ព័ត៌មានជាតិ

ថ្ងៃ ៧ សីហា នេះ ផ្លូវជាតិលេខ ១០ សម្ពោធដាក់ឲ្យប្រើប្រាស់ជាផ្លូវការ ក្រោមវត្តមាននាយករដ្ឋមន្រ្តីកម្ពុជា

បានផុស

១២ ខែ មុន

នៅ

ថ្ងៃព្រហស្បតិ៍ ១៧ កក្កដា ២០២៥

ដោយ

ថ្ងៃ ៧ សីហា នេះ ផ្លូវជាតិលេខ ១០ ដែលជាខ្សែផ្លូវជាតិដ៏សំខាន់តភ្ជាប់ពីខេត្តបាត់ដំបងបន្តរហូតដល់តំបន់សមុទ្រខេត្តកោះកុង នឹងសម្ពោធដាក់បើកឱ្យប្រើប្រាស់ជាផ្លូវការ ក្រោមវត្តមាននាយករដ្ឋមន្ត្រីនៃព្រះរាជាណាចក្រកម្ពុជា។

លោក យូ ស៊ុនឡុង រដ្ឋមន្ដ្រីប្រតិភូអមនាយករដ្ឋមន្ដ្រី និងជានាយករងខុទ្ទកាល័យសម្ដេចមហាបវរធិបតីនាយករដ្ឋមន្ដ្រី និងមន្រ្តីក្រសួងសាធាណការនិងដឹកជញ្ជូន កាលពីថ្ងៃ ១៦ កក្កដា បានដឹកនាំប្រតិភូចុះពិនិត្យទីតាំងត្រៀមរៀបចំពិធីសម្ពោធបើកឱ្យប្រើប្រាស់ជាផ្លូវការផ្លូវជាតិលេខ ១០ ក្នុងគោលបំណងធានាឱ្យដំណើរការកម្មវិធីប្រព្រឹត្តទៅបានយ៉ាងរលូនតាមផែនការដែលបានគ្រោងទុក។

ផ្លូវជាតិលេខ ១០ មានប្រវែងសរុប ១៩៨,៧១ គីឡូម៉ែត្រ សាងសង់ឡើងក្រោមហិរញ្ញប្បទានសម្បទានសហប្រតិបត្តិការពីរដ្ឋាភិបាលនៃសាធារណរដ្ឋប្រជាមានិតចិន និងក្របខណ្ឌថវិកាជាតិ ដែលគ្រោងនឹងសម្ពោធដាក់ឲ្យប្រើប្រាស់ជាផ្លូវការនៅថ្ងៃទី៧ ខែសីហា ឆ្នាំ២០២៥ ក្រោមវត្តមានសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ផ្លូវជាតិលេខ ១០ ជាផ្លូវជាតិថ្មីសាងសង់កាត់ខេត្តចំនួន ៣ គឺពីស្រុកសំឡូត (ខេត្តបាត់ដំបង) កាត់វាលវែង (ពោធិ៍សាត់) ដល់ក្រុងខេមរភូមិន្ទ (ខេត្តកោះកុង)។

ផ្លូវនេះបានចាប់ផ្ដើមបើកការដ្ឋានសាងសង់កាលពីថ្ងៃទី ១៨ ខែធ្នូ ឆ្នាំ២០១៩ ចេញពីចំណុចផ្លូវជាតិលេខ 57-7 ត្រង់ PK35+900 ស្ថិតក្នុងភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង ឆ្លងកាត់ឃុំប្រម៉ោយ ស្រុកវាលវែង ខេត្តពោធិ៍សាត់ បន្តបញ្ចប់រហូតដល់ផ្លូវជាតិលេខ ៤៨ (ចាស់) ត្រង់ PK1+700 ស្ថិតក្នុងសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។

ផ្លូវជាតិលេខ ១០ សាងសង់ជាប្រភេទផ្លូវ Grade III ក្រាលកៅស៊ូពីរស្រទាប់ (DBST)។ នៅលើកំណាត់ផ្លូវជាតិមួយខ្សែនេះ ក៏មានការសាងសង់ស្ពានកម្ពស់ជាង ៩០ ម៉ែត្រ។ គម្រោងសាងសង់មានរយៈពេល ៦៦ ខែ និងបានចាប់ផ្ដើមសាងសង់កាលពីថ្ងៃទី ១៨ ខែធ្នូ ឆ្នាំ២០១៩ និងបានបញ្ចប់នាអំឡុងខែមិថុនា ឆ្នាំ២០២៥។

តាមរយៈផ្លូវជាតិលេខ ១០ ប្រជាពលរដ្ឋនៅខេត្តបាត់ដំបង និងពោធិ៍សាត់ អាចធ្វើដំណើរមកលេងតំបន់សមុទ្រក្នុងខេត្តកោះកុងកាន់តែងាយស្រួល ខណៈផ្លូវជាតិថ្មីមួយខ្សែនេះក៏នឹងក្លាយជាផ្លូវសេដ្ឋកិច្ចដ៏មានសក្តានុពលរបស់កម្ពុជា ក្នុងការបង្កលក្ខណៈងាយស្រួលដល់ការដោះដូរពាណិជ្ជកម្ម ការវិនិយោគ និងការធ្វើដំណើរបានឆាប់រហ័សនិងចំណាយតិច៕