អគ្គនាយកដ្ឋានអត្តសញ្ញាណកម្ម ផ្អាកផ្ដល់សេវាមួយថ្ងៃពេញ នៅថ្ងៃទី២៦ ខែធ្នូ

អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានប្រកាសផ្អាកផ្តល់សេវាអត្តសញ្ញាណកម្មចំនួន ១ថ្ងៃ គឺថ្ងៃព្រហស្បតិ៍ ទី២៦ ខែធ្នូ ឆ្នាំ២០២៤ ដើម្បីរៀបចំសន្និបាតប្រចាំឆ្នាំរបស់ខ្លួន។

យោងតាមសេចក្តីជូនដំណឹង អគ្គនាយកដ្ឋានអត្តសញ្ញាណកម្ម នឹងរៀបចំសន្និបាតត្រួតពិនិត្យលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ រយៈពេលមួយថ្ងៃពេញ គឺនៅថ្ងៃព្រហស្បតិ៍ ទី២៦ ខែធ្នូ ឆ្នាំ២០២៤។ ដូច្នេះ ការផ្តល់សេវា នឹងត្រូវផ្អាកមួយថ្ងៃសម្រាប់ប្រជាពលរដ្ឋដែលមកទទួលសេវាអត្តសញ្ញាណកម្ម នៅទីតាំងចំនួនបី។

ទីតាំងដែលត្រូវផ្អាក គឺ១) សេវាកែតម្រូវទិន្នន័យ និងមោឃភាពបញ្ជីអត្រានុកូលដ្ឋាន នៅនាយកដ្ឋានអត្រានុកូលដ្ឋាន ក្នុងបរិវេណអគ្គនាយកដ្ឋានអត្តសញ្ញាណកម្ម ដែលមានទីតាំងនៅភូមិបឹងឈូក សង្កាត់និរោធ ខណ្ឌច្បារអំពៅ ២) សេវាលិខិតឆ្លងដែន នៅនាយកដ្ឋានលិខិតឆ្លងដែន ដែលមានទីតាំងនៅភូមិតាង៉ូវ សង្កាត់និរោធ ខណ្ឌច្បារអំពៅ និង៣) សេវាអត្តសញ្ញាណប័ណ្ណសញ្ជាតិខ្មែរ នៅនាយកដ្ឋានអត្តសញ្ញាណប័ណ្ណសញ្ជាតិខ្មែរ ដែលមាន ទីតាំងនៅភូមិតាង៉ូវ សង្កាត់និរោធ ខណ្ឌច្បារអំពៅ រាជធានីភ្នំពេញ។

ក្រៅពីទីតាំងទាំង៣ខាងលើ បណ្តាសាខា និងស្នាក់ការផ្តល់សេវាអត្តសញ្ញាណកម្មទាំងអស់នៅបន្ត បើកដំណើរការផ្តល់សេវាជាធម្មតា។ នេះជាការបញ្ជាក់របស់អគ្គនាយកដ្ឋានអត្តសញ្ញាណកម្ម៕