ព័ត៌មានជាតិ

កំណាត់ផ្លូវជាតិលេខ ៦០B កំពុងសាងសង់ចេញពីគល់ស្ពានខេត្តក្រចេះ ឆ្ពោះទៅខេត្តកំពង់ធំ

បានផុស

១ year មុន

នៅ

ថ្ងៃពុធ ១២ មីនា ២០២៥

ដោយ

ផ្លូវថ្មីមួយខ្សែដែលជាផ្នែកមួយនៃកំណាត់ផ្លូវជាតិលេខ ៦០B កំពុងត្រូវបានស្ថាបនាតភ្ជាប់ពីគល់ស្ពានឆ្លងទន្លេមេគង្គខេត្តក្រចេះត្រើយខាងលិចតភ្ជាប់ទៅខេត្តកំពង់ធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវមួយខ្សែនេះ បច្ចុប្បន្នកំពុងស្ថាបនាលើកកម្ពស់ និងត្រៀមចាក់កៅស៊ូដោយមានប្រវែង ៥ គីឡូម៉ែត្រ និងមានទទឹង ១៥ ម៉ែត្រ។ ការស្ថាបនាកំណាត់ផ្លូវដែលជាផ្នែកមួយនៃផ្លូវជាតិលេខ ៦០B តភ្ជាប់ពីខេត្តក្រចេះ ទៅខេត្តកំពង់ធំ មានភាពប្រទាក់ក្រឡាគ្នាជាមួយផ្លូវជាតិសំខាន់ៗ៖ ដូចជា ត្រើយខាងលិចតភ្ជាប់ផ្លូវជាតិលេខ៦ ត្រង់ផ្លូវបំបែកកំពង់ថ្ម ខេត្តកំពង់ធំ ឆ្ពោះទៅកាន់ខេត្តសៀមរាប និងតភ្ជាប់តាមរយៈផ្លូវខេត្តលេខ ២៧៩ ឆ្ពោះទៅកាន់ខេត្តកំពង់ចាម។

តាមរយៈផ្លូវមួយខ្សែនេះ នឹងជួយសម្រួលពលរដ្ឋដែលរស់នៅក្នុងខេត្តកំពង់ធំ និងខេត្តក្រចេះ អាចដឹកជញ្ជូនកសិផលឆ្លងកាត់ទៅមកបានយ៉ាងងាយស្រួល ខណៈនៅជុំវិញដងផ្លូវថ្មីមួយខ្សែនេះ អមទៅដោយចម្ការស្វាយចន្ទី ចម្ការកៅស៊ូ ចម្ការដំឡូងមី ដែលបម្រើដល់វិស័យសេដ្ឋកិច្ចយ៉ាងសំខាន់ខ្លាំង ក្នុងស្រុកព្រែកប្រសព្វ។

ការស្ថាបនាកំណាត់ផ្លូវដ៏មានសក្តានុពលឆ្ពោះទៅខេត្តកំពង់ធំ ក៏ជាសរសៃឈាមបម្រើវិស័យសេដ្ឋកិច្ចដ៏សំខាន់មួយ ជាពិសេសលើវិស័យកសិកម្ម ពីព្រោះនៅស្រុកព្រែកប្រសព្វជាតំបន់សំបូរទៅដោយចម្ការកៅស៊ូ ស្វាយចន្ទី និងដំឡូងមី។ រីឯខាងខេត្តកំពង់ធំក៏សំបូរដូចគ្នាផងដែរ។ ដូច្នេះ នៅពេលប្រជាពលរដ្ឋប្រមូលបានផល ជួយសម្រួលក្នុងការដឹកជញ្ជូនកសិផល ធ្វើឲ្យតម្លៃទីផ្សារកសិផលបានតម្លៃល្អសមរម្យ៕

អត្ថបទ៖ ប្រុញ វិធិន