ក្រសួងមហាផ្ទៃ និងខេត្តកោះកុង ទទួលបានមេដាយមាសពីការប្រកួតកីឡាទូកប្រពៃណីខ្នាតអន្តរជាតិ “ទូកនាគ”

ក្រសួងមហាផ្ទៃ និងខេត្តកោះកុង ទទួលបានមេដាយមាសពីការប្រកួតកីឡាទូកប្រពៃណីខ្នាតអន្តរជាតិ “ទូកនាគ” ក្នុងព្រឹតិ្តការណ៍កីឡាជាតិ លើកទី៤ ឆ្នាំ២០២៤ ដែលប្រព្រឹត្តទៅចាប់ពីថ្ងៃទី៥ ដល់ថ្ងៃទី៧ ខែវិច្ឆិកា ឆ្នាំ២០២៤ នៅទន្លេរវ៉ៃគោ ក្រុងស្វាយរៀង ខេត្តស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សរ សិទ្ធិ រដ្ឋលេខាធិការក្រសួងមហាផ្ទៃ និងជាអនុប្រធានទី២ តំណាងដ៏ខ្ពង់ខ្ពស់ លោក ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាទូកកានូ និងរ៉ូអ៊ីងកម្ពុជា ព្រមទាំងលោក ម៉ែន វិបុល ប្រធានក្រុមប្រឹក្សាខេត្ត និងលោក ប៉េង ពោធិ៍សា អភិបាលខេត្តស្វាយរៀង បានអញ្ជើញជាអធិបតី ក្នុងពិធីប្រកួតកីឡាទូកប្រពៃណីខ្នាតអន្តរជាតិ ”ទូកនាគ” ក្នុងព្រឹត្តិការណ៍កីឡាជាតិលើកទី៤ ស្ថិតនៅទំនប់តាណេង ច្រាំងតាបុល ទន្លេវ៉ៃគោ ក្រុងស្វាយរៀង នារសៀលថ្ងៃទី៧ ខែវិច្ឆិកា ឆ្នាំ២០១៤។

មានប្រសាសន៍ក្នុងឱកាសនោះ លោក សរ សិទ្ធិ បានថ្លែងការកោតសរសើរដល់រដ្ឋបាលខេត្តស្វាយរៀង និងក្រសួងអប់រំ យុវជន និងកីឡា ដែលបានសហការគ្នា រៀបចំធ្វើពិធីប្រណាំងទូកខ្នាតអន្តរជាតិ(ទូកនាគ) នៅតាមដងទន្លេវ៉ៃគោ ដែលជាទីតាំងដ៏ល្អប្រសើរសម្រាប់ការប្រារព្ធធ្វើពិធីបុណ្យអុំទូកម្ដងៗ។ លោករដ្ឋលេខាធិការ បានផ្តាំផ្ញើដល់ក្រុមកីឡាករអុំទូកទាំងអស់ ត្រូវបន្តខិតខំប្រឹងប្រែងហ្វឹកហាត់កីឡាអុំទូកឱ្យកាន់តែល្អប្រសើរបន្ថែមទៀតដើម្បីសុខភាព សាមគ្គីភាព មិត្តភាព និងសន្តិភាព។

ជាលទ្ធផល ការប្រកួតកីឡាទូកប្រពៃណីខ្នាតអន្តរជាតិ “ទូកនាគ” ក្នុងព្រឹតិ្តការណ៍កីឡាជាតិ លើកទី៤ ឆ្នាំ២០២៤ នេះខេត្តកោះកុងទទួលបានមេដាយមាស១ ក្រសួងមហាផ្ទៃទទួលបានមេដាយមាស១ ក្រសួងការពារជាតិទទួលបានមេដាយប្រាក់២ ខេត្តព្រៃវែងទទួលបានមេដាយសំរិទ្ធ១ ខេត្តកណ្តាលទទួលបានមេដាយសំរិទ្ធ១។

ក្នុងឱកាសនោះដែរ គណៈអធិបតីក៏បានធ្វើពិធីប្រគល់ទង់ ពានជ័យលាភី និងថវិកាមួយចំនួន ព្រមទាំងបំពាក់មេដាយដល់កីឡាអុំទូកពីលេខ១ ដល់លេខ៣ ដែលមកប្រកួតនៅខេត្តស្វាយរៀងនេះផងដែរ៕

ដោយ៖ ភក្តី