ព័ត៌មានជាតិ

ឆ្នាំ២០២៥ កម្ពុជា រំពឹងមានកំណើនខ្ពស់លើការនាំចេញគ្រាប់ស្វាយចន្ទីកែច្នៃ

បានផុស

១ year មុន

នៅ

ថ្ងៃអង្គារ ២៨ មករា ២០២៥

ដោយ

នៅក្នុងឆ្នាំ២០២៥ នេះ សមាគមស្វាយចន្ទីកម្ពុជា រំពឹងថា ការនាំចេញគ្រាប់ស្វាយចន្ទីកែច្នៃរបស់កម្ពុជា ទៅកាន់ទីផ្សារក្រៅប្រទេសនឹងមានការកើនឡើងជាងឆ្នាំកន្លងទៅ ស្របពេលដែលតម្រូវការកំពុងតែកើនឡើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុយ កុកធាន អនុប្រធានសមាគមស្វាយចន្ទីកម្ពុជា បានមានប្រសាសន៍ថា នៅក្នុងឆ្នាំ២០២៥នេះ ទាក់ទងនឹងការនាំចេញស្វាយចន្ទី អ្វីដែលសមាគមរំពឹងនោះ ប្រសិនបើអាកាសធាតុមិនមានការប្រែប្រួលធ្ងន់ធ្ងរទេ ការនាំចេញគ្រាប់ស្វាយចន្ទីមិនទាន់កែច្នៃ មានន័យថាវត្ថុធាតុដើម នឹងមានការកើនឡើងខ្ពស់។

លោកបានថ្លែងបន្តទៀតថា កំណើននៃការនាំចេញគ្រាប់ដែលហាលរួច ដោយពីមុនយើងនាំចេញគ្រាប់ស្វាយចន្ទីសើមមានន័យថា ជាគ្រាប់ដែលមិនទាន់ហាលរួច ប៉ុន្តែនៅក្នុងឆ្នាំ២០២៥ នេះ យើងរំពឹងថា ការនាំចេញគ្រាប់ស្វាយចន្ទីដែលហាលរួចនឹងមានការកើនឡើងខ្ពស់ ព្រោះទីផ្សារដែលកម្ពុជាបាននាំចេញកន្លងមក ដូចជាប្រទេសចិនជាដើមមិនអាចនាំចេញគ្រាប់សើមបានទេ គឺនាំចេញគ្រាប់ដែលហាលរួច។

លោកថា៖ «យើងក៏សម្លឹងឃើញថា ភាគច្រើនឈ្មួញដែលចូលមកពីប្រទេសវៀតណាម ក៏គេមិនចង់នាំចេញទៅលើប្រភេទគ្រាប់ស្វាយចន្ទីសើមដូចគ្នាដែរ ព្រោះពិបាកនៅក្នុងការយកទៅហាលបន្ត ដូច្នេះគេចង់ទិញតែប្រភេទគ្រាប់ស្ងួត ដែលបានហាលរួចប៉ុណ្ណោះ»។

លោក បានអះអាងថា ទាក់ទងទៅនិងគ្រាប់ដែលបានកែច្នៃហើយ គឺនឹងមានការកើនឡើងជាងឆ្នាំ២០២៤ ព្រោះយើងសង្កេតឃើញថា មានអ្នកទិញជាច្រើនដែលមកពីអឺរ៉ុបបានបញ្ជាទិញមកតាមរោងចក្រមួយចំនួនរបស់កម្ពុជា ហើយមានក្រុមហ៊ុនមួយចំនួនមកពីប្រទេសវៀតណាមក៏បញ្ជាទិញគ្រាប់ពាក់កណ្ដាលសម្រេចដែរពីកម្ពុជា។

មិនតែប៉ុណ្ណោះ នៅចុងខែកុម្ភៈ ឆ្នាំ២០២៥ នេះ មានក្រុមហ៊ុនធំមួយនឹងចូលខ្លួនមកចរចាបញ្ជាទិញគ្រាប់ស្វាយចន្ទីពីកម្ពុជា ទាំងគ្រាប់ឆៅ និងគ្រាប់ពាក់កណ្តាលសម្រេច ដូច្នេះហើយ ឆ្នាំ២០២៥ ជាឆ្នាំដែលផ្លាស់ប្ដូរ គឺផ្លាស់ប្ដូរពីការនាំចេញគ្រាប់ឆៅសើមទាំងស្រុង មកជាការនាំចេញច្រើន គឺ គ្រាប់ស្វាយចន្ទីស្ងួត និងគ្រាប់ដែលបានកែច្នៃរួចរាល់។

សូមបញ្ជាក់ថា នៅក្នុងឆ្នាំ ២០២៤ កម្ពុជាសម្រេចបានការប្រមូលទិន្នផលគ្រាប់ស្វាយចន្ទីចំនួន ៨៥ ម៉ឺនតោន ក្នុងនោះនាំចេញគ្រាប់ឆៅបានចំនួន ៨១ ម៉ឺន ៥ ពាន់តោន កើនឡើង ២១ ភាគរយ ធៀបនឹងឆ្នាំ ២០២៣ គិតជាទឹកប្រាក់ ១,១៥០ ពាន់លានដុល្លារ កើន ២៦,១៥ ភាគរយ។ ក្នុងនោះនាំចេញទៅវៀតណាម មានចំនួន ៧៩ ម៉ឺន ៥ ពាន់តោន៕