ស្នងការ​នគរបាលរាជធានី គ្រោង​បង្កើត​ក្រុម​សមត្ថកិច្ច​ចល័ត​ដើម្បី​តាមពិនិត្យ​អនុវត្តលើអ្នកដំណើរទាំងឡាយណា ដែល​សមត្ថកិច្ចមានការសង្ស័យថាមានជាតិស្រវឹង

ភ្នំពេញ ៖ លោក​ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានឱ្យដឹងនៅរសៀលថ្ងៃទី ២០ ខែ មករា ២០២៥ នេះ លោក នឹងបង្កើតក្រុមសមត្ថកិច្ចចល័ត​ដើម្បីតាមពិនិត្យអនុវត្តលើអ្នកដំណើរទាំងឡាយណា ដែលសមត្ថកិច្ចមានការសង្ស័យថា មានជាតិស្រវឹង ទោះអ្នកទាំងនោះមិនធ្វើដំណើរឆ្លងកាត់ គោលដៅអនុវត្តក៏ដោយ។

លោក​ស្នងការក៏បានឱ្យដឹងទៀតថា លោកនឹងធ្វើផែនការមួយនេះ គោរពជូនលោកអភិបាលរាជធានីភ្នំពេញ ,គោរព​ជូន​លោក​នាយឧត្តមសេនីយ៍ អគ្គស្នងការនគរបាលជាតិ និងគោរពស្នើសុំ លោក​អភិសន្តិបណ្ឌិត ស សុខា ដើម្បីបង្កើតក្រុមល្បាតចល័តចរាចរណ៍។លោក​ស្នងការ បានបន្តឱ្យដឹងថា ការបង្កើតក្រុមល្បាតចល័តនេះ គឺមិននៅនឹងគោលដៅអនុវត្តទេ ហើយយើងមិនមែនចេះតែជិះនោះទេ គឺយើង ឈរនៅគោលដៅណាមួយ ចាំមើលស្ថានភាពអ្នក​បើកបរ​រថយន្ត ឬ ម៉ូតូ ក្នុងស្ថានភាពស្រវឹង បើកវ៉ាជែងក្រុម​ល្បាត​នឹង​បើ​តាម មើលថាគាត់មានស្ថានភាពស្រវឹងហើយ គឺ​ក្រុមល្បាតទៅបញ្ឈប់អ្នកបើកបរនោះភ្លាមតែម្តង ទោះអ្នកទាំងនោះមិនធ្វើដំណើរឆ្លងកាត់ គោលដៅអនុវត្តក៏ដោយ។

លោកស្នងការក៏បានបញ្ជាក់ថា នេះជាផែនការ លោកបានសរសេររួចហើយ នៅតែធ្វើរបាយការណ៍គោពស្នើសុំគោលការអនុវត្ត។

ជាមួយគ្នានោះ នៅព្រឹកថ្ងៃទី២០ មករា ២០២៥ លោកក៏បានប្រជុំរៀបចំប្រគល់ភារកិច្ចទៅឱ្យលោកស្នងការរង ពាក់ព័ន្ធដែលចុះជួយតាមខណ្ឌ ជាពិសេសលោកស្នងការ បានចង្អុលបង្ហាញទៅស្នងការរង និងនាយការិយាល័យជំនាញចរាចរណ៍ ឱ្យសិក្សាជូនយោបល់ ទី១ .ប្រែប្រួលប្តូរម៉ោងត្រួតពិនិត្យជាតិស្រវឹងទី២ បង្កើនថ្ងៃត្រួតពិនិត្យជាតិស្រវឹង ហើយផ្លាស់ប្តូរពេលវេលា និងគោលដៅភូមិសាស្ត្រ ។

ចុងក្រោយ លោកស្នងការបានឱ្យដឹងថា យ៉ាងយូរថ្ងៃទី២១ ខែមករា នេះនឹងមានការប្រែប្រួល ព្រោះលោកឱ្យក្រុមការងារបញ្ចប់ការសិក្សានៅថ្ងៃទី២០ មករា នេះ៕

អត្ថបទ ៖ សំណាង