សម្ដេចសភាធិបតី៖ សន្តិភាពគឺពិបាកក្នុងការកសាង ហើយរឹតតែពិបាកក្នុងការថែរក្សា

ប្រធានរដ្ឋសភាកម្ពុជា សម្ដេចសភាធិបតី ឃួន សុដារី បានថ្លែងទៅកាន់កិច្ចប្រជុំកំពូលពិភពលោកឆ្នាំ២០២៥ (Universal Peace Federation World Summit 2025 ) នៅទីក្រុងសេអ៊ូល សាធារណរដ្ឋកូរ៉េ ថា «សន្តិភាពគឺពិបាកក្នុងការកសាង ហើយរឹតតែពិបាកក្នុងការថែរក្សា និងធានានិរន្តភាព» ការរក្សាសន្ដិភាពឱ្យស្ថិតស្ថេរយូរអង្វែងត្រូវមានការចូលរួម​ជជែក ពិភាក្សា និងធានានិរន្តរភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំ​កំពូលពិភពលោក​នេះ​កាលពីថ្ងៃទី១១ ខែមេសា សម្ដេចសភាធិបតី ឃួន សុដារី បាន​លើកឡើងថាបញ្ហាប្រឈមនៃសន្ដិភាព និងសន្តិសុខពិភពលោកបច្ចុប្បន្នកើតចេញពីការខ្វះការជឿទុកចិត្តគ្នា ការកាត់ផ្ដាច់សេដ្ឋកិច្ច ជម្លោះអូសបន្លាយ ការរំខានផ្នែកបច្ចេកវិទ្យា ការរិចរលបរិស្ថាន និងវិបត្តិអាកាសធាតុកាន់តែអាក្រក ដែលទាំងនេះទាមទារឱ្យមានការឆ្លើយតបជាបន្ទាន់ មានការសម្របសម្រួល និងការឆ្លើយតបដោយវិធានចម្រុះ។

សម្ដេចសភាធិបតីបានលើកទឹកចត្តិឱ្យមានការតស៊ូមតិសម្រាប់ពហុភាគីនិយម ដោយផ្អែកលើការជឿទុកចិត្ត និងផ្អែកលើលទ្ធផលដោយផ្អែកលើច្បាប់អន្តរជាតិ និងអភិបាលកិច្ចសកលប្រកបដោយបរិយាបន្ន ដោយវាផ្ទុយទៅនឹងល្បែងដែលគ្មានអ្នកឈ្នះ ដែលផ្តល់អាទិភាពដល់អត្ថប្រយោជន៍ឯកតោភាគី ជាជាងលើសុខុមាលភាពសមូហភាព។

សូមជម្រាបថាកិច្ចប្រជុំកំពូលពិភពលោក២០២៥ មានគណៈប្រតិភូមកពីប្រទេសចំនួន១១៤ ប្រទេសចូលរួម ដែលក្នុងនោះរួមមានស្ថាប័ននីតិប្បញ្ញត្តិ នីតិប្រតិបត្តិ សង្គមស៊ីវិស័ល ថ្នាក់ដឹកនាំផ្នែកសាសនា និងវិស័យឯកជន ដើម្បីជួបប្រជុំគ្នានៅក្នុងគោលដៅតែមួយគត់គឺ ការលើកកម្ពស់សន្តិភាពនិងវិបុលភាពសម្រាប់ទំាងអស់គ្នា។កិច្ចប្រជុំកំពូលពិភពលោក ជាវេទិកាបើកចំហ និងលំហប្រកបដោយសុវត្ថិភាព សម្រាប់ការពិភាក្សា ការចែករំលែក ផ្លាស់ប្តូរយោបល់ និងចាត់វិធានការជាក់ស្តែងដើម្បីឈានទៅសម្រេចបាននូវសន្តិភាពពិភពលោក និងបានអះអាងថា “យើងចាំបាច់ត្រូវធ្វើសកម្មភាពឱ្យខ្លាំងជាងការនិយាយ”៕

អត្ថបទដោយ ហ៊ុន សិរីវឌ្ឍន៍