ព័ត៌មានជាតិ

២០២៤ ក្រសួងអប់រំ ផ្តល់ការអប់រំក្រៅប្រព័ន្ធតាមគ្រប់កម្មវិធីដល់អ្នកសិក្សា ជាង ៥ ម៉ឺននាក់

បានផុស

៤ ខែ មុន

នៅ

ថ្ងៃចន្ទ ៣ មីនា ២០២៥

ដោយ

នៅឆ្នាំ ២០២៤ ក្រសួងអប់រំ យុវជន និងកីឡា បានផ្តល់ការអប់រំក្រៅប្រព័ន្ធតាមគ្រប់កម្មវិធីដល់អ្នកសិក្សាប្រមាណជាង ៥ ម៉ឺននាក់ ដើម្បីរួមចំណែកអភិវឌ្ឍន៍ធនធានមនុស្សក្នុងការសិក្សាពេញមួយជីវិត និងលើកកម្ពស់សេដ្ឋកិច្ចជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់ក្រសួងអប់រំ យុវជន និងកីឡា បានឱ្យដឹងថា ឆ្នាំ ២០២៤ អ្នកសិក្សាដែលបានទទួលការអប់រំក្រៅប្រព័ន្ធតាមគ្រប់កម្មវិធីសរុប ៥០.០៥៣ នាក់ ស្រី ៥២.៤% ក្នុងនោះ អ្នកចូលរៀនកម្មវិធីអក្ខរកម្មអប់រំក្រៅប្រព័ន្ធ ១៧.៥៧៥ នាក់ ស្រី ៦២.៣% អ្នកសិក្សាជំនាញមុខរបរងាយៗ សរុប ១២.១២២ នាក់ ស្រី ៦៣.៥% អ្នកសិក្សា កម្មវិធីសមមូលបឋមសិក្សា និងមធ្យមសិក្សាសរុប ៨.១៥៧ នាក់ ស្រី ៣៩.៩% និងអ្នកសិក្សាបំពេញវិជ្ជាបឋមភូមិសរុប ៨១២ នាក់ ស្រី ២៦.៧% និងមធ្យមសិក្សាទុតិយភូមិបំពេញវិជ្ជាសរុប ២.១០៧ នាក់ ស្រី ៣០.៧%។

របាយការណ៍ដដែលបានបន្តថា ក្នុងឆ្នាំសិក្សា ២០២៤-២០២៥ ចំនួនសាលារៀននៅទូទាំងប្រទេសសរុប ១៩.៥៩១ ក្នុងនោះសាលារៀនសាធារណៈមាន ១៣.៩៤៨ សាលា សាលារៀនឯកជន ២.២៩៥ សាលា និងមត្តេយ្យសិក្សាសហគមន៍ ៣.៣៤៨ កន្លែង។ គ្រឹះស្ថានឧត្តមសិក្សាទូទាំងប្រទេសមាន ១៩៤ កន្លែង ក្នុងនោះគ្រឹះស្ថានឧត្តមសិក្សាសាធារណៈ ៧៩ និងគ្រឹះស្ថានឧត្តមសិក្សាឯកជន ១១៥។ សិស្ស និងនិស្សិតសរុប ៤.១៧១.៩៦២ នាក់ ក្នុងនោះ កុមារតូចទទួលបានសេវាអប់រំគ្រប់រូបភាព ៤២៥.៥៣៩ នាក់ ស្រី ៤៩.៨% និងអត្រាចូលរៀនកុមារអាយុ ៥ ឆ្នាំ កើនឡើងពី ៦៥.៤% នៅឆ្នាំសិក្សា ២០២៣-២០២៤ ដល់ ៧១.៤% នៅឆ្នាំសិក្សា ២០២៤-២០២៥។ សិស្សបឋមសិក្សាសរុប ២.២៦១.២១៦ នាក់ ស្រី ៤៨% និងអត្រាពិត នៃការសិក្សាកើនឡើងពី ៩៩.៦% នៅឆ្នាំសិក្សា ២០២៣-២០២៤ ដល់ ១០២.៣% នៅឆ្នាំសិក្សា ២០២៤-២០២៥។ សិស្សមធ្យមសិក្សាបឋមភូមិសរុប ៧១២.២៩៨ នាក់ ស្រី ៥២.១% និងអត្រារួម នៃការសិក្សាកើនឡើងពី ៦៥.៥% នៅឆ្នាំសិក្សា ២០២៣-២០២៤ ដល់ ៧៥.២% នៅឆ្នាំសិក្សា ២០២៤-២០២៥។ សិស្សមធ្យមសិក្សាទុតិយភូមិសរុប ៤៥៦.៨០៤ នាក់ ស្រី ៥៥.៦% និងអត្រារួម នៃការសិក្សាកើនឡើងពី ៣៩.៣% នៅឆ្នាំសិក្សា ២០២៣-២០២៤ ដល់ ៤៤.៣% ឆ្នាំសិក្សា ២០២៤-២០២៥ ក្នុងនោះ សិស្សមធ្យមសិក្សាចំណេះទូទៅនិងបច្ចេកទេស ៣.៨៤០ នាក់ ស្រី ៣៣.៦%។ និស្សិតឧត្តមសិក្សាសរុប ៣១៦.១០៥ នាក់ ស្រី ៥២.៥% និងអត្រារួម នៃការសិក្សា (អាយុ ១៨-២២ ឆ្នាំ) កើនឡើងពី ១៧.៩% នៅឆ្នាំសិក្សា ២០២២-២០២៣ ដល់ ១៩.០៨% នៅឆ្នាំសិក្សា ២០២៣-២០២៤៕

អត្ថបទ ៖ សំអឿន