចូលរួមចំណែកដល់ការអភិវឌ្ឍសង្គម-សេដ្ឋកិច្ចរបស់កម្ពុជា។

សម្តេចធិបតី នាយករដ្ឋមន្ត្រីកម្ពុជា ក៏បានគូសបញ្ជាក់អំពីសក្តានុពលក្នុងវិស័យជាច្រើនសម្រាប់កិច្ចសហប្រតិបត្តិការនាពេលអនាគតរវាងប្រទេសកម្ពុជា និងខេត្តយូណាន ដែលក្នុងនោះ សម្តេចធិបតីបានលើកទឹកចិត្តឱ្យក្រុមការងារកិច្ចសហប្រតិបត្តិការរវាងក្រសួងការបរទេសកម្ពុជា និងមន្ទីរការបរទេសនៃខេត្តយូណាន ជួបប្រជុំបានឆាប់ ដើម្បីពង្រឹង និងពង្រីកកិច្ចសហប្រតិបត្តិការបន្ថែមទៀត។

តាមរយៈជំនួបពេលនេះ សម្តេចធិបតី និងអភិបាលខេត្ត ក៏បានពិភាក្សាផ្លាស់ប្តូរយោបល់ពីការបន្តជំរុញកិច្ចសហប្រតិបត្តិការលើវិស័យសំខាន់ៗមួយចំនួន រួមមាន ពាណិជ្ជកម្ម ការវិនិយោគ ឧស្សហកម្ម ថាមពល ហេដ្ឋារចនាសម្ព័ន្ធ កសិកម្ម អប់រំ និងការបណ្ដុះបណ្ដាល ព្រមទាំងទេសចរណ៍ ជាដើម។ អភិបាលខេត្ត សន្យាពិនិត្យលទ្ធភាពផ្ដល់អាហារូបករណ៍កាន់តែច្រើនទៀតដល់និស្សិតកម្ពុជា ដើម្បីមកបន្តការសិក្សានៅខេត្តយូណាន និងបន្តខិតខំលើកទឹកចិត្តឱ្យប្រជាជនចិន ទៅធ្វើទេសចរណ៍នៅប្រទេសកម្ពុជា ដែលមានគោលដៅទេសចរណ៍សម្បូរបែប៕