រដ្ឋមន្ត្រីការងារអរគុណរដ្ឋាភិបាលកូរ៉េជួយថែទាំពលករខ្មែរបានយ៉ាងល្អ

លោក ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈបានថ្លែងអំណរគុណចំពោះរដ្ឋាភិបាលនិងក្រសួងមុខរបរនិងការងារសាធារណរដ្ឋកូរ៉េដែលបានជួយមើលថែពលករខ្មែរធ្វើការនៅកូរ៉េមានភាពកក់ក្តីមានសេរីភាពពេញលេញក្នុងការចូលរួមឬបំពេញការងារស្របតាមច្បាប់របស់សាធារណរដ្ឋកូរ៉េ។

ថ្លែងក្នុងពិធីដាក់ឱ្យដំណើរការមជ្ឈមណ្ឌលបណ្តុះបណ្តាលសុវត្តិភាពសុខភាពការងារកាលពីចុងសប្តាហ៍កន្លងទៅថ្មីៗនេះ លោករដ្ឋមន្ត្រីបានបន្តទៀតថា ការជួយផ្តល់ឱកាសការងារដល់ប្រជាពលរដ្ឋកម្ពុជានេះ បានធ្វើឱ្យយុវជនដែលជាកម្លាំង​ពលកម្មកម្ពុជាមិនត្រឹមតែទទួលបានប្រាក់ចំណូលខ្ពស់ប៉ុណ្ណោះទេ ថែមទាំងទទួលបានជំនាញ ភាសា វប្បធម៌ និងបច្ចេកទេសនៅកន្លែងធ្វើការ និងបានពាំនាំនូវជំនាញទាំងនេះមករកស៊ី និងវិនិយោគពេលត្រឡប់មកកម្ពុជាវិញដោយខ្លួនឯង ចូលរួមលើកកម្ពស់សេដ្ឋកិច្ចគ្រួសារក៏ដូចជាសេដ្ឋកិច្ចជាតិកាន់តែរីកចម្រើនបន្ថែមទៀត។

លោករដ្ឋមន្ត្រីបានបន្ថែមថា ក្រុមគ្រួសារដែលមានបងប្អូន និងកូនចៅទៅធ្វើការនៅសាធារណកូរ៉េមានវឌ្ឍនភាព និងជោគជ័យផងដែរ។ លោករដ្ឋមន្ត្រីបានថ្លែងអំណរគុណចំពោះរដ្ឋាភិបាល និងក្រសួងមុខរបរ និងការងារសាធារណរដ្ឋកូរ៉េដែលបានជួយមើលថែពលករខ្មែរធ្វើការនៅកូរ៉េមានភាពកក់ក្តីមានសេរីភាពពេញលេញក្នុងការចូលរួម ឬបំពេញការងារស្របតាមច្បាប់របស់សាធារណរដ្ឋកូរ៉េ។ មិនតែប៉ុណ្ណោះកម្ពុជាក៏មានស្ត្រីរៀបការជាមួយជនជាតិកូរ៉េផងដែរដែលជាស្ពានមួយក្នុងការធ្វើឱ្យទំនាក់ទំនងកម្រិតប្រជាជន និងប្រជាជនកាន់តែរឹងមាំ និងទទួលបានផ្លែផ្កា។

លោក ហេង សួរ បានបញ្ជាក់ថា រាជរដ្ឋាភិបាលអាណត្តិទី៧នេះ ផ្តោតទៅលើកំណើនការងារ សមធម៌ ស្ថេរភាព និងចីរភាព ហើយកត្តាធនធានមនុស្សបានក្លាយទៅជាចលនាស្នូលដែលរដ្ឋាភិបាលកម្ពុជាមានកាតព្វត្រូវតែវិនិយោគតាំងពីទារកនៅក្នុងផ្ទៃរហូតដល់កើត និងសិក្សាពេលធ្វើការរហូតដល់ចូលនិវត្តន៍ដែលនេះជាវដ្តមួយនៃការវិនិយោគរបស់រដ្ឋាភិបាលដោយក្រសួងបណ្តុះបណ្តាលវិជ្ជាជីវៈ បានមានភារៈទទួលបន្ទុកចាប់ពីពេលដែលកម្លាំងពលកម្មចាប់ផ្តើមចូលរៀននៅកម្រិតបណ្តុះបណ្តាលវិជ្ជាជីវៈ និងក្នុងពេលដែលកម្លាំងនេះចូលប្រឡូក្នុងការងារ។

លោកបានបន្ថែមទៀតថា «ដូច្នេះយើងមានដំណាក់កាលពីរត្រូវយកចិត្តទុកដាក់ទី១ តើត្រូវផ្តល់ជំនាញអ្វីខ្លះដល់កម្លាំងពលកម្មរបស់យើង ទី២ត្រូវចូលរួមចំណែកធ្វើមិញបង្កើតការងារដល់កម្លាំងពលកម្មរបស់យើង។ ការមានកំណើនសេដ្ឋកិច្ចជារឿងមួយដែលយើងចង់បានការបង្កើតការងារជារឿងមួយដែលចង់បានដែរ ប៉ុន្តែអ្វីដែលជាមហិច្ឆតារបស់រដ្ឋា
ភិបាលអាណត្តិទី៧ គឺមិនត្រឹមតែចង់បានកំណើននិងការងារនោះទេប៉ុន្តែជាការងារសមរម្យជាការងារដែលអាចធានាបាននូវសុវត្តិភាព មានការធានារ៉ាប់រងសង្គមមានសេចក្តីថ្លៃថ្នូរមានការគោរពគ្នាទៅវិញទៅមករវាងនិយោជកនិងកម្មករនិយោជិត»។

គួរបញ្ជាក់ថា កម្ពុជាមានពលករកំពុងធ្វើការនៅក្រៅប្រទេសចំនួន ១ ៣៥៦ ៦១៦នាក់ ស្រីចំនួន ៥៥២ ៨៥១ នាក់ ក្នុងនោះនៅសាធារណរដ្ឋកូរ៉េ មានចំនួន ៥០៩៧០ នាក់ ស្រី ១២ ៥៣៨នាក់ ទទួលបានប្រាក់ខែ ១៥០០ ដុល្លារ ក្នុង ១ ខែ៕

អត្ថបទ៖ សំអឿន