ក្រសួងការងារគ្រោងដាក់រោងជាងបណ្ដុះបណ្ដាលបច្ចេកទេសនៅអនុវិទ្យាល័យជិតតំបន់សេដ្ឋកិច្ច

រដ្ឋមន្ត្រីក្រសួងការងារ​លោក ហេង សួរ ឱ្យដឹង​ថាក្រសួងនឹងរៀបចំមេរៀនសម្រាប់បណ្ដុះបណ្ដាលបច្ចេកទេសដល់សិស្សចាប់ពីថ្នាក់ទី១០ឡើងទៅ ហើយជាពិសេស​ក៏គ្រោងនឹងបង្កើតរោងជាង​បណ្ដុះបណ្ដាលបច្ចេកទេសដល់សិស្សដែលរៀននៅអនុវិទ្យាល័យនៅជិតតំបន់សេដ្ឋកិច្ច និងឧស្សាហកម្មផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបិទសិក្ខាសាលាស្តីពី «ការគិតឡើងវិញលើឧត្ដមភាពអប់រំបណ្តុះបណ្តាលបច្ចេកទេស និងវិជ្ជាជីវៈ (អ.ប.វ.) សម្រាប់បរិវត្តកម្ម និងផលជះប្រកបដោយនិរន្តរភាព» នៅវិទ្យាស្ថានបណ្ដុះបណ្ដាលបច្ចេកទេស (NTTI) កាលពីថ្ងៃទី២៤ ខែមេសា ឆ្នាំ២០២៥លោក ហេង សួរ បាន​លើកឡើងថា ចាប់ពីឆ្នាំសិក្សា២០២៦-២០២៧ ក្រសួងត្រូវទទួលខុសត្រូវនូវការបណ្ដុះបណ្ដាលបច្ចេកទេសវិជ្ជាជីវៈនៅតាមសាលាមួយចំនួនដែលនៅក្បែរតំបន់សេដ្ឋកិច្ច និងឧស្សាហកម្ម។ លោកថាកិច្ចការនេះក៏ប្រហែលជាត្រូវបង្កើតឱ្យមានរោងជាងមួយចំនួននៅតាមអនុវិទ្យាល័យ​ក្បែរតំបន់ទាំងនោះដែរ។

លោក ហេង សួរ៖ «ការដាក់រោងជាងមួយចំនួនដែលស្ថិតនៅតាមអនុវិទ្យាល័យដែលស្ថិតនៅក្បែរតំបន់សេដ្ឋកិច្ចពិសេស ឬមួយសួនឧស្សាហកម្ម គឺនឹងអាចជួយឱ្យយុវជនទាំងអស់នោះគាត់អាចឆ្លងកាត់វគ្គបណ្ដុះបណ្ដាលក្នុងកម្រិតខ្លីណាមួយហើយមានជំនាញសមរម្យណាមួយដើម្បីទៅធ្វើការនៅតាមតំបន់សេដ្ឋកិច្ចពិសេស ឬមួយសួនឧស្សាហកម្មដែលនៅក្បែរផ្ទះគាត់តែម្ដង»។

លោក​ថា​ការដាក់នេះគឺដើម្បីជួយដល់សិស្សមួយចំនួន​ដែលសម្រេចបោះបង់ចោលការសិក្សា​បន្ទាប់ពីចប់​ថ្នាក់ទី៩ ឬអនុវិទ្យាល័យ ឱ្យ​គាត់ទទួលបាននូវវគ្គបណ្ដុះបណ្ដាល​បច្ចេកទេសឱ្យគាត់ទទួលបាន​ជំនាញសមរម្យណាមួយដើម្បីមានសមត្ថភាពធ្វើការនៅតំបន់ឧស្សាហកម្មដែលនៅក្នុងសហគមន៍របស់គាត់តែម្ដង។

កាលពីថ្ងៃទី២៦ ខែមីនា ឆ្នាំ២០២៥ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានបញ្ជាឱ្យមាន​ការ​គិតគូរឡើង​វិញពី​ការតម្រង់​ទិស​ដល់សិស្ស​វិទ្យាល័យលើការសិក្សា​បច្ចេកទេសឧស្សាហកម្ម និងពិនិត្យ​ជួយ​បណ្ដុះបណ្ដាល​បច្ចេកទេស​ដល់​សិស្ស​ដែលរៀនចប់ថ្នាក់ទី៩ផងដែរ៕

អត្ថបទដោយ ហ៊ុន សិរីវឌ្ឍន៍