ក្រសួងកិច្ចការនារី បើកវគ្គបណ្តុះបណ្តាល ស្តីពីកិច្ចការស្ត្រី ដើម្បីបង្កើនចំណេះដឹង និងពង្រឹងសមត្ថភាពដល់មន្រ្តី

ក្រសួងកិច្ចការនារី បានបើកវគ្គបណ្តុះបណ្តាលស្តីពី កិច្ចការស្រ្តី និងអាស៊ាន និងអនុស្សារណៈនៃការយោគយល់គ្នា រវាងក្រសួងកិច្ចការនារី ជាមួយដៃគូអភិវឌ្ឍន៍ ដើម្បីបង្កើនចំណេះដឹង និងពង្រឹងសមត្ថភាពដល់មន្រ្តី ដែលធ្វើឡើងនៅសាលប្រជុំមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តកំពង់ចាម ថ្ងៃទី១៦ ខែធ្នូ ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនេះធ្វើឡើងក្រោមអធិបតីភាព លោកស្រី ជា ណាលីន អនុរដ្ឋលេខាធិការក្រសួងកិច្ចការនារី និងដោយមានសិក្ខាកាមអញ្ជើញចូលរួម មកពីខេត្តចំនួន៧ គឺ ខេត្តកំពង់ចាម ត្បូងឃ្មុំ ក្រចេះ កំពង់ធំ កណ្តាល ព្រៃវែង និងខេត្តស្វាយរៀង ព្រមទាំងនាយកដ្ឋានជំនាញនៃក្រសួងកិច្ចការនារីផងដែរ ។

តាមប្រសាសន៍ លោកស្រី ជា ណាលីន រដ្ឋលេខាធិការក្រសួងកិច្ចការនារី បានឱ្យដឹងថា វគ្គបណ្តុះបណ្តាលនេះ មានគោលបំណងដើម្បីបង្កើនចំណេះដឹង ព្រមទាំងពង្រឹងសមត្ថភាពដល់មន្រ្តីក្រសួង និងមន្ទីរកិច្ចការនារី ទាក់ទងនឹងគោលគំនិតសំខាន់ៗនៃកិច្ចការស្រ្តីក្នុងតំបន់អាស៊ាន និងនីតិវិធី ចុះអនុស្សារណៈនៃការយោគយល់គ្នា រវាងក្រសួងកិច្ចការនារី និងដៃគូជាតិ អន្តរជាតិ ។

លោកស្រីបានបន្តថា ការរៀបចំអនុស្សារណៈនៃការយោគយល់គ្នា មានគោលបំណង សហការជាមួយដៃគូជាតិ អន្តរជាតិ ក្នុងការអនុវត្តគម្រោងនានា ដែលរួមចំណែកលើការលើកកម្ពស់សមាសភាពយេនឌ័រ ការទប់ស្កាត់ ឬលុបបំបាត់អំពើហឹង្សាលើស្រ្តី ការលើកកម្ពស់សិទ្ធស្រ្តី បង្កើនភាពអង់អាចដល់ស្រ្តី ការលើកកម្ពស់សុខភាពរបស់ស្រ្តី ការអប់រំរបស់ស្រ្តី និងការរួមចំណែកសម្រេចបាននូវសមិទ្ធផលបន្ថែមទៀតនៃផែនការយុទ្ធសាស្រ្តនារីរតនៈទី៦ និងសូចនាករសំខាន់ៗស្តីពីសមាសភាពយេនឌ័រនៅក្នុងគោលដៅអភិវឌ្ឍន៍ប្រកបដោយចីរភាពនៅក្នុងប្រទែសកម្ពុជា។

លោកស្រី បានគូសបញ្ជាក់ថា ក្រសួងកិច្ចការនារី បានរៀបចំកិច្ចប្រជុំតាមដានអនុស្សារណៈ រវាងក្រសួងកិច្ចការនារី ជាមួយដៃគូជាតិ អន្តរជាតិ ដើម្បីធានាថា ការចុះអនុស្សារណៈនេះ ពិតជាបានផ្តល់ផលយ៉ាងពិតប្រាកដដល់ក្រុមគោលដៅដែលជាស្រ្តី និងក្មេងស្រី។ ជាមួយគ្នានេះ លោកស្រី ក៏បានផ្តាំផ្ញើដល់សិក្ខាកាម ត្រូវយកចិត្តទុកដាក់ទៅលើបទបង្ហាញនីមួយៗ របស់គ្រូឧទ្ទេស ដើម្បីឱ្យវគ្គបណ្តុះបណ្តាលនេះ សម្រេចបានជោគជ័យតាមការរំពឹងទុក៕