ឆ្នាំ២០២៥ វិស័យឧស្សាហកម្ម និងសេវាកម្មរបស់កម្ពុជានៅតែមានភាពធន់ខ្លាំងជួយបង្កើតឱកាសការងារកាន់តែច្រើន

លោក ហេង សួរ រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវ: បានអះអាងថា នៅឆ្នាំ២០២៥ខាងមុខនេះ វិស័យឧស្សាហកម្ម និងវិស័យសេវាកម្មរបស់កម្ពុជានៅតែមានភាពធន់ខ្លាំងដែលនឹងជួយបង្កើតឱកាសការងារជូនប្រជាពលរដ្ឋបានកាន់តែច្រើនចូលរួមលើកស្ទួយសេដ្ឋកិច្ចជាតិកាន់តែប្រសើរថែមទៀត។

ថ្លែងបើកសន្និសីទថ្នាក់ជាតិស្តីពី សេដ្ឋកិច្ចការងារឆ្នាំ២០២៤ ក្រោមប្រធានបទ ការងើបឡើងវិញនៃសេដ្ឋកិច្ច និងការងារ
និងដំណើរឆ្ពោះទៅកាន់ការចាកចេញពីក្រុមប្រទេសអភិវឌ្ឍន៍តិចតួចកាលពីថ្ងៃទី១១ធ្នូ លោករដ្ឋមន្ត្រីបានបន្តថា តាមការសិក្សារបស់ក្រសួងការងារ និងបណ្តុះបណ្តាលវិជ្ជាជីវៈ ដែលបានធ្វើឡើងនៅឆមាសទី២ ឆ្នាំ២០២៤នេះ បានបញ្ជាក់ថាកំណើនចំនួនការងារសម្រាប់វិស័យឧស្សាហកម្មត្រូវបានព្យាករថា មានកំណើន១,៩% ក្នុងឆ្នាំ២០២៤ និង ២,៦% ឆ្នាំ២០២៥។ ចំណែក វិស័យសេវាកម្មត្រូវបានព្យាករថា មានកំណើនការងារ៣,១% នៅឆ្នាំ២០២៤ និង ៤,៦% នៅ ឆ្នាំ២០២៥។ រីឯចំនួនការងារក្នុងវិស័យកសិកម្មវិញ ត្រូវបានព្យាករថា នឹងថយចុះក្នុងអត្រា ៣,៥% ក្នុង ឆ្នាំ២០២៤ និង ៣,៦% ក្នុងឆ្នាំ២០២៥ដែលនេះជាសញ្ញាវិជ្ជមានក្នុងដំណើរឆ្ពោះទៅរកបរិបទ ឧស្សាហូបនីយកម្មកម្ពុជា។

លោករដ្ឋមន្ត្រីបានបន្តទៀតថា ពីរទសវត្សចុងក្រោយនេះ រចនាសម្ព័ន្ធសេដ្ឋកិច្ចកម្ពុជាមានការប្រែប្រួលយ៉ាងខ្លាំងក្នុងនោះតួនាទីនៃវិស័យទាំងបីជួយកំណើនជីឌីភីមានការប្រែប្រួលនៅចន្លោះឆ្នាំ២០០០ ដល់ឆ្នាំ២០២៣ឃើញថា វិស័យឧស្សាហកម្មមានកំណើន២២% នៅឆ្នាំ២០០០កើនឡើងដល់៤២%នៅឆ្នាំ២០២៣។ ផ្ទុយទៅវិញវិស័យកសិកម្មធ្លាប់ផ្តល់កំណើន៣៦%នៅឆ្នាំ២០០០បានធ្លាក់នៅសល់១៥%នៅឆ្នាំ២០២៣និងសេវាកម្មនៅរក្សាកំណើន៣៨%នៅឆ្នាំ២០០០និងបន្ត៣៧%នៅ២០២៣។

លោករដ្ឋមន្ត្រីបានបន្ថែមថា រចនាសម្ព័ន្ធសេដ្ឋកិច្ចមានការប្រែប្រួលទីផ្សារការងារនៅក្នុងវិស័យទាំងបីក៏មានការប្រែប្រួលជាបន្តបន្ទាប់ដែរ។ ជាក់ស្តែងចន្លោះឆ្នាំ២០០០ ដល់ឆ្នាំ២០២៣នេះឃើញថា វិស័យកសិកម្មបានស្រូបកម្លាំងពលកម្មយ៉ាងច្រើនដោយក្នុងឆ្នាំ២០០០ កម្លាំងពលកម្មមានតែ៨%ប៉ុណ្ណោះធ្វើការទៅលើវិស័យឧស្សាហកម្ម តែឥឡូវមានកំណើនជាង៣០% នៃកម្លាំងពលកម្មសរុប។ ចំណែកវិស័យកសិកម្មនៅឆ្នាំ២០០០ ស្រូបកម្លាំងពលកម្មជាង៧៤%តែឥឡូវ​សល់៣១%ប៉ុណ្ណោះ និងវិស័យសេវាកម្មនៅឆ្នាំ២០០០មាន២០% ធ្វើការលើវិស័យនេះតែឥឡូវដល់៤០%។

លោករដ្ឋមន្ត្រីបានឱ្យដឹងថា អង្គសន្និសីទនេះរៀបចំឡើងមានសារៈសំខាន់ និងស្របតាមផែនការយុទ្ធសាស្ត្ររបស់ក្រសួងដើម្បីផ្លាស់ប្តូរបទពិសោធន៍លើបញ្ហាប្រឈមនានាដើម្បីស្វែងរកដំណោះស្រាយការស្តារសេដ្ឋកិច្ចនិងការងារនិងត្រៀមខ្លួនធ្វើយ៉ាងណាផ្តល់ការងារកាន់តែប្រសើរក្នុងខណៈពេលដែលកម្ពុជាត្រៀមខ្លួនចាកចេញពីប្រទេសអភិវឌ្ឍតិចតួចនៅឆ្នាំ២០២៩ខាងមុខនេះ៕

អត្ថបទ៖ សំអឿន