ក្រសួងការងារប្រកាសពីករណីឆបោកបុគ្គលិករដ្ឋបាល ឬតំណាងសហគ្រាសឲ្យប្រើមធ្យោបាយក្លែងក្លាយក្នុងការទូទាត់ថ្លៃសេវា

ក្រសួងការងារ និងបណ្តុះបណ្តាលវិជ្ជាជីវៈ បានជូនដំណឹងស្តីពីករណីឆបោកបុគ្គលិករដ្ឋបាល ឬតំណាង សហគ្រាស គ្រឹះស្ថាន ឱ្យប្រើមធ្យោបាយក្លែងក្លាយក្នុងការទូទាត់ថ្លៃសេវាសាធារណៈរបស់ក្រសួងដែលនាំឱ្យមានការខាតបង់ថវិកា
របស់និយោជក។

នៅក្នុងសេចក្តីជូនដំណឹងចុះកាលពីថ្ងៃទី២១វិច្ឆិកា ក្រសួងការងារ និងបណ្តុះបណ្តាលវិជ្ជាជីវៈ ឱ្យដឹងថា នាពេលលថ្មីៗនេះមានជនអនាមិកបានបង្កើតគណនីតេឡេក្រាម ក្លែងក្លាយឈ្មោះ “សម្រាប់និយោជក” (https://t.me/EmployerrChat)​ ដោយបានបន្ថែមអក្សរ “រ”មួយទៀត ក្នុងតំណភ្ជាប់ ដែលស្រដៀងនឹងឈ្មោះ ក្រុមតេឡេក្រាមផ្លូវការ “សម្រាប់និយោជក” (https://t.me/EmployerChat) របស់ក្រសួងការងារដែលមានសមាជិកចំនួនជាង ២៥ ០០០ នាក់ ជាមធ្យោបាយទាក់ទងជាមួយបុគ្គលិករដ្ឋបាល ឬតំណាងសហគ្រាស គ្រឹះស្ថាន
ដោយជនអនាមិកបានប្រឌិតព័ត៌មានថា ប្រព័ន្ធបង់ថ្លៃសេវាសាធារណៈរបស់ក្រសួងមានបញ្ហាមិនដំណើរការ
និងបង្គាប់ឱ្យបុគ្គលិករដ្ឋបាល ឬតំណាងសហគ្រាស គ្រឹះស្ថានបង់ប្រាក់ទៅកាន់លេខគណនីធនាគារ ឬ QR Code ផ្ទេរប្រាក់របស់ខ្លួនដែលនាំឱ្យមានការខាតបង់ថវិការបស់និយោជក។

ក្នុងន័យនេះ ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ជូនថា ក្រសួងមិនមានគោលការណ៍ឱ្យមន្ត្រី
ផ្សព្វផ្សាយលេខគណនីធនាគារផ្ទាល់ខ្លួនទៅបុគ្គលិករដ្ឋបាល ឬតំណាងសហគ្រាសគ្រឹះស្ថាន នោះទេ ក្រៅពីមធ្យោបាយបង់ប្រាក់តាមប្រព័ន្ធ LACMS (https://lacms.mlvt.gov.kh) ដែលមានការណែនាំស្រាប់ក្នុងប្រព័ន្ធអំពីការទូទាត់ថ្លៃសេវា។

ករណីនេះក្រសួង កំពុងសហការជាមួយអាជ្ញាធរមានសមត្ថកិច្ច ដើម្បីស្រាវជ្រាវ និងចាត់វិធានការតាមផ្លូវច្បាប់ ចំពោះជនប្រព្រឹត្តបទល្មើស។ ក្នុងករណីសង្ស័យ ឬសាកសួរព័ត៌មានបន្ថែម សូមទាក់ទងមកកាន់ប្រព័ន្ធ Hotline លេខ ១២៨៦” ឬ“១២៩៧” ឬ ក្រុមតេឡេក្រាមផ្លូវការ “សម្រាប់ និយោជក”(https://t.me/EmployerChat) ឬប្រអប់បណ្តឹងអនាមិករបស់ក្រសួង(https://feedback.mlvt.gov.kh/feedback)។ ក្រសួងការងារបានណែនាំឱ្យនិយោជកបង្កើនការប្រុងប្រយ័ត្នចំពោះករណីឆបោកនេះ៕

អត្ថបទ៖ សំអឿន