ឱកាសចូលឆ្នាំ៖ អភិបាលខេត្តកណ្ដាលឱ្យកម្លាំងយកចិត្តទុកដាក់ជួយបញ្ចៀសការកកស្ទះចរាចរណ៍

ខណៈប្រជាពលរដ្ឋសម្រុកទៅស្រុកកំណើត ក្នុងឱកាសថ្ងៃចូលឆ្នាំថ្មីប្រពៃណីជាតិខ្មែរ អភិបាលខេត្តកណ្ដាល លោក គួច ចំរើន បានណែនាំដល់កងកម្លាំងបង្កើនការយកចិត្តទុកដាក់ក្នុងការជួយសម្រួលនូវលំហូរចរាចរណ៍របស់ប្រជាពលរដ្ឋ ធ្វើយ៉ាងណាបញ្ជៀសនូវការកកស្ទះចរាចរណ៍ ក៏ដូចជាការធ្វើដំណើរប្រកបដោយសុវត្ថិភាព។

ការណែនាំរបស់អភិបាលខេត្តបែបនេះ នៅក្នុងពិធីសំណេះសំណាល និងត្រួតពិនិត្យកងកម្លាំងនគរបាល នៃស្នងការដ្ឋាននគរបាលខេត្តកណ្តាល នាឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ កាលពីរសៀលថ្ងៃទី១១ ខែមេសា ឆ្នាំ២០២៥ នៅស្នងការនគរបាលខេត្តកណ្ដាល។ លោក គួច ចំរើន បានលើកឡើងថា នៅពេលប្រជាពលរដ្ឋធ្វើការ កងកម្លាំងក៏ធ្វើការដែរ តែនៅពេលមានថ្ងៃឈប់សម្រាក ឬពិធីបុណ្យធំៗ ប្រជាពលរដ្ឋឈប់សម្រាក តែសម្រាប់កងកម្លាំងកាន់តែធ្វើការទ្វេដង។

ក្នុងន័យនេះ លោកអភិបាលខេត្ត ថា ខេត្តកណ្ដាល ដែលជាភូមិសាស្ត្រឆ្លងកាត់ដោយតភ្ជាប់ពីរាជធានីភ្នំពេញ ទៅតាមបណ្ដាខេត្តនានា ដែលជាចរន្តនៃការចាកចេញរបស់ប្រជាពលរដ្ឋ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ សម្រុកទៅស្រុកកំណើតយ៉ាងច្រើនកុះករ។ ដូច្នេះ កងកម្លាំង ត្រូវត្រៀមខ្លួនក្នុងការសម្រួលនូវលំហូរចរាចរណ៍របស់ប្រជាពលរដ្ឋ ក្នុងឱកាសដែលពួកគាត់អញ្ជើញទៅស្រុកកំណើតដោយសុវត្ថិភាព ព្រមទាំងសម្រួលបញ្ជៀសការកកស្ទះចរាចរណ៍ផងដែរ។

លោក គួច ចំរើន បានថ្លែងកោតសរសើរដល់កម្លាំងនគរបាលខេត្តកណ្ដាល ដែលបានខិតខំបំពេញនូវតួនាទីភារកិច្ចរបស់ខ្លួនបានយ៉ាងល្អប្រសើរ ក្នុងការបង្ការ ការពារ និងទប់ស្កាត់រាល់បទល្មើសនានាកើតមាននៅក្នុងភូមិសាស្ត្រខេត្តកណ្ដាល ដើម្បីធានានូវសន្តិសុខ សុវត្ថិភាព ស្ថេរភាព និងរបៀបរៀបរយនៅទូទាំងខេត្តកណ្ដាលនាពេលកន្លងមក។

ដោយរដ្ឋបាលខេត្តកណ្ដាល បានរៀបចំនូវព្រឹត្តិការណ៍សង្ក្រាន្តខេត្តកណ្ដាល រយៈពេលបីថ្ងៃ ដែលក្នុងនោះមានការលេងនូវល្បែងប្រជាប្រិយ ការប្រគំតន្ត្រី ការបាញ់ទឹក និងកម្មវិធីកម្សាន្តសប្បាយនានាជាច្រើន លោកអភិបាលខេត្ត បញ្ជាក់ថា ប្រជាពលរដ្ឋនឹងមកលេងកាន់តែច្រើន ភារកិច្ចក្នុងការការពារសន្តិសុខ សុវត្ថិភាព របស់អាជ្ញាធរ និងកងកម្លាំងក៏កាន់តែច្រើនផងដែរ។ ដូច្នេះ កងកម្លាំងទាំងអស់ ត្រូវខិតខំយកចិត្តទុកដាក់ស្ដាប់តាមការណែនាំ និងដឹកនាំតាមបញ្ជាការគ្រប់ជាន់ថ្នាក់ បំពេញភារកិច្ចរបស់ខ្លួនឱ្យទទួលបាននូវលទ្ធផលល្អ ឱ្យប្រជាពលរដ្ឋដែលមកលេងកម្សាន្តក្នុងព្រឹត្តិការណ៍សង្ក្រាន្តខេត្តកណ្ដាល បានសប្បាយរីករាយនៅក្នុងឱកាសឆ្នាំថ្មី៕