ស្ពានខ្ពស់ជាងគេនៅស្រុកខ្មែរ នឹង​​ដាក់ឱ្យប្រើប្រាស់សាក​ល្បងមុនចូលឆ្នាំខ្មែរខាងមុខនេះ

បើតាម​ប្រភព​ពី​មន្រ្តីក្រសួង​សាធារណការ​និង​ដឹកជញ្ជូន ស្ពានខ្ពង់ជាង​គេ​ដែលមានកម្ពស់ ៩០ ម៉ែត្រ តាម​បណ្តោយ​ផ្លូវ​ជាតិ​លេខ ១០ ដែល​កំពុង​ដំណើរការ​ស្ថាបនា ​គ្រោង​នឹង​ដាក់​ឲ្យ​ប្រើប្រាស់​នៅអំឡុង​មុន​ពិធីចូលឆ្នាំ​ខ្មែរ​ខាង​មុខ។

ស្ពានលេខ ២៨ នៃគម្រោងស្ថាបនាផ្លូវជាតិលេខ១០ គឺជាស្ពានខ្ពស់ជាងគេនៅស្រុកខ្មែរ ដែលមានកម្ពស់ ៩០ ម៉ែត្រ ប្រវែងសរុប ៥៣៧ ម៉ែត្រ នឹងដាក់ឱ្យប្រើប្រាស់សាក​ល្បង​នៅចុងខែមីនា ឆ្នាំ២០២៥ខាងមុខនេះ គឺមុនពិធីបុណ្យចូលឆ្នាំថ្មី ប្រពៃណីជាតិខ្មែរ។ នេះ​បើ​តាមលោក ផន រឹម មន្រ្តីក្រសួង​សាធារណការ​និង​ដឹកជញ្ជូនបាន​ឲ្យ​ដឹង​នៅ​មុននេះ​បន្តិច។

លោក ផន រឹម ក៏​រៀបរាប់​ពីទិដ្ឋភាព​ស្ពានខ្ពស់​ជា​ងគេ​នេះ ​នៅ​លើកំពូលស្ពានអាច​មើលឃើញផ្លូវអន្ទង់អាំងជាច្រើនកន្លែង, ព្រៃព្រឹក្សា​ខៀវស្រងាត់គ្រប់រដូវកាល, ពពកមីដេរដាស, អ័ព្ទបែកផ្សែងផុតកន្ទុយភ្នែក, សម្រស់ទឹកស្ទឹងដំណាក់ក្បូន, ជ្រលងស្ទឹង​ឫស្សីជ្រុំ, តំបន់វាលវែង និងអូរសោមជាដើម។

ក្រៅពីការដ្ឋាន​សាងសង់​ស្ពានខ្ពស់​ជាងគេ គម្រោងស្ថាបនាផ្លូវជាតិលេខ ១០ តភ្ជាប់ខេត្តចំនួន ៣ រួមមាន ខេត្តកោះកុង ពោធិ៍សាត់ និងខេត្តបាត់ដំបង ប្រវែងសរុប ១៩៨,៥១៨ គីឡូម៉ែត្រ និងទទឹង ៩ ម៉ែត្រ ​បច្ចុប្បន្ន​សម្រេចការសាងសង់បានជិត ៩០% នៃគម្រោងទាំងមូល។ នេះ​បើតា​មការ​​បញ្ជាក់ពីមន្រ្តី​ក្រសួងសាធារណការ​និង​ដឹកជញ្ជូន។

ផ្លូវជាតិលេខ ១០ ក្រាលកៅស៊ូពីរស្រទាប់ (DBST) ដំណើរការ​សាងសង់រយៈពេល ៦៦ ខែ និងបានចាប់ផ្ដើម​ស្ថាបនា​ពីថ្ងៃទី១៨ ខែធ្នូ ឆ្នាំ២០១៩ មក គ្រោង​នឹងបញ្ចប់នា​អំឡុងពាក់កណ្តាល​ឆ្នាំ២០២៥៕