ព័ត៌មានជាតិ

ឡើងដឹកនាំជាអភិបាលខេត្តព្រះសីហនុបន្តពីលោក គួច ចំរើន លោក ម៉ាង ស៊ីណេត ប្រាប់ពីផែនការក្នុងការដឹកនាំអភិវឌ្ឍខេត្តព្រះសីហនុ

បានផុស

២ years មុន

នៅ

ថ្ងៃសុក្រ ២៧ ធ្នូ ២០២៤

ដោយ

លោក ម៉ាង ស៊ីណេត ដែលទទួលបានការតែងតាំងជាអភិបាលខេត្តព្រះសីហនុបន្តពីលោក គួច ចំរើន បានបង្ហាញឆន្ទៈនិងចក្ខុវិស័យក្នុងការបន្តអភិវឌ្ឍខេត្តព្រះសីហនុឈានឆ្ពោះទៅសម្រេចក្លាយជាមជ្ឈមណ្ឌលសេដ្ឋកិច្ច និងវិនិយោគធំជាងគេក្នុងប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្តល់បទសម្ភាសន៍ពិសេសមួយដល់ក្រុមអ្នកសារព័ត៌មាន ក្នុងដំណើរទស្សនកិច្ចទ្រង់ទ្រាយធំនៅខេត្តព្រះសីហនុកាលពីសប្តាហ៍មុននេះ លោក ម៉ាង ស៊ីណេត អភិបាលខេត្តព្រះសីហនុបានថ្លែងថា ក្នុងនាមជាថ្នាក់ដឹកនាំខេត្ត ទិសដៅខាងមុខលោកចង់សម្រេចមហិច្ឆតាអភិវឌ្ឍខេត្តព្រះសីហនុឈាន ឆ្ពោះទៅរកភាពរីកចម្រើនបន្តទៀត ប្រែក្លាយជាមជ្ឈមណ្ឌលអភិវឌ្ឍឧស្សាហកម្មបៃតង សេដ្ឋកិច្ច ពាណិជ្ជកម្ម ឌីជីថល ជាតំបន់សេដ្ឋកិច្ចពិសេសពហុបំណង ជាតំបន់សេដ្ឋកិច្ចបៃតង និងតំបន់ទេសចរណ៍ដែលមានការអភិវឌ្ឍនិងអភិរក្សប្រកបដោយនិរន្តរភាពល្អ។

បន្ថែមពីនេះ គឺការធ្វើឲ្យខេត្តជាប់ឆ្នេរសមុទ្រនេះ ទទួលបានការទុកចិត្តនិងទទួលស្គាល់ពីវិនិយោគិនជាតិនិងអន្តរជាតិ លើភាពងាយស្រួលក្នុងការវិនិយោគ តាមរយៈការខិតខំសម្រួលលើការវិនិយោគគ្រប់បែបយ៉ាង។

ខណៈដែលខេត្តព្រះសីហនុមានកំពង់ផែទឹកជ្រៅសម្រាប់ការដោះដូរពាណិជ្ជកម្មរវាងប្រទេសកម្ពុជានិងច្រកដឹកជញ្ជូនទៅកាន់ពិភពលោក មានអាកាសយានដ្ឋានអន្តរជាតិ មានទាំងប្រព័ន្ធផ្លូវគមនាគមន៍ផ្សេងៗមានផ្លូវដែក ផ្លូវល្បឿនលឿន និងផ្លូវជាតិ លោកម៉ាង ស៊ីណេត ក៏ចង់ប្រែក្លាយខេត្តព្រះសីហនុជាមជ្ឈមណ្ឌលដឹកជញ្ជូនដ៏ទំនើប ដោយផ្សារភ្ជាប់ទៅកាន់ពិភពលោកកាន់តែទូលំទូលាយ៕