នាយករដ្ឋមន្ត្រីជំរុញវិស័យទេសចរណ៍ឱ្យយកចិត្តទុកដាក់ចាប់ពីរឿងតូចៗឡើង

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានជំរុញឱ្យក្រសួងទេសចរណ៍ និងអ្នកពាក់ព័ន្ធទាំងអស់ត្រូវ​យកចិត្តទុកដាក់លើបញ្ហាតូចៗឡើង ព្រោះវាជារឿងសំខាន់សម្រាប់អាយុជីវិតនៃវិស័យទេសចរណ៍កម្ពុជា។

ថ្លែងក្នុងពិធីបិទសន្និបាតការងារក្រសួងទេសចរណ៍រសៀលថ្ងៃទី២៧ ខែកុម្ភៈ សម្ដេចធិបតី ហ៊ុន ម៉ាណែត បានថ្លែងថា ភាពងាយស្រួលនៃការធ្វើទេសចរណ៍ជាមូលហេតុនៃការទាកទាញនិងរីកចំរើននៃវិស័យនេះក្នុងប្រទេស ហើយរដ្ឋាភិបាលយកចិត្តទុកដាក់ជាខ្លាំងចាប់តាំងពីរឿងតូចៗនេះឡើង។

សម្ដេចថា៖ «វិស័យទេសចរណ៍គឺជាវិស័យបដិសណ្ឋារកិច្ចដែលមទាមទារអាតិចៗហ្នឹងសំខាន់! អ្នកទៅដើរលេងគេមិនចង់ឱ្យរំខាន់រឿងតិចៗហ្នឹងទេ ខុសពីអ្នកប្រជុំការងារធំដែលគេអាចរំលងរឿងតិចៗបាន តែអ្នកមកលេងទេសចរណ៍គេចង់ថាតាំងពីពេលគេកក់សំបុត្រ សុំវីសា រហូតឡើងកប៉ាល់ហោះ កុំឱ្យគេមកដល់ព្រលានគេប្រាប់ថា Check in អត់បានទេ។ ចប់បាត់!»។

សម្ដេចបានលើកឡើងថារដ្ឋាភិបាលបានកែសម្រួលច្រើនហើយមកដល់ពេលនេះលើចំណុចតូចៗទាំងនេះទាំងដកការកម្រិតនៃការស្នាក់នៅ ការថតនៅក្នុងប្រាសាទអង្គរ ការសម្រួលការទិដ្ឋាការដល់អ្នកទេសចរជាដើម។ សម្ដេចក៏បញ្ជាឱ្យសម្រួលការងារដល់ក្រុមការងារថតរឿងរបស់ក្រុមហ៊ុនអន្តរជាតិមកកម្ពុជាផងដែរ៕

អត្ថបទដោយ ហ៊ុន សិរីវឌ្ឍន៍