ព័ត៌មានជាតិ

រដ្ឋរំពឹងរកចំណូលបន្ថែមបាន ២៥០ លានដុល្លារក្នុងមួយឆ្នាំពីអចលនទ្រព្យ ក្រោយបញ្ចប់ចុះបញ្ជីដីធ្លីជូនពលរដ្ឋ

បានផុស

១ year មុន

នៅ

ថ្ងៃពុធ ២៧ វិច្ឆិកា ២០២៤

ដោយ

រដ្ឋាភិបាលរំពឹងថានឹងទាញបានចំណូលបន្ថែមប្រមាណ ២៥០ លានដុល្លារក្នុងមួយឆ្នាំពាក់ព័ន្ធវិស័យអចលនទ្រព្យក្រោយបញ្ចប់ដំណើរការចុះបញ្ជីដីធ្លីជូនប្រជាពលរដ្ឋ។ នេះបើតាមការគូសបញ្ជាក់ពីលោក សាយ សំអាល់ រដ្ឋមន្រ្តីក្រសួងរៀបចំដែនដី នគរោបនីយកម្មនិងសំណង់ ថ្លែងនៅក្នុងពិធីបិទសន្និបាតបូកសរុបលទ្ធផលការងារឆ្នាំ ២០២៤ និងលើកទិសដៅបន្តឆ្នាំ ២០២៥ កាលពីម្សិលមិញនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្រ្តីបានបញ្ជាក់ថា ក្រសួងបានកំណត់យកការចុះបញ្ជីដីបង្ហើយ ក្នុងគោលដៅកែសម្រួលភាពមិនច្បាស់លាស់នៃព្រំកាន់កាប់ និងកាត់បន្ថយវិវាទដីធ្លី ដើម្បីសម្រេចបាននូវការផ្តល់សុវត្ថិភាពផ្លូវច្បាប់ និងសន្តិភាពផ្លូវចិត្ត ក្នុងការកាន់កាប់អចលនទ្រព្យរបស់ប្រជាពលរដ្ឋ ឈានទៅកសាងសង្គមកម្ពុជាជាភូមិឋានក្សេមក្សាន្ត។

កន្លងមក ក្រសួងបានវាស់វែងនិងចុះបញ្ជីដីធ្លីចំនួនជាង ៧ លាន ៧ សែន ក្បាលដី និងបានចេញបណ្ណប្រមាណ ៧ លានបណ្ណ។ ក្រសួងបានវាស់វែងដីធ្លីបន្ថែមចំនួនប្រមាណ ៣ លានក្បាលដី និងចេញបណ្ណបានប្រមាណ ៥៩ម៉ឺនបណ្ណ។

ក្បាលដីនៅសេសសល់ប្រមាណ ១,៥ លានទៀត បើតាមលោករដ្ឋមន្រ្តីនឹងត្រូវវាស់វែងបញ្ចប់នាពេលខាងមុខ ដែលកិច្ចការនេះនឹងជួយឱ្យរដ្ឋអាចប្រមូលចំណូលពន្ធពាក់ព័ន្ធអចលនទ្រព្យប្រមាណ ២៥០ លានដុល្លារ ក្នុងមួយឆ្នាំ។

ខណៈដែលដំណើកការចុះវាស់វែងដីធ្លីជូនពលរដ្ឋ រដ្ឋាភិបាលបានដាក់គោលដៅឲ្យរួចរាល់នៅត្រឹមឆ្នាំ ២០២៩ លោក សាយ សំអាល់ បានអះអាងថា នឹងអនុញ្ញាតឱ្យរដ្ឋអាចរៀបចំប្លង់ព្រំប្រទល់រដ្ឋបាលនិងនាមភូមិសាស្ត្រ ប្លង់ហេដ្ឋារចនាសម្ព័ន្ធនិងទីធ្លាសាធារណៈ ប្លង់គោលប្រើប្រាស់ដី និងពង្រីកកំណើនជីវភាពប្រជាជនឱ្យកាន់តែប្រសើរឡើង៕