ឱកាសល្អសម្រាប់យុវជនក្នុងការប្រកួតពីបញ្ហាបរិស្ថាន!

ក្រសួងបរិស្ថាន បានប្រកាសជ្រើសរើសយុវជននៅភ្នំពេញប្រកួតក្នុងកម្មវិធីពិភាក្សាទាក់ទងជាមួយបញ្ហាបរិស្ថានសម្រាប់ឆ្នាំ២០២៣។ ក្រសួងបានចេញសេចក្តីប្រកាសកាលពីថ្ងៃទី៣១ ខែមីនា ឆ្នាំ២០២៣នៅលើទំព័រហ្វេសប៊ុកផ្លូវការរបស់ខ្លួន។

កម្មវិធីប្រកួតស្តីពី “វេទិកាជើងឯកយុវជនជជែកពិភាក្សាអំពីបញ្ហាបរិស្ថានឆ្នាំ២០២៣” នឹងធ្វើឡើងរយៈពេល២ថ្ងៃគឺ នៅថ្ងៃទី១ និងថ្ងៃទី២ ខែមិថុនា ឆ្នាំ២០២៣ខាងមុខ។ កម្មវិធីប្រកួតរៀបចំឡើងក្នុងគោលបំណងលើកស្ទួយការសិក្សាស្រាវជ្រាវ ការជជែកពិភាក្សា និងដេញដាលមតិ ព្រមទាំងការស្រឡាញ់ និងចូលរួមថែរក្សាបរិស្ថានរបស់យុវជនកម្ពុជា។

ចំពោះលក្ខខណ្ឌក្នុងការចូលរួមនោះគឺ យុវជនដែលមានពិការភាពត្រូវបានលើកទឹកចិត្តឱ្យចូលរួមប្រកួត និងយុវជនដែលជាសិស្សនិស្សិត កំពុងសិក្សាកម្រិតវិទ្យាល័យ និងឧត្តមសិក្សានៅភ្នំពេញ។

មុននឹងចូលរួមប្រកួតបាន បេក្ខជនត្រូវឆ្លងកាត់នូវលក្ខខណ្ឌផ្សេងៗដែលក្រសួងបានដាក់ជូនដូចជា ពាក្យសុំចូលរួមប្រកួតមួយច្បាប់ និងអត្ថបទស្រាវជ្រាវ១ច្បាប់។ ចំពោះគំរូនៃអត្ថបទស្រាវជ្រាវអាចទាញយកតាមតំណរភ្ជាប់នេះបាន (http://bit.ly/3ldsoCD)។

សូមជម្រាបថា ប្រសិនជាយុវជនមានបំណងចង់ចុះឈ្មោះប្រកួតគឺដាក់នៅ នាយកដ្ឋានអប់រំបរិស្ថាន (ជាន់ទី៣) ទីស្តីការក្រសួងបរិស្ថាន ឬ តាមរយៈតេឡេក្រាម ០១៥ ៨៨៦ ៩៩០ / ០១២ ៣៦១ ៥៥២។ ថ្ងៃដែលផុតកំណត់ទទួលពាក្យគឺនៅថ្ងៃទី២០ ខែមេសា ឆ្នាំ២០២៣ វេលាម៉ោង១៧:០០នាទី៕