វៀតណាម ជឿថា កម្ពុជានឹងអាចសម្រេចបានគោលដៅអភិវឌ្ឍជាប្រទេសអ្នកមានឆ្នាំ២០៥០

វៀតណាម ជឿលើកម្ពុជា ថា នឹងអាចសម្រេចបានគោលដៅអភិវឌ្ឍរបស់ខ្លួនទៅជាប្រទេសអ្នកមាននៅឆ្នាំ២០៥០។ នេះជាសុទិដ្ឋិនិយមដែលឯកអគ្គរដ្ឋទូតវៀតណាម មើលឃើញ ហើយបានលើកឡើងនៅចំពោះមុខសម្ដេចពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា ក្នុងជំនួបសម្តែងការគួរសម នាព្រឹកថ្ងៃទី១៨ ខែមីនា ឆ្នាំ២០២៥។

លោក ង្វៀន មិញវូ ឯកអគ្គរដ្ឋទូតថ្មីរបស់វៀតណាមប្រចាំកម្ពុជា បង្ហាញសុទិដ្ឋិនិយមថា ក្រោមការដឹកនាំរបស់គណបក្សប្រជាជនកម្ពុជា កម្ពុជានឹងសម្រេចបាននូវគោលដៅអភិវឌ្ឍរបស់ខ្លួន ក្លាយទៅជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០ និងជាប្រទេសដែលមានចំណូលខ្ពស់ក្នុងឆ្នាំ២០៥០។

លោកឯកអគ្គរដ្ឋទូតវៀតណាម បានអបអរសាទរចំពោះសមិទ្ធផលដ៏ធំធេងរបស់កម្ពុជាក្នុងការអភិវឌ្ឍប្រទេសជាតិបានយ៉ាងឆាប់រហ័ស ជាពិសេសគឺការរក្សាបាននូវសន្តិភាព ស្ថិរភាពយូរអង្វែង។

បើតាមលោកឯកអគ្គរដ្ឋទូត ង្វៀន មិញវូ គោលដៅអភិវឌ្ឍរបស់កម្ពុជាក្នុង២០៥០ ក៏ស្របគ្នាជាមួយនឹងគោលដៅអភិវឌ្ឍសេដ្ឋកិច្ច-សង្គមរបស់វៀតណាមផងដែរ ក្នុងការសម្រេចឱ្យបាននូវការអភិវឌ្ឍប្រទេសជាតិឱ្យកាន់តែមានប្រសិទ្ធភាព និងឆាប់រហ័សថែមទៀត សំដៅឈានទៅក្លាយជាប្រទេសដែលមានចំណូលខ្ពស់ក្នុងឆ្នាំ២០៤៥ ខណៈវៀតណាម បាននិងកំពុងធ្វើកំណែទម្រង់ដ៏ធំធេងរបស់ខ្លួនសម្រាប់ការអភិវឌ្ឍសេដ្ឋកិច្ច-សង្គម។

សម្តេចពញាចក្រី ហេង សំរិន បានអបអរសាទរចំពោះជោគជ័យនៃកំណែទម្រង់ថ្មីៗរបស់វៀតណាម ដែលនឹងធ្វើឱ្យប្រជាជនវៀតណាមកាន់តែទទួលបានការអភិវឌ្ឍ និងជឿនលឿនជាបន្តបន្ទាប់។

ចំពោះទំនាក់ទំនង និងកិច្ចសហប្រតិបត្តិការទ្វេភាគី សម្ដេចពញាចក្រី ហេង សំរិន និងលោកឯកអគ្គរដ្ឋទូត ង្វៀន មិញវូ សុទ្ធតែបានគូសបញ្ជាក់ពីចំណងមិត្តភាពជាប្រពៃណីនៃប្រទេសទាំងពីរ នាពេលកន្លងមក ដោយសម្ដេចពញាចក្រី ជឿជាក់ថា បេសកកម្មរបស់លោកឯកអគ្គរដ្ឋទូតនៅកម្ពុជា នឹងជួយឱ្យទំនាក់ទំនងមិត្តភាព សាមគ្គីជាប្រពៃណី និងកិច្ចសហប្រតិបត្តិការដ៏ជិតស្និទ្ធ និងគ្រប់ជ្រុងជ្រោយរវាងប្រទេសទាំងពីរ កម្ពុជា-វៀតណាម កាន់តែរឹងមាំថែមមួយកម្រិតទៀត។

ជាការឆ្លើយតប លោកឯកអគ្គរដ្ឋទូត បានថ្លែងអណរគុណចំពោះសម្តេចចក្រី ក្នុងនាមជាឥស្សរជនជាន់ខ្ពស់មួយរូបដែលបានខិតខំកសាងនិងពូនជ្រុំទំនាក់ទំនង ចំណងមិត្តភាពជាប្រពៃណីនៃប្រទេសទាំងពីរនាពេលកន្លងមក និងគោរពស្នើសុំការគាំទ្រពីសម្តេច ចំពោះបេសកកម្មការទូតថ្មីរបស់លោក ដើម្បីធ្វើឱ្យទំនាក់ទំនង និងកិច្ចសហប្រតិបត្តិការដ៏ជិតស្និទ្ធនេះ កាត់តែប្រសើរឡើងថែមទៀត៕