ព្រះតេជគុណ គូ សុភាព បិណ្ឌបាតរៀបចំតម្កល់ព្រះពុទ្ធរូបនៅអាកាសយានដ្ឋានថ្មី ដើម្បីសិរីសួស្ដី និងឱ្យសមជាប្រទេសកាន់ព្រះពុទ្ធសាសនា

តាមរយៈទំព័រហ្វេសប៊ុក ព្រះភិក្ខុវជិរប្បញ្ញោ គូ សុភាព នាថ្ងៃទី២៨ ខែកុម្ភៈ នេះ បានបិណ្ឌបាតរៀបចំតម្កល់ព្រះពុទ្ធរូប១អង្គ នៅក្នុងអាកាសយានដ្ឋានអន្តរជាតិតេជោ ដើម្បីផ្ដល់សិរីសួស្ដី និងឱ្យសមជាប្រទេសដែលកំណត់យកព្រះពុទ្ធសាសនាជាសាសនារបស់រដ្ឋ។ ព្រះតេជគុណ គូ សុភាព បិណ្ឌបាតដូច្នេះ ស្របពេលដែលអាកាសយានដ្ឋានអន្តរជាតិតេជោ ដែលមានទីតាំងនៅក្នុងភូមិសាស្ត្រនៅក្រុងតាខ្មៅ ខេត្តកណ្តាល និងខេត្តតាកែវ សម្រេចការសាងសង់បានជាង៩៤% គ្រោងនឹងដាក់ឱ្យដំណើរនៅខែកក្កដា ឆ្នាំ២០២៥ នេះ។

ព្រះភិក្ខុវជិរប្បញ្ញោ គូ សុភាព សរសេរលើបណ្ដាញសង្គមហ្វេសប៊ុកផ្លូវការដូច្នេះ៖« អាត្មាសូមចម្រើនពរ សុំបិណ្ឌបាតសម្ដេចតេជោ សម្ដេចបវរធិបតី មេត្តាពិចារណារៀបចំតម្កល់ព្រះពុទ្ធរូប ១អង្គ នៅក្នុងព្រលានយន្ដហោះថ្មី ដើម្បីជាសិរីសួស្ដី និងសក្ដិសមជាប្រទេសដែលយកព្រះពុទ្ធសាសនាជាសាសនារបស់រដ្ឋ »។

តាមសេចក្ដីរាយការណ៍បានឱ្យដឹងថា អាកាសយានដ្ឋានអន្តរជាតិតេជោ នឹងដាក់នូវរូបចម្លាក់មួយចំនួនង្កប់ដោយ«រចនាបទខ្មែរ» ដូចជារូបចម្លាក់អប្សរា និងព្រហ្មមុខបួនជាដើម។

អាកាសយានដ្ឋានអន្តរជាតិតេជោ សាងសង់លើផ្ទៃដីសរុប២,៦០០ហិកតា ស្ថិតនៅភាគខាងត្បូងរាជធានី មានចម្ងាយ១៩គីឡូម៉ែត្រ។ អាកាសយានដ្ឋាននេះ  ត្រូវបានចាត់ថ្នាក់ ជាអាកាសយានដ្ឋាន 4F  ដែលមានសមត្ថភាពទទួលការហោះហើរពីឆ្ងាយឆ្លងទ្វីប អនុញ្ញាតប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបានដោយសុវត្ថិភាព។

គួរឱ្យដឹងដែរថា ជុំវិញការដាក់រូបសំណាកនៅអាកាសយានដ្ឋាននេះ នៅអាកាសយានដ្ឋានអន្តរជាតិសៀមរាប អង្គរ បានដាក់តម្កល់នូវរូបសំណាកព្រហ្មមុខ៤ ពណ៌មាសឆ្អិនឆ្អៅ កម្ពស់ ៧ម៉ែត្រ និងទម្ងន់ ៦តោន ដែលសាងសង់តាមរចនាបថខ្មែរបុរាណ។

គួរឱ្យបន្តិចថា សម្រាប់អាកាសយានដ្ឋានអន្តរជាតិតេជោ, លោក​ឧកញ៉ា ឆារស៍ វ៉ាន់ នាយកគ្រប់គ្រង​នៃក្រុមហ៊ុន ខេមបូឌា អ៊ែរផត អ៊ិនវេសមិន (CAIC) បានបង្ហើបពីផែនការ​ក្នុង​ការ​នាំ​​យក​គំរូ​ភូមិ​វប្បធម៌​នៅ​ខេត្ត​សៀមរាប មក​រៀបចំ​នៅ​ក្នុង​អាកាសយានដ្ឋានលំដាប់​អន្តរជាតិ​មួយនេះ។  តាមលោក​ឧកញ៉ា ឆារស៍ វ៉ាន់  ការនាំយក​​គំរូ​ភូមិ​វប្បធម៌នៅ​ខេត្ត​សៀមរាប​មក​រៀបចំ​​នៅ​ទីតាំង​អាកាសយានដ្ឋាន​អន្តរជាតិ​តេជោ គឺ​ក្នុង​គោលដៅ​ដើម្បី​ចូលរួម​ផ្សព្វផ្សាយ​ និង​លើក​តម្លៃ​នៃ​វប្បធម៌​ដែល​ជា​អត្តសញ្ញាណ​ជាតិ៕

ដោយ៖ ង៉ិល ណារ៉ាត់