លោក នេត្រ ភក្ត្រា៖ ឆ្នាំ២០២៤ មានការកើនឡើងព័ត៌មានក្លែងក្លាយជាង៤០០ករណី ដែលជាក្តីបារម្ភលើវិស័យទេសចរណ៍កម្ពុជា

លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានលើកឡើងថា នៅឆ្នាំ២០២៤ មានការកើនឡើងនូវព័ត៌មានមិនពិតជាង៤០០ករណី បើធៀបនឹងឆ្នាំ២០២៣ ដែលទាំងនេះធ្វើឱ្យមានភាពចលាចល ព្រួយបារម្ភ ចំពោះការផ្សាយព័ត៌មានមិនពិតដែលធ្វើឱ្យប៉ះពាល់ដល់វិស័យទេសចរណ៍កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក លើកឡើងបែបនេះ នៅព្រឹកថ្ងៃទី១៥ ខែមករា ឆ្នាំ២០២៥ ក្នុងពិធីផ្សព្វផ្សាយ «ការលើកកម្ពស់វិស័យទេសចរណ៍ និងការប្រឆាំងព័ត៌មានក្លែងក្លាយ» ដែលសហការរៀបចំដោយក្រសួងព័ត៌មាន និងក្រសួងទេសចរណ៍ នៅទីស្តីការក្រសួងព័ត៌មាន។

លោករដ្ឋមន្ត្រីបានបន្តថា នៅក្នុងឆ្នាំ២០២៣ មានព័ត៌មានក្លែងក្លាយចំនួន ៣,២០៨ព័ត៌មានដែលត្រូវបានផ្សព្វផ្សាយ ក្នុងនោះ ក្នុង១ខែ មានព័ត៌មានក្លែងក្លាយត្រូវបានផ្សាយ ២០០ ទៅ ៣០០ព័ត៌មានក្នុងមួយខែឡើយ។ ជាមួយគ្នានេះ ក្នុងឆ្នាំ២០២៤ មានព័ត៌មានក្លែងក្លាយចំនួន ៣,៦៥១ព័ត៌មាន ដែលមានការកើនឡើងចំនួនជាង ៤០០ករណី បើប្រៀបនឹងឆ្នាំ២០២៣ ដែលផ្សាយមិនពិតពាក់ព័ន្ធនឹងបញ្ហានយោបាយ សន្តិសុខជាតិ សេដ្ឋកិច្ច និងទេសចរណ៍ជាដើម។ ទាំងនេះធ្វើឱ្យប៉ះពាល់ដល់វិស័យទេសចរណ៍កម្ពុជា ដោយលោកបញ្ជាក់ថា នៅពេលមានព័ត៌មានមិនពិតច្រើននៅកម្ពុជា នឹងធ្វើឱ្យទេសចរអន្តរជាតិ ដែលមានបំណងទស្សនាកម្ពុជា មានក្តីកង្វល់ និងទទួលបានព័ត៌មានដែលមិនពិតប្រាកដ។

ពាក់ព័ន្ធនឹងព័ត៌មានក្លែងក្លាយ រដ្ឋមន្ត្រីក្រសួងព័ត៌មាន បានលើកឡើង៣ប្រភេទ គឺព័ត៌មានបំភ្លៃ ព័ត៌មានក្លែងក្លាយ និងព័ត៌មានភាន់ច្រឡំ។ ព័ត៌មានបំភ្លៃ និងក្លែងក្លាយ គឺកើតចេញពីការធ្វើក្នុងគោលបំណងមិនល្អ ពីក្រុម MMO ដែលចង់បានការ like និង share លើបណ្តាញសង្គម ដែល២ចំណុចនេះ គឺជារឿងគួរឱ្យព្រួយបារម្ភបំផុត។ ចំពោះព័ត៌មានភាន់ច្រឡំ គឺកើតចេញពីកំហុសអចេតនា។

ជុំវិញនឹងការកើនឡើងនូវព័ត៌មានមិនពិត រដ្ឋមន្ត្រីក្រសួងព័ត៌មានថា ក្រសួងបានសហការជាមួយក្រសួងមហាផ្ទៃ ក្រសួងប្រៃសណីយ៍ និងទូរគមនាគមន៍ រួមជាមួយភាគីពាក់ព័ន្ធផ្សេងទៀត ក្នុងការបង្ក្រាប និងទប់ស្កាត់នូវព័ត៌មានក្លែងក្លាយនៅកម្ពុជា។

លោក នេត្រ ភក្ត្រា ក៏បានលើកឡើងថា អ្នកសារព័ត៌មាន អ្នកបង្កើតមាតិកា ពិតជាដើរតួនាទីសំខាន់ណាស់ ក្នុងការផ្សព្វផ្សាយព័ត៌មានពិត លើវិស័យទេសចរណ៍កម្ពុជា ដើម្បីអាចទាក់ទាញភ្ញៀវទេសចរកាន់តែច្រើនមកទស្សនាកម្ពុជា និងជួយឱ្យកំណើនសេដ្ឋកិច្ចជាតិកាន់តែរីកចម្រើនទៀត។ ដូចនេះ លោកសំណូមពរឱ្យអ្នកបង្កើតមាតិកា ធ្វើមាតិកាទេសចរណ៍ឱ្យបានច្រើន ហើយអ្នកសារព័ត៌មាន និងក្រុម MMO ក៏ត្រូវប្រកាន់ការជំហរបស់ខ្លួន និងផ្សាយតែព័ត៌មានពិតប្រាកដ៕

ដោយ៖ អុន ស្រីមាន