ព័ត៌មានជាតិ

ឆ្នាំ ២០២៤ តំបន់សេដ្ឋកិច្ចពិសេសក្រុងព្រះសីហនុ សម្រេចទំហំទឹកប្រាក់នាំចេញ-នាំចូលប្រមាណ ៣ ៦៧២ លានដុល្លារ

បានផុស

១ year មុន

នៅ

ថ្ងៃព្រហស្បតិ៍ ៦ មីនា ២០២៥

ដោយ

តំបន់សេដ្ឋកិច្ចពិសេសក្រុងព្រះសីហនុនៅក្នុងឆ្នាំ ២០២៤ នេះ សម្រេចបានទំហំទឹកប្រាក់នៃការនាំចេញ-នាំចូលប្រមាណ ៣ ៦៧២ លានដុល្លារអាមេរិក។ នេះបើតាមក្រុមការងារជំរុញការវិនិយោគក្នុងខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហគ្រាសចំនួន ១៩០ មកពីប្រទេសចិន អឺរ៉ុប អាមេរិក កំំពុងដំណើរការផលិតផលិតផលដូចជា សម្ភារៈសំណង់, សម្ភារៈប្រើប្រាស់ក្នុងផ្ទះ, គ្រឿងបន្លាស់, សំបកកង់រថយន្ត, បន្ទះសូឡា, សម្ភារៈពេទ្យ, កាបូប, វ៉ាលី, សម្លៀកបំពាក់, និង ស្បែកជើង ជាដើម។

មានទីតាំងស្ថិតនៅសង្កាត់បិតត្រាំង តំបន់សេដ្ឋកិច្ចពិសេសក្រុងព្រះសីហនុបច្ចុប្បន្នជាតំបន់ឧស្សាហកម្មចម្រុះ ដែលមានកម្មករ-និយោជិតប្រមាណជិត ៣០ ០០០ នាក់ កំពុងបម្រើការងារ ដែលមានប្រាក់ចំណូលប្រចាំខែប្រមាណ ៣០០ ដុល្លារអាមេរិក។

តំបន់សេដ្ឋកិច្ចពិសេសក្រុងព្រះសីហនុ មានគោលដៅប្រែក្លាយទៅជាឧទ្យានឧស្សាហកម្មអន្តរជាតិមួយ ដែលមានសហគ្រាសសរុប ៣០០ និង អាចបង្កើតការងារបានចំនួន ៨០ ០០០ ដល់ ១០០ ០០០ នាក់។

ក្រុមហ៊ុនវិនិយោគតំបន់សេដ្ឋកិច្ចពិសេសក្រុងព្រះសីហនុ ក៏គ្រោងអភិវឌ្ឍបន្ថែមលើផ្ទៃដីដែលមិនទាន់អភិវឌ្ឍជាង ៥០០ ហិកតា លើផ្ទៃដីសរុប ១ ១១៣ ហិកតា ដូចជា ការសាងសង់ហេដ្ឋារចនាសម្ព័ន្ធ និង ប្រព័ន្ធលូ ទឹក និង អគ្គិសនី ជាដើម ដើម្បីបម្រើដល់ការទាក់ទាញវិនិយោគថ្មីៗទៀត ខណៈដែលរាជរដ្ឋាភិបាលមានគោលនយោបាយលើកទឹកចិត្តពិសេស និង ដាក់ចេញយន្តការជំរុញវិនិយោគនានា។

គិតត្រឹមដំណាច់ឆ្នាំ ២០២៤ នៅកម្ពុជាមានតំបន់សេដ្ឋកិច្ចពិសេសកំពុងដំណើរការមានចំនួន ៣០ ស្ថិតនៅក្នុង ១២ រាជធានី-ខេត្ត កើនឡើង ៤ តំបន់ បើធៀបនឹងឆ្នាំ ២០២៣។ នេះបើតាមរបាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

តំបន់សេដ្ឋកិច្ចពិសេសកំពុងដំណើរការទាំំង ៣០ មាន នៅខេត្តស្វាយរៀងចំនួន ៩ ខេត្តព្រះសីហនុចំនួន ៥ ខេត្តកណ្ដាលចំនួន ៣ ខេត្តកោះកុងចំនួន ៣ ខេត្តបន្ទាយមានជ័យចំនួន ៣ ខេត្តកំពង់ចាមចំនួន ១ ខេត្តកំពង់ឆ្នាំងចំនួន ១ ខេត្តកំពតចំនួន ១ ខេត្តក្រចេះចំនួន ១ ខេត្តពោធិ៍សាត់ចំនួន ១ និងរាជធានីភ្នំពេញចំនួន ១។

នៅខេត្តព្រះសីហនុ ក៏កំពុងសិក្សាបង្កើតតំបន់ពិសេសថ្មីមួយទៀតរបស់សម្ព័ន្ធក្រុមហ៊ុន East Group ដែលមានទីតាំងនៅស្រុកព្រៃនប់។

ក្នុងឱកាសជួបពិភាក្សាការងារជាមួយលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី ០៤ ខែមីនា ឆ្នាំ ២០២៥ សម្ព័ន្ធក្រុមហ៊ុន East Group ដឹកនាំដោយអ្នកឧកញ៉ា លី សេងឃាង ប្រធានក្រុមប្រឹក្សាភិបាល បានលើកពីគម្រោងស្នើសុំបង្កើតតំបន់សេដ្ឋកិច្ចពិសេសនៅខេត្តព្រះសីហនុ និងស្នើសុំការចង្អុលបង្ហាញពីលោកឧបនាយករដ្ឋមន្ត្រី សំដៅធ្វើឱ្យគម្រោងស្នើសុំបង្កើតតំបន់សេដ្ឋកិច្ចពិសេសមួយនេះ អាចប្រព្រឹត្តទៅបានដោយរលូន មានអនុលោមភាពតាមច្បាប់និងបទដ្ឋានគតិយុត្ត៕