ពលរដ្ឋខេត្តព្រះវិហារជាង២០០នាក់ ស្នើទៅថ្នាក់ដឹកនាំសុំការអនុញ្ញាតឱ្យពួកគេធ្វើរ៉ែមាសលក្ខណៈគ្រួសារ

ប្រជាពលរដ្ឋជាង២០០នាក់ បានជួបជុំគ្នានៅមុខសាលាបឋមសិក្សារំដេង ស្ថិតនៅភូមិត្រពាំងទន្ទឹម ឃុំរមទម ស្រុករវៀង ខេត្តព្រះវិហារ កាលពីព្រឹកថ្ងៃទី១៥ ខែធ្នូ ឆ្នាំ២០២៤ ដើម្បីស្នើសុំការអន្តរាគមន៍ពី ក្រសួងរ៉ែ និងថាមពល ជាពិសេសសុំស្នើដល់ប្រមុខរាជរដ្ឋាភិបាលកម្ពុជា ដើម្បីសុំការអនុញ្ញាតឱ្យ ពួកគាត់ធ្វើរ៉ែមាសលក្ខណៈគ្រួសារ ក្រោយពួកគាត់ប្រឈមការបាត់បង់ប្រាក់ចំណូលចិញ្ចឹមជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពលរដ្ឋលើកឡើងថា ការជួបជុំគ្នានេះមិនមានចេតនាណាមួយបង្ករការលំបាកដល់អាជ្ញាធរនោះទេ ពោល គឺគាត់សុំត្រឹមការអនុញ្ញាតពីក្រសួងរ៉ែ និងថាមពល ជួយបង្កភាពងាយស្រួលសម្រាប់ពួកគាត់អាចប្រកបរបរជីករ៉ែតាមបែបគ្រួសារបាន។ ក្រុមអ្នកភូមិបានទទូចស្នើសុំដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មេត្តាជួយពិនិត្យលទ្ធភាពដល់ប្រជាពលរដ្ឋដែលជាកូនជាចៅរបស់សម្តេច ដើម្បីអាចប្រកបរបររកស៊ីចិញ្ចឹមជីវិតដោយរលូន ព្រោះអ្នកភូមិទាំងនេះនឹងជួបការខ្វះខាតក្នុងជីវភាពខ្លាំងណាស់។ អ្នកស្រុកបន្តថា ម៉្យាងវិញទៀត ប្រជាពលរដ្ឋរស់នៅតំបន់នេះ គឺពឹងផ្អែកទាំងស្រុងលើមុខរបរធ្វើអាជីវកម្មរ៉ែមាស ជាចម្បងសម្រាប់ដោះស្រាយជីវភាពប្រចាំថ្ងៃ ព្រោះថាដីតំបន់នោះជាតំបន់មិនអាចធ្វើកសិកម្មបាន។

ជាមួយគ្នានេះ លោក ហោ ប៊ុនហួរ អភិបាលស្រុករវៀង បានឲ្យដឹងថា ថ្ងៃនេះមានប្រជាពលរដ្ឋរស់នៅភូមិភ្នំដែក ភូមិអូរទ្រលោក ភូមិទួលរវៀង ភូមិត្រពាំងទន្ទឹម បានប្រមូលផ្តុំតវ៉ា នៅសាលាបឋមសិក្សារំដេង នៅចំណុចរំដេង ស្ថិតនៅភូមិត្រពាំងទន្ទឹម ឃុំរមទម ជាង២០០នាក់ ដែលពឹងអាស្រ័យលើអាជីវកម្មជីករ៉ែមាសតាមបែបប្រពៃណីតាំងពីយូរលង់ណាស់មកហើយ។

លោកបន្តថា បន្ទាប់ពីមានការស្នើសុំរបស់ពលរដ្ឋជាច្រើនគ្រួសារនៅភ្នំលុងនិងភ្នំដែក លោកបានរាយការណ៍ទៅរដ្ឋបាលខេត្ត ហើយរដ្ឋបាលខេត្តបានស្នើសុំទៅក្រសួងរ៉ែនិងថាមពល ហើយខាងក្រសួងបានឆ្លើយតបមកវិញថានឹងចុះមកធ្វើវេទិកាសាធារណៈដើម្បីរកដំណោះស្រាយជាមួយពលរដ្ឋនៅថ្ងៃអង្គារ៍ទី ១៧ខែធ្នូឆ្នាំ២០២៤ខាងមុខនេះ។ លោកបន្តថាកន្លងទៅពលរដ្ឋអាចធ្វើជាលក្ខណៈបូមឈីត រឺបាញ់ឈីតដោយប្រើគោយន្តបូបទឹក ធម្មតាមិនអាចប្រើម៉ាស៊ីនស្វ័យប្រវត្តិបាននោះទេ។ ករណីយកគ្រឿងចក្រអាអ៊ិច មកកាយជារណ្ដៅឬមួយក៏វាយអាងគីមី គឺខាងក្រសួងនិងអាជ្ញធរមិនអនុញ្ញាតនោះទេ។

ប្រជាពលរដ្ឋមានសង្ឃឹមថា អាជ្ញាធរខេត្តព្រះវិហារ ក្រសួងរ៉ែ និងថាមពល នឹងជួយរកវិធីណាមួយជួយសម្រេចទៅតាមលទ្ធភាព លើការអនុញ្ញាតជូនប្រជាពលរដ្ឋដែលកំពុងខ្វះខាតនេះផង។

ពាក់ព័ន្ធនឹងករណីនេះ អភិបាលខេត្តព្រះវិហារ លោក គីម រិទ្ធី ក៏បានស្នើទៅក្រសួងរ៉ែនិងថាមពលដើម្បីជួយរកដំណោះស្រាយជូនពលរដ្ឋដែរ៕

ដោយ៖ជុន កុសល