WTO ​ចាប់អារម្មណ៍​នាំចេញ​គ្រាប់ស្វាយចន្ទី​កម្ពុជា ​ទៅ​កាន់​ទីផ្សារអន្តរជាតិ​

អង្គការពាណិជ្ជកម្មពិភពលោក (​WTO) ​ចាប់អារម្មណ៍ក្នុងការសាកល្បងជំរុញការនាំ​ចេញស្វាយ​ចន្ទី​កម្ពុជា ​ទៅកាន់ទីផ្សារអន្តរជាតិ ​ដែលនឹងផ្ដល់ក្ដីសង្ឃឹមសម្រាប់គ្រាប់ស្វាយចន្ទីកម្ពុជា​។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​លោក ស៊ុយ កុកធាន ​អនុប្រធានសមាគមស្វាយចន្ទីកម្ពុជា ​មានប្រសាសន៍នៅថ្ងៃអង្គារនេះថា អង្គការពាណិជ្ជ​កម្ម​ពិភព​លោក (​WTO)​ គ្រោងចុះសិក្សាផ្ទាល់ ​នៅខេត្តកំពង់ធំ ​នៅខែក្រោយ ដើម្បីស្វែងយល់ពីវិស័យស្វាយចន្ទីកម្ពុជា ​ឱ្យបានលម្អិត​។

​លោកបញ្ជាក់ថា ​ដំបូងតំណាង ​WTO ​ចាប់ផ្ដើមគម្រោងសាកល្បង ហើយបើដំណើរការល្អ ​គេនឹង​ធ្វើ​ជា​បន្តបន្ទាប់ ដោយផ្តោត​ទៅលើគ្រាប់ស្វាយ​ចន្ទីសម្គាល់ភូមិសាស្ត្រ (GI) និងចន្ទី Organic ​ដែល​ដាំ​ដុះដោយកសិករ។​

​លោក ស៊ុយ កុកធាន យល់ឃើញថា៖ «ប្រសិនបើ WTO លូកដៃចូលកាន់តែជ្រៅ ​ទីផ្សារ​គ្រាប់ស្វាយចន្ទីកែច្នៃរបស់កម្ពុជា​ ​នឹង​មានសង្ឃឹម​អាចនាំចេញទៅ​លើទីផ្សារ​អន្តរជាតិ​ មានការទទួល​ស្គាល់​ច្រើន​ពីទីផ្សារ​អន្តរជាតិ ​ពីព្រោះក្រុមនេះ ​គេធ្វើតម្រូវតាមស្ដង់ដាសម្រាប់ប្រទេសជឿនលឿន»​។

​យោងតាម​សមាគមស្វាយចន្ទី​កម្ពុជា នៅក្នុងឆ្នាំ ២០២៥ កម្ពុជារកចំណូលបាន ​១,៥ ​ពាន់លាន​ដុល្លារ ​ពីការនាំចេញគ្រាប់​ស្វាយ​ចន្ទីឆៅ ១ លានតោន​ កើនឡើង ២៧% ធៀបនឹងឆ្នាំ ២០២៤៕​

អត្ថបទ៖ ឡេង ដេត​

​